Medianı öz çirkli əməllərinə alət edən cinayətkarlar məsuliyyətə cəlb olunmalıdırlar

Bakı:

23 °C

56 %

3 m/s

Əlaqə

AZ RU EN

Ana səhifə / Sosial / Medianı öz çirkli əməllərinə alət edən cinayətkarlar məsuliyyətə cəlb olunmalıdırlar

Medianı öz çirkli əməllərinə alət edən cinayətkarlar məsuliyyətə cəlb olunmalıdırlar

16.02.2019 [10:13]

Ölkəmizdə “reket jurnalistikası”na qarşı sərt tədbirlər görülməsi ictimaiyyət nümayəndələri tərəfindən təqdir olunur
Xəbər verildiyi kimi, bir neçə gün öncə Dövlət Təhlükəsizliyi Xidməti “Realliq.info” informasiya saytının baş redaktoru, Azərbaycan Respublikasının vətəndaşı Rəhimov İkram Rafiq oğlunun hədə-qorxu ilə pul tələb etdiyi barədə ayrı-ayrı şəxslərin şikayətləri əsasında araşdırma aparılmasına dair məlumat yayıb. Bildirilir ki, məhkəmə qərarı əsasında aparılan əməliyyat tədbirləri ilə İ.Rəhimovun müvafiq əməlləri qeydə alınıb və o, hədə-qorxu ilə tələb etmə cinayət əməllərində şübhəli şəxs kimi saxlanılaraq, barəsində məhkəmə tərəfindən həbs qətimkan tədbiri seçilib. Davam edən istintaqla şübhəli bilindiyi cinayətlərə görə İkram Rəhimova elan edilən ittihama əsasən, o, 2017-ci ilin sentyabrında zərərçəkmiş Elxan Dadaşovdan, eləcə də zərərçəkmiş Zakir Hüseynovdan, zərərçəkmiş Rafiq Ədilovdan və digərlərindən barəsində mətbuatda şəxsi və işgüzar nüfuzuna xələl gətirən rüsvayedici məlumatlar yayacağı hədəsi ilə müxtəlif vaxtlarda mütəmadi olaraq pul tələb edərək alıb. Qeyd edək ki, İ.Rəhimovun cinayət əməlləri səs yazıları və digər ifşaedici faktlar əsasında öz təsdiqini tapıb.
Məsələ ilə bağlı fikirlərini bölüşən Jurnalistlərin Həmkarlar İttifaqının sədri, Mətbuat Şurasının sədr müavini Müşfiq Ələsgərli bildirib ki, Azərbaycan mediasının saflaşması üçün Azərbaycan Mətbuat Şurası kifayət qədər addımlar atıb və İkram Rəhimov kimilərin media adamı olmadığını cəmiyyətə çatdırıb, onun kimilərin xüsusi məqsədlərlə mediaya soxulduqlarını dəfələrlə isbat edib. Amma Mətbuat Şurasının səlahiyyəti müəyyən bir həddə qədərdir, yalnız rəy verməkdən və ictimai qınaq etməkdən ibarətdir. M.Ələsgərli vurğulayıb ki, İkram Rəhimov haqqında 2017-ci ildə Azərbaycan Mətbuat Şurası rəy verib və bu şəxsin medianın adından istifadə edərək neqativ əməllərlə məşğul olduğunu bildirib: “Amma təəssüf ki, o, öz əməllərindən çəkinməyib. Yaxşı haldır ki, vətəndaşlar müraciət etdilər və Dövlət Təhlükəsizliyi Xidməti də vətəndaşların hüquqlarını müdafiə etmək üçün İkram Rəhimov haqqında tədbir gördü. Bilirsiniz ki, zaman-zaman reket jurnalistlər Azərbaycan mediasından sıxışdırılıb çıxarılıb. DTX-nin bu məsələyə müdaxilə etməsi, ölçü götürməsi alqışlanası haldır. Ümid edirik ki, bu proses sona qədər aparılacaq. Çünki İkram Rəhimov tək deyil və onun kimi reket jurnalistlər hələ də var. Ümumilikdə, İ.Rəhimov kimi cinayətkarların məsuliyyətə cəlb edilməsi jurnalistikanın saflaşdırılmasına xidmət göstərir”.
“Xalq Cəbhəsi” qəzetinin baş redaktoru Elçin Mirzəbəyli də “reket” fəaliyyəti ilə məşğul olan və bunu media ilə əlaqələndirməyə çalışanlar haqqında ölçü götürülməsinin, sərt tədbirlərin görülməsinin vacibliyini diqqətə çatdırıb. Baş redaktor bildirib ki, İ.Rəhimovun cinayətləri hüquq-mühafizə orqanları tərəfindən faktlarla sübuta yetirilib: “Bu cür şantajçılar, jurnalistika adına xələl gətirənlər ağır şəkildə cəzalandırılmalıdırlar. Çünki bu və bunun kimi reket jurnalistlər, Azərbaycan dövlətinə, onun informasiya təhlükəsizliyinə xidmət edən hər kəsi açıq-aşkar, çəkinmədən şantaj edirlər. Təəssüf ki, onlara qahmar çıxanlar, hətta “peşəkar jurnalist” adlandıranlar, dəstək verənlər də tapılır. Bu, yolverilməzdir. İ.Rəhimovun jurnalistika çətiri altında cinayətkar əməllərlə məşğul olmasının qarşısının alınması təqdirəlayiq haldır. İnanırıq ki, jurnalistikanın təmizlənməsinə, peşəkar səviyyəsinin artırılmasına, jurnalistika adına ləkə yaxan bu kimi adamların məsuliyyətə cəlb olunmasına xidmət edən tədbirlər davamlı olacaq”.
Pərviz SADAYOĞLU

Paylaş:

Baxılıb: 723 dəfə