Azərbaycan Respublikası Gənclər Fondunun Müşahidə Şurasının yeni tərkibdə ilk iclası keçirilib

Bakı:

25 °C

59 %

1 m/s

Əlaqə

AZ RU EN

Ana səhifə / Sosial / Azərbaycan Respublikası Gənclər Fondunun Müşahidə Şurasının yeni tərkibdə ilk iclası keçirilib

Azərbaycan Respublikası Gənclər Fondunun Müşahidə Şurasının yeni tərkibdə ilk iclası keçirilib

05.10.2018 [08:54]

Oktyabrın 4-də Azərbaycan Respublikası Gənclər Fondunun Müşahidə Şurasının yeni tərkibdə ilk iclası keçirilib.
AZƏRTAC xəbər verir ki, tədbirdə Fond tərəfindən elan edilmiş 11-ci qrant müsabiqəsinin nəticələrinin təsdiqlənməsi və Fondun fəaliyyətini tənzimləyən bir sıra sənədlərin qəbul edilməsi məsələlərinə baxılıb.
Qeyd edək ki, Azərbaycan Respublikası Prezidentinin avqustun 29-da imzaladığı Sərəncamla Gənclər Fondunun Müşahidə Şurasının yeni tərkibi təsdiqlənib.
Müşahidə Şurasının sədri, Prezident Administrasiyasının Gənclər siyasəti və idman məsələləri şöbəsinin müdiri Yusuf Məmmədəliyev 11-ci qrant müsabiqəsi barədə Şura üzvlərinə məlumat verərək bildirib ki, 2018-ci il avqustun 28-dən sentyabrın 23-dək Fonda “A” (gənclər təşkilatlarının yerli layihələri), “B” (gənclər təşkilatlarının beynəlxalq layihələri) və “C” (fiziki şəxslərin layihələri) kateqoriyaları üzrə ümumilikdə 1134 layihə təklifi daxil olub. Layihə təklifləri Fond tərəfindən ilkin ekspertizadan keçirilib və onların müəyyən edilmiş qaydalara uyğun tərtib olunması yoxlanılıb.
Müşahidə Şurasında aparılan müzakirələr nəticəsində ilkin ekspertizanın nəticəsində müsabiqəyə buraxılmış “A” kateqoriyası üzrə 91, “B” kateqoriyası üzrə 8, “C” kateqoriyası üzrə 271 olmaqla, ümumilikdə 370 layihənin maliyyələşdirilməsi barədə qərar qəbul edilib (layihələrin siyahısı oktyabrın 6-da Fondun internet səhifəsində yerləşdiriləcək).
Həmçinin Azərbaycan Respublikası Prezidentinin 2018-ci il 29 avqust tarixli Fərmanı ilə təsdiq edilmiş “Azərbaycan Respublikasının Gənclər Fondunun vəsaitindən istifadə, o cümlədən Fondun vəsaiti hesabına güzəştli kreditlərin verilməsi Qaydası”nın icrasını təmin etmək məqsədilə Fondun bir sıra prosedur sənədləri qəbul olunub. Bu sənədlər Fondun yeni maliyyələşdirmə istiqamətləri, o cümlədən xaricdə təhsil, beynəlxalq təşkilatlarda təcrübə keçmə, beynəlxalq tədbirlərdə iştirak, həssas kateqoriyada olan gənclərin təhsil prosesinin maliyyələşdirilməsi, əməkhaqqının qismən maliyyələşdirilməsi və s. üzrə müraciət qaydaları, onlara baxılması və qiymətləndirilməsi meyarlarını tənzimləyir.
İclasda Müşahidə Şurasının üzvləri - gənclər və idman nazirinin müavini İntiqam Babayev, təhsil nazirinin müavini Məhəbbət Vəliyeva, mədəniyyət nazirinin müavini Rafiq Bayramov, əmək və əhalinin sosial müdafiəsi nazirinin müavini Mətin Kərimli, “Gənclərin İntellektual İnkişafına Yardım” İctimai Birliyinin İdarə Heyətinin sədri Seymur Orucov, Azərbaycan Respublikası Gənclər Təşkilatları Milli Şurasının sədri Məryəm Məcidova, “Cavan” Gənclər Hərəkatı İctimai Birliyinin icraçı direktorunun müavini Murad Ağabəyli və “Gələcəyə Körpü” Gənclər İctimai Birliyinin sədri Seymur Vəliyev iştirak ediblər.

Paylaş:

Baxılıb: 551 dəfə