"Türkiyə və Azərbaycan İş Adamları və Sənayeçilər" İctimai Birliyinin ümumi yığıncağı keçirilib

Bakı:

20 °C

68 %

3 m/s

Əlaqə

AZ RU EN

Ana səhifə / Sosial / "Türkiyə və Azərbaycan İş Adamları və Sənayeçilər" İctimai Birliyinin ümumi yığıncağı keçirilib

"Türkiyə və Azərbaycan İş Adamları və Sənayeçilər" İctimai Birliyinin ümumi yığıncağı keçirilib

24.11.2018 [15:39]

Noyabrın 24-də Bakıda "Türkiyə və Azərbaycan İş Adamları və Sənayeçilər" İctimai Birliyinin (TÜİB) 3-cü dönəm seçkili ümumi yığıncağı keçirilib.

AZƏRTAC xəbər verir ki, TÜİB-in İdarə Heyətinin sədri Hüseyn Büyükfırat təmsil etdiyi qurumun son bir ildəki fəaliyyətinə dair təqdimatla çıxış edib. Bildirib ki, TÜİB iki ölkənin iş adamlarını bir araya gətirmək, iqtisadi əlaqələri genişləndirmək, sahibkarlar arasında əməkdaşlıq münasibətlərini gücləndirmək məqsədilə yaradılıb.

Türkiyənin Azərbaycandakı səfiri Erkan Özoral iki ölkə arasında tarixi köklərə söykənən qardaşlıq əlaqələrindən söz açıb və ölkəsinin Azərbaycana müstəqilliyinin bərpasından sonra müxtəlif sahələrdə fəal dəstək göstərdiyini bildirib. Qeyd edib ki, tarixi dostluq, səmimi münasibətlər, yüksək səviyyəli əməkdaşlıq əsasında qurulan Azərbaycan-Türkiyə əlaqələri daim möhkəmlənir. Xalqlarımızın eyni dilə, dinə, mədəniyyətə və s. bir çox digər qarşılıqlı bağlara malik olması bu iki ölkəni hər zaman bir-birinə doğma edib.

Azərbaycan Respublikası Prezidenti Administrasiyasının ictimai-siyasi məsələlər şöbəsinin məsul əməkdaşı Bəhruz Həsənov diqqətə çatdırıb ki, TÜİB yarandığı dövrdən bəri ona göstərilən etimadı tam doğruldub. TÜİB türk iş adamlarını özündə birləşdirən vahid bir platforma olmaqla yanaşı, Azərbaycanın ictimai-sosial həyatında fəal iştirakı ilə seçilib. "Ölkəmizdə müxtəlif türk iş adamları qurumları fəaliyyət göstərir. Düşünürəm ki, onların vahid təşkilata çevrilməsi, yaxud vahid platformadan çıxış etməsi daha səmərəli olardı, eyni zamanda, ümumi işin keyfiyyətinə öz müsbət təsirini göstərərdi", - deyə B.Həsənov vurğulayıb.

B.Həsənov deyib ki, Türkiyədə müxtəlif sahələrdə kifayət qədər aktiv fəaliyyət göstərən azərbaycanlı iş adamları var. Onlar Türkiyənin iqtisadiyyatına öz töhfələrini verirlər. Həmin iş adamlarının birləşdirilməsi, vahid koordinasiya mərkəzinin formalaşdırılması, ortaq layihələrin həyata keçirilməsi daha da yaxşı olardı. Azərbaycanda da kifayət qədər türk şirkətləri var. Bu, sevindirici haldır. Çox istərdik TÜİB bu şirkətlərin hamısını əhatə etsin. Arzu edirik ki, sizin Cocuq Mərcanlıda apardığınız uğurlu fəaliyyətiniz çox qısa zamanda işğaldan azad olunan digər torpaqlarda da davam etsin.

Milli Məclisin iqtisadi siyasət, sənaye və sahibkarlıq komitəsinin sədri, akademik Ziyad Səmədzadə, iqtisadiyyat nazirinin müavini Sahib Məmmədov, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) prezidenti Məmməd Musayev, "Caspian European Club"un sədrinin birinci müavini və baş icraçı direktoru Telman Əliyev, "AmCham Azərbaycan"ın prezidenti Nuran Kərimov Azərbaycanın qardaş Türkiyə ilə əlaqələrini yüksək qiymətləndirib və təmsil etdikləri qurumlarla TÜİB arasında qurulmuş əməkdaşlıq haqqında danışıblar. Diqqətə çatdırılıb ki, biznes dairələri arasında əməkdaşlığın genişləndirilməsində belə tədbirlərin keçirilməsi önəmlidir. Azərbaycanda 2500 türk şirkəti, Türkiyədə 1100 Azərbaycan şirkəti fəaliyyət göstərir. Bu şirkətlər fəaliyyətləri ilə hər iki ölkənin iqtisadiyyatına, inkişafına öz töhfələrini verirlər.

Paylaş:

Baxılıb: 504 dəfə