Rusiya Daxili İşlər Nazirliyinin Polis akademiyalarında təhsil almaq üçün göndəriləcək kursantlarla görüş keçirilib

Bakı:

26 °C

58 %

11 m/s

AZ RU EN

Ana səhifə / Sosial / Rusiya Daxili İşlər Nazirliyinin Polis akademiyalarında təhsil almaq üçün göndəriləcək kursantlarla görüş keçirilib

Rusiya Daxili İşlər Nazirliyinin Polis akademiyalarında təhsil almaq üçün göndəriləcək kursantlarla görüş keçirilib

27.08.2019 [09:06]

Avqustun 26-da Daxili İşlər naziri, general-polkovnik Vilayət Eyvazov Rusiya Federasiyası Daxili İşlər Nazirliyinin Polis akademiyalarında təhsil almaq üçün ezam ediləcək kursantlar və onların valideynləri ilə görüşüb.
Daxili İşlər Nazirliyinin (DİN) mətbuat xidmətindən AZƏRTAC-a bildiriblər ki, görüşdə qarşıdakı beş il ərzində Azərbaycan Polisini Rusiyada təmsil edəcək gəncləri və onların valideynlərini təbrik edən nazir son illər Prezident İlham Əliyevin rəhbərliyi ilə dövlət gənclər siyasətinin həyata keçirilməsində də böyük nailiyyətlərin qazanıldığını, dövlətimizin başçısının çıxış və nitqlərində Azərbaycanın parlaq gələcəyinin məhz yüksək intellektə, müasir dünyagörüşə malik, bacarıqlı, dövlətçiliyə sadiq vətənpərvər gənclərdən asılı olduğunu dəfələrlə vurğuladığını qeyd edib. Ölkə rəhbərliyinin gənclərə hər zaman yüksək diqqət və qayğı göstərdiyini xatırladan nazir yüksək mənəviyyatlı, işgüzar və istedadlı gənclərin ölkəmizin ictimai-siyasi həyatında daha geniş təmsil olunmaları, onların dövlət idarəçiliyində xidmətdə irəli çəkilmələri üçün bütün zəruri addımların atıldığını diqqətə çatdırıb.
Sonra DİN-in Baş Kadrlar İdarəsinin rəisi, polis general-mayoru Rafiq Abbasov məlumat verib ki, iki ölkənin Daxili İşlər nazirlikləri arasındakı razılaşmaya əsasən, bu il Azərbaycan DİN-ə Volqoqrad və Nijeqorodsk şəhərlərindəki Polis akademiyalarında 9 yer ayrılıb. Həmin yerlərə qəbul üçün elan edilmiş müsabiqəyə 24 namizəd qatılıb. Nazirliyin müvafiq komissiyası tərəfindən müsabiqə tam şəffaflıq şəraitində keçirilib. Namizədlərin Azərbaycan Respublikasının Dövlət İmtahan Mərkəzində topladığı balları, rus dilində yazı qabiliyyəti və şifahi nitq bacarıqları, eləcə də fiziki hazırlığı əsas götürülüb. Yekunda ən layiqli 9 abituriyent seçilib.
Nazir, general-polkovnik Vilayət Eyvazov həyatlarında ən əlamətdar günlərdən biri - kursant adına layiq görülmələri münasibətilə gəncləri təbrik edib, onlara çətin və şərəfli xidmətlərində, təhsildə uğurlar arzulayıb. O, gənc əməkdaşlara Vətənimizin, eləcə də Azərbaycan Polisinin adını daim uca tutmağı, eyni zamanda, bilik və təcrübələrini, peşəkar və fiziki hazırlıq səviyyələrini artırmalarını, daim öz üzərlərində işləmələrini, ən müasir informasiya texnologiyalarına yiyələnmələrini tövsiyə edib. Nazir əmin olduğunu bildirib ki, Rusiyanın Polis akademiyalarına göndərilən gənclərimiz orada mükəmməl təhsil alaraq müasir texnologiyalarla işləmək bacarığına yiyələnəcək, Vətənə qayıdıb cinayətkarlıqla mübarizədə, ictimai asayişin təmin olunmasında, vətəndaşlarımızın qanunla qorunan hüquq və mənafelərinin keşiyində duracaqlar.

Paylaş:

Baxılıb: 501 dəfə