Prezident İlham Əliyevin məhkum edilmiş bir sıra şəxslərin əfvi ilə bağlı Sərəncamının icrası başa çatıb

Bakı:

25 °C

65 %

5 m/s

AZ RU EN

Ana səhifə / Sosial / Prezident İlham Əliyevin məhkum edilmiş bir sıra şəxslərin əfvi ilə bağlı Sərəncamının icrası başa çatıb

Prezident İlham Əliyevin məhkum edilmiş bir sıra şəxslərin əfvi ilə bağlı Sərəncamının icrası başa çatıb

26.05.2018 [07:28]

Azərbaycan Prezidenti İlham Əliyevin ötən gün imzaladığı “Məhkum edilmiş bir sıra şəxslərin Azərbaycan Xalq Cümhuriyyətinin 100 illiyi münasibətilə əfv olunması haqqında” Sərəncamı Ədliyyə Nazirliyinin Penitensiar Xidməti tərəfindən mayın 25-də icra olunub.
AZƏRTAC xəbər verir ki, Sərəncamın icrası Ombudsman Aparatının, dövlət qurumlarının, ədliyyə nazirinin yanında fəaliyyət göstərən İctimai Komitənin, insan hüquqlarının müdafiəsi təşkilatlarının, habelə kütləvi informasiya vasitələri nümayəndələrinin iştirakı ilə Penitensiar Xidmətin tabeliyindəki 1, 2, 4, 6, 9, 10, 11, 13, 14, 15, 17 saylı və digər cəzaçəkmə müəssisələrində həyata keçirilib. Ədliyyə Nazirliyinin və Penitensiar Xidmətin məsul əməkdaşları məhkumların saxlanıldıqları cəzaçəkmə müəssisələrinə gələrək, Sərəncamın icrasını vaxtında və yüksək səviyyədə təmin ediblər.
Prezident tərəfindən əfv olunmuş şəxslər Penitensiar Xidmətin tabeliyindəki cəzaçəkmə müəssisələrindən azadlığa buraxılıblar.
Penitensiar Xidmətin rəhbərliyi cəzaçəkmə müəssisələrində əfv edilmiş şəxslərə azad olunmaları barədə buraxılış vərəqələrini təqdim edib.
Altı aylıq övladı olan Gündüz Babayeva azadlığa çıxdığına görə minnətdarlığını bildirərək deyib: “Prezident İlham Əliyevin imzaladığı əfv Sərəncamının sayəsində öz balalarıma qovuşuram. Əfv olunduğuma görə çox sevinirəm. Prezident İlham Əliyevə minnətdaram ki, bizə bu sevinci yaşatdı, məni balalarıma qovuşdurdu. Dövlətimizin başçısına çox təşəkkür edirəm”.
Bir daha səhvə yol verib cinayət törətməyəcəyini deyən G.Babayeva bildirib: “Qadınlara tövsiyəm odur ki, heç zaman cinayət əməli törətməsinlər. Qadının yeri cəzaçəkmə müəssisəsi deyil, ailəsinin, uşaqlarının yanıdır. Mən bundan sonra balalarımla bir yerdə xoşbəxt yaşayacağam. Bundan sonra məhkumluq həyatı yaşamamaq üçün bir daha belə səhv etməyəcəm”.
Əfv edildiyinə görə sevincinin həddi-hüdudu olmadığını deyən digər qadın məhkum Samirə Yusubova bütün məhbus qadınlar adından Prezident İlham Əliyevə təşəkkürünü bildirib.
Dövlətimizin başçısının Sərəncamına əsasən, əfv olunanlar arasında əcnəbi vətəndaşlar da var. Çin vətəndaşı Ci Fenq Ping yüksək humanist addımına görə Azərbaycan Prezidenti İlham Əliyevə təşəkkürünü ifadə edərək deyib: “Azərbaycan Xalq Cümhuriyyətinin 100 illik yubileyi münasibətilə bütün azərbaycanlıları təbrik edirəm. Azərbaycanlılar qonaqpərvər, mehriban və dostcanlı insanlardır. Azərbaycan xalqının milli bayramı - Respublika Günü münasibətilə əfv edildiyimə görə Prezident İlham Əliyevə minnətdaram”.
Azadlığa çıxan digər şəxslər və onları qarşılamağa gələn ailə üzvləri, yaxınları göstərdiyi humanistliyə, mərhəmətlik siyasətinə və Azərbaycan Xalq Cümhuriyyətinin 100 illiyi münasibətilə imzalanan əfv Sərəncamına görə dövlətimizin başçısı İlham Əliyevə minnətdarlıqlarını ifadə ediblər.
Cəzadan azad olunan şəxslər cəmiyyətə qovuşaraq müstəqil dövlətimizin inkişafı yolunda fəaliyyət göstərəcəklərini bildiriblər.
Xatırladaq ki, azadlıqdan məhrumetmə cəzasına məhkum olunmuş 607 nəfər Sərəncama əsasən cəzasının çəkilməmiş hissəsindən azad edilib. Bundan başqa, azadlıqdan məhrumetmə cəzasına məhkum edilmiş və cəzasının çəkilməsi təxirə salınmış bir nəfər, həmçinin azadlıqdan məhrumetmə cəzasına şərti olaraq məhkum edilmiş 9 nəfər cəzadan azad edilib. Eləcə də islah işləri cəzasına məhkum edilmiş 6 nəfər cəzanın çəkilməmiş hissəsindən, 11 nəfər isə cərimə cəzasından azad olunub. Əfv olunan şəxslər arasında xarici ölkələrin 39 vətəndaşı da var.

Paylaş:

Baxılıb: 601 dəfə