Çoxmənzilli binalarla bağlı Fərmanın icrası istiqamətində görülmüş işlər barədə növbəti müşavirə keçirilib

Bakı:

24 °C

53 %

5 m/s

AZ RU EN

Ana səhifə / Sosial / Çoxmənzilli binalarla bağlı Fərmanın icrası istiqamətində görülmüş işlər barədə növbəti müşavirə keçirilib

Çoxmənzilli binalarla bağlı Fərmanın icrası istiqamətində görülmüş işlər barədə növbəti müşavirə keçirilib

17.04.2019 [10:04]

Aprelin 16-da Fövqəladə Hallar Nazirliyinin (FHN) Tikintidə Təhlükəsizliyə Nəzarət Dövlət Agentliyinin inzibati binasında “Bəzi çoxmənzilli binaların istismarına icazə verilməsinin sadələşdirilməsi haqqında” Azərbaycan Respublikası Prezidentinin 2019-cu il 19 fevral tarixli Fərmanının icrası ilə bağlı görülmüş işlərin, habelə qarşıya çıxan problemlərin müzakirəsi mövzusunda müşavirə keçirilib.
FHN-dən AZƏRTAC-a bildiriblər ki, müşavirədə Azərbaycan Respublikası Prezidentinin iqtisadi məsələlər üzrə köməkçisi-şöbə müdiri Əli Əsədov, fövqəladə hallar naziri Kəmaləddin Heydərov, Dövlət Şəhərsalma və Arxitektura Komitəsinin sədri Samir Nuriyev, Əmlak Məsələləri Dövlət Komitəsinin sədri Kərəm Həsənov, Bakı Şəhər İcra Hakimiyyətinin başçısı Eldar Əzizov, baş prokurorun müavini - Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev, “Azərenerji” ASC-nin prezidenti Balababa Rzayev, “Azərsu” ASC-nin sədrinin birinci müavini Teyyub Cabbarov, “Azəriqaz” İB-nin baş direktoru Əkbər Hacıyev, “Azərişıq” ASC-nin sədr müavini Ramil Yusifov, Nazirlər Kabinetinin kommunikasiya, tikinti və kommunal təsərrüfat məsələləri şöbəsinin müdiri Qasım Abdullayev, Azərbaycan Prezidentinin iqtisadi məsələlər üzrə köməkçisinin xidmətinin baş məsləhətçisi Feyruz Mustafayev, FHN-in aidiyyəti rəhbər şəxsləri iştirak ediblər.
Müşavirədə çıxış edən Azərbaycan Respublikası Prezidentinin İqtisadi məsələlər üzrə köməkçisi-şöbə müdiri Əli Əsədov dövlətimizin başçısının 2019-cu il fevralın 19-da imzaladığı “Bəzi çoxmənzilli binaların istismarına icazə verilməsinin sadələşdirilməsi haqqında” Fərmanın əhəmiyyətindən danışıb.
Ə.Əsədov xüsusilə vurğulayıb ki, vətəndaşlar tərəfindən Azərbaycan Respublikasının Prezidenti İlham Əliyevə ünvanlanmış çoxsaylı müraciətlərə cavab olaraq, dövlətimizin başçısı növbəti dəfə humanizm nümayiş etdirərək imzaladığı bu Fərmanla yürütdüyü siyasətin mərkəzində Azərbaycan vətəndaşının dayandığını bir daha sübut etdi. Fərmanın əsas məqsədi insanların normal yaşayışının təmin edilməsidir. Bu mühüm sənəddən irəli gələn məsələlərin icrası ilə bağlı görülən işlər dövlətimizin başçısının nəzarəti altındadır.
Tədbirdə çıxış edən fövqəladə hallar naziri Kəmaləddin Heydərov bildirib ki, Azərbaycan Respublikasının Prezidenti İlham Əliyev növbəti dəfə böyük humanistlik göstərərək uzun müddət istismarda olan, lakin müvafiq dövlət orqanları tərəfindən istismara qəbul olunmayan çoxmənzilli yaşayış binalarının istismara qəbulunun sadələşdirilməsi ilə bağlı Fərman imzalayıb. Fərmanın imzalanmasının Prezident İlham Əliyevin xalqımızın sosial rifahının daha da yüksəldilməsi istiqamətində atdığı növbəti mühüm addım adlandıran nazir bu il martın 14-də keçirilmiş ilk müşavirəni xatırladaraq bildirib ki, ötən müddətdə aidiyyəti qurumlar tərəfindən lazımi işlər görülüb. Bu proses fasiləsiz davam etdirilir.
K.Heydərov vurğulayıb ki, hazırda respublika üzrə istismara qəbul olunmamış çoxmənzilli yaşayış binalarının sayı 434-dür. Bunun 381-i paytaxt Bakıdadır.
FHN-in Tikintidə Təhlükəsizliyə Nəzarət Dövlət Agentliyinin binasında müvafiq qurumların səlahiyyətli nümayəndələrinin iştirakı ilə qərargah yaradıldığını xatırladan nazir deyib ki, bu il aprelin 15-dək qərargahda 227 yaşayış binasının (kompleksinin) nümayəndələri qəbul edilib, onlara zəruri izahatlar verilib. Binalarda müayinə işlərinin yekunlaşdığını, bunun əsasında aşkarlanan çatışmazlıqlarla bağlı görüləsi işlərin tez bir zamanda müəyyən olunacağını bildirən nazir deyib ki, 14 binaya dair sənədlər komplektləşdirilib. Bu binaların istismara hazır olması barədə müvafiq qaydada rəy tərtib edilib və aidiyyəti üzrə Dövlət Şəhərsalma və Arxitektura Komitəsinə təqdim olunub. Nazir işlərin Fərmanla müəyyən olunmuş müddətdə həyata keçirilməsinin və aşkarlanan çatışmazlıqların operativ surətdə aradan qaldırılmasının vacibliyini bildirib.
Müşavirədə digər qurumların rəhbərləri ötən müddətdə görülmüş işlər və qarşıda duran vəzifələr barədə çıxış ediblər.
Sonra Fərmanın icrasından irəli gələn məsələlər geniş müzakirə edilib, mövcud problemlərin həlli yolları barədə fikir mübadiləsi aparılıb, aidiyyəti qurumlara müvafiq tapşırıqlar verilib.

Paylaş:

Baxılıb: 727 dəfə