Bakı Dövlət Universiteti ilə Milli Oftalmologiya Mərkəzi arasında anlaşma memorandumu imzalanıb

Bakı:

22 °C

60 %

5 m/s

Əlaqə

AZ RU EN

Ana səhifə / Sosial / Bakı Dövlət Universiteti ilə Milli Oftalmologiya Mərkəzi arasında anlaşma memorandumu imzalanıb

Bakı Dövlət Universiteti ilə Milli Oftalmologiya Mərkəzi arasında anlaşma memorandumu imzalanıb

15.03.2018 [10:10]

Martın 14-də Bakı Dövlət Universitetinin rektoru, akademik Abel Məhərrəmovla akademik Zərifə Əliyeva adına Milli Oftalmologiya Mərkəzinin direktoru, AMEA-nın müxbir üzvü Elmar Qasımovun rəhbərlik etdiyi nümayəndə heyəti ilə görüş olub.
AZƏRTAC xəbər verir ki, universitetdə keçirilən görüş zamanı gələn il yüz illik yubileyini qeyd edəcək qocaman ali təhsil ocağının ilk iki fakültəsindən birinin tibb fakültəsi, 1922-ci ildə ali təhsil haqqında verilən ilk diplomun da məhz tibb ixtisası üzrə olduğu nəzərə çatdırılıb. Rektor əməkdaşlıq nəticəsində tələbə, magistrant və doktorantlarda tədqiqatçılıq və peşə fəaliyyəti üçün zəruri olan praktiki bilik, bacarıq və vərdişlərin formalaşdırılması, oftalmologiya sahəsində elmi yenilik və innovasiyaların tədris prosesinə tətbiqi, müvafiq ixtisas sahələri üzrə aparıcı mütəxəssislərin tədris prosesinə və elmi fəaliyyətə cəlb edilməsi və birgə elmi tədqiqatların aparılmasının əhəmiyyətindən danışıb.
Oftalmologiya Mərkəzinin direktoru, AMEA-nın müxbir üzvü Elmar Qasımov təmsil etdiyi mərkəzin fəaliyyətindən ətraflı danışıb, universitetlə əməkdaşlıq əlaqələrini genişləndirməyin təqdirəlayiq hal olduğunu bildirib.
Görüş zamanı Bakı Dövlət Universiteti və Milli Oftalmologiya Mərkəzi arasında anlaşma memorandumu imzalanıb. Memorandumda müvafiq elm sahələrində qarşılıqlı maraq doğuran və innovasiya istiqamətlərində elmi-tədqiqat və kadr hazırlığı sahəsində birgə iştirak, elm və səhiyyə müəssisələrinin maddi-texniki bazasından və kadr potensialından birgə istifadə, mərkəzin şöbə və laboratoriyalarında ixtisasartırma, elmi-tədqiqat, istehsalat təcrübələri və staj keçilməsinin təşkili məsələləri öz əksini tapıb.
Həmin gün Milli Oftalmologiya Mərkəzinin Səyyar Klinikası Bakı Dövlət Universitetində humanitar aksiya keçirib. Səyyar Klinikanın həkim və tibb işçiləri 310 nəfər tələbə və müəllimi oftalmoloji müayinə ediblər. Müayinə olunanların 70 faizə qədərində refraksiya patologiyaları, qalan hissəsində isə quru göz sindromu, astiqmatizm və yaşla əlaqədar görmə zəiflikləri aşkar olunub.
Mərkəzin elmi-təşkilat bölməsinin rəhbəri, tibb üzrə fəlsəfə doktoru Yazgül Abdiyeva deyib: “Müayinələr nəticəsində ən çox refraksiya patologiyaları olduğu aşkar edilib. Həmin patologiya ali və orta məktəb tələbələri arasında çox geniş yayılıb. İlk növbədə, ildə bir dəfə oftalmoloji müayinədən keçərək onu aşkar etmək və erkən müalicələrə başlamaqla qarşısını almaq olar. Kompüter, planşet və smartfonlardan istifadə məhdudlaşdırılmalıdır, təəssüf ki, indi gənc və yeniyetmələr ondan ifrat dərəcədə istifadə edirlər. Bu, onların görmə qabiliyyəti ilə yanaşı həm də psixoloji vəziyyətlərinə də mənfi təsir göstərir. Kompüter arxasında işləyərkən və televizora baxarkən məsafə düzgün seçilməli, ekranın işıqlanma səviyyəsi nəzərə alınmalıdır. Uzun müddət bir nöqtəyə baxılması isə tez-tez qırpmaya və quru göz sindromu əmələ gəlməsinə səbəb olur. Həmin sindrom keratitə çevrilməmiş və digər fəsadlara səbəb olmamış qarşısı alınmalıdır”.

Paylaş:

Baxılıb: 714 dəfə