Fasiləsiz su təchizatı səviyyəsi Bakı üzrə 81,1 faizə yüksəlib

Bakı:

19 °C

72 %

6 m/s

Əlaqə

AZ RU EN

Ana səhifə / Sosial / Fasiləsiz su təchizatı səviyyəsi Bakı üzrə 81,1 faizə yüksəlib

Fasiləsiz su təchizatı səviyyəsi Bakı üzrə 81,1 faizə yüksəlib

28.10.2017 [00:10]

Fasiləsiz su təchizatı səviyyəsi Bakı üzrə 81,1 faizə yüksəlib.
“Azərsu” ASC-nin mətbuat xidmətindən AZƏRTAC-a bildirilib ki, bu barədə ASC-də 2017-ci ilin 9 ayının yekunlarına və qarşıda duran vəzifələrə həsr olunmuş iclasda deyilib.
“Azərsu” ASC-nin sədri Qorxmaz Hüseynov bildirib ki, 2017-ci ilin yanvar-sentyabr aylarında Azərbaycanda dinamik inkişaf təmin olunub, ölkəmiz bir sıra nüfuzlu beynəlxalq tədbirlərə və idman yarışlarına ev sahibliyi edib. Prezident İlham Əliyevin tapşırıqlarına uyğun olaraq 2017-ci ilin ötən dövründə sosial və infrastruktur layihələrin icrası uğurla davam etdirilib.
“Azərsu” ASC-nin sədri 2017-ci ilin yanvar-sentyabr aylarında içməli su təchizatı və kanalizasiya sektorunda mühüm hadisələrin baş verdiyini diqqətə çatdırıb. 2017-ci ilin ötən dövründə Gədəbəy şəhərində su və kanalizasiya, Saatlı şəhəri və Pirallahı qəsəbəsində isə içməli su layihələrinin açılış mərasimləri keçirilib. Ötən dövrdə Xırdalan şəhərində su təchizatı və kanalizasiya infrastrukturlarının yenidən qurulmasına, Gəncə və Şəki şəhərlərində layihənin növbəti mərhələsi üzrə işlərə, həmçinin Pirşağı tullantı sutəmizləyici qurğusunun tikintisinə başlanılıb. Əhalinin içməli su təminatının yaxşılaşdırılması məqsədilə 22 rayonun 170 yaşayış məntəqəsində layihələrin icrasına başlanılıb və 100-dən artıq kənddə işlər yekunlaşıb. Bakı şəhərinin yağış sularının yığılma təhlükəsi olan ərazilərində səth sularının kənarlaşdırılması üzrə 13 layihənin icrasına başlanılıb və bu sahədə işlər yekunlaşmaq üzrədir.
Hesabat dövründə Prezident İlham Əliyevin Mingəçevir, Salyan, Biləsuvar, Qax şəhərlərində, Binəqədi, Mehdiabad, Novxanı, Binə, Mərdəkan, Şağan, Şüvəlan, 28 May, Qobustan və Pirəkəşkül qəsəbələrində, eləcə də paytaxtın “Ağ şəhər” adlanan ərazisində layihələrin icrasının davam etdirilməsi ilə bağlı sərəncamlarına uyğun olaraq işlərə başlanılıb. Əkin sahələrinin suvarma suyu ilə təminatının yaxşılaşdırılması məqsədilə Zərdab rayonunda icra olunan layihə yekunlaşıb, Hacıqabul və Şamaxı rayonlarında isə layihənin icrası tamamlanmaq üzrədir.
Qeyd olunub ki, 2017-ci ilin yanvar-sentyabr aylarında “Azərsu” ASC tərəfindən istehlakçılara 191 milyon kubmetr su verilib. Hesabat dövründə 800 kilometrdən çox içməli su və kanalizasiya xətləri tikilib, 6 subartezian quyusu qazılıb. Görülmüş işlər nəticəsində 90 min nəfər ilk dəfə mərkəzləşdirilmiş qaydada içməli su ilə təmin edilib, 152 min nəfərin su təchizatı yaxşılaşdırılıb. Bununla da fasiləsiz su təchizatı səviyyəsi ölkə üzrə 66,3 faizə, Bakı şəhəri üzrə isə 81,1 faizə yüksəlib.
“Azərsu” ASC-nin sədri 9 ayda su təsərrüfatı sektorunda digər əlamətdar hadisələrin də baş verdiyini diqqətə çatdırıb. 2017-ci il martın 14-18-də I Bakı Beynəlxalq Su Həftəsi və Şollar-Bakı Su Qurğuları Kompleksinin 100 illik yubiley tədbirləri keçirilib. “Azərsu” ASC Beynəlxalq Su Resursları Assosiasiyasının üzvü seçilib və bu təşkilat 2021-ci ildə Dünya Su Konqresinin Bakı şəhərində keçirilməsi təklifini dəstəkləyib. Səhmdar Cəmiyyət Beynəlxalq Biznes Təşəbbüsləri Təşkilatının liderlik, keyfiyyət, innovasiya və mükəmməllik sahəsində Qızıl Mükafatına layiq görülüb.
Sonra “Azərsu” ASC-nin sədr müavini İlqar Tağıyev, İnformasiya və kommunikasiya texnologiyaları departamentinin rəisi Emil Əhmədov, Müştəri xidmətləri departamentinin rəisi Əbülfəz Kərimzadə, “Sukanal” Elmi Tədqiqat və Layihə İnstitutunun direktoru Çingiz Qurbanov hesabat məruzələri ilə çıxış edərək müvafiq sahələr üzrə 2017-ci ilin yanvar-sentyabr ayları ərzində görülmüş işlər və həyata keçirilmiş tədbirlər barədə ətraflı məlumat veriblər.
“Azərsu” ASC-nin sədri Qorxmaz Hüseynov iclasa yekun vuraraq bildirib ki, ilin sonuna qədər Bakı şəhəri və Abşeron yarımadasının 10 yaşayış məntəqəsində və regionlarda 170 kənddə icra olunan layihələr yekunlaşdırılacaq. Həmçinin ilin sonunadək paytaxtın səth sularının yığılma təhlükəsi olan ərazilərində icra olunan layihələrin, Padarçöl ərazisində suvarma infrastrukturunun yaradılması işlərinin başa çatdırılması nəzərdə tutulur.
Səhmdar Cəmiyyətin sədri iqtisadi səmərəliliyin artırılması, abunəçilərlə işin təkmilləşdirilməsi, müştəri informasiya sisteminin əhatə dairəsinin genişləndirilməsi, sayğaclaşma işlərinin sürətləndirilməsi və digər məsələlərlə bağlı tapşırıqlar verib.

Paylaş:

Baxılıb: 447 dəfə