Kamran Əliyev: Biz İqtisadi Əməkdaşlıq və İnkişaf Təşkilatı ilə əlaqələrdən qarşılıqlı şəkildə faydalanırıq

Bakı:

27 °C

48 %

1 m/s

AZ RU EN

Ana səhifə / Sosial / Kamran Əliyev: Biz İqtisadi Əməkdaşlıq və İnkişaf Təşkilatı ilə əlaqələrdən qarşılıqlı şəkildə faydalanırıq

Kamran Əliyev: Biz İqtisadi Əməkdaşlıq və İnkişaf Təşkilatı ilə əlaqələrdən qarşılıqlı şəkildə faydalanırıq

26.10.2017 [10:22]

Azərbaycan Prezidenti İlham Əliyevin siyasi iradəsinə uyğun olaraq, ölkəmiz 2003-cü ildən başlayaraq, korrupsiyaya qarşı mübarizə sahəsində bütün beynəlxalq təşəbbüslərə qoşulub. Azərbaycan Respublikası həmin ildən etibarən İqtisadi Əməkdaşlıq və İnkişaf Təşkilatının (OECD) Antikorrupsiya Şəbəkəsi ilə də səmərəli əməkdaşlıq edir. İqtisadiyyat sahəsində çox vacib qurum olan OECD, eyni zamanda, bu təşkilatın sıralarında birləşən ölkələrdə həm dövlət qurumlarında, həm də özəl sektorda şəffaflığın təmin edilməsi sahəsində çox mühüm iş aparır. Ona görə də Azərbaycan bu qurumla əməkdaşlıqdan çox faydalanır və bu fayda qarşılıqlıdır.
AZƏRTAC xəbər verir ki, bu sözləri Azərbaycan Respublikası baş prokurorunun müavini - Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev oktyabrın 25-də jurnalistlərə müsahibəsində deyib.
Kamran Əliyev bildirib ki, Azərbaycan İqtisadi Əməkdaşlıq və İnkişaf Təşkilatına öz töhfəsini verir. Belə ki, bu dövr ərzində Azərbaycan bu təşkilatda üç monitorinq mərhələsini uğurla başa vurub. Yəni, ölkəmiz antikorrupsiya qanunvericiliyinin vəziyyəti, tətbiqi və icrası ilə bağlı üç monitorinq dəyərləndirməsindən uğurla keçib. Hazırda Azərbaycan IV monitorinq raundu üzrə dəyərləndirmə prosesindədir. Eyni zamanda, Baş Prokuror yanında Korrupsiyaya Qarşı Mübarizə Baş İdarəsinin altı əməkdaşı region ölkələrinin antikorrupsiya qanunvericiliyinin tətbiqi ilə bağlı müxtəlif dəyərləndirmələrə cəlb edilib.
Baş Prokuror yanında Korrupsiyaya Qarşı Mübarizə Baş İdarəsinin inzibati binasında keçirilən “Korrupsiya cinayətlərinin istintaqı və cinayət təqibi: cinayət yolu ilə əldə edilmiş gəlirlərin müsadirəsi, əmlakın bərpası və prokurorların müstəqilliyi” mövzusunda beynəlxalq tədbirdə regionda yerləşən 20-dən çox ölkənin prokurorluq və korrupsiyaya qarşı mübarizə sahəsində ixtisaslaşmış qurumlarının 70-ə yaxın təcrübəli əməkdaşının iştirak etdiyini vurğulayan Kamran Əliyev bildirib ki, bu görüş ölkələrimizin qanunvericiliyini, hüquq ənənələrini öyrənmək üçün mühüm imkan yaradır.
“Bu görüşlər çərçivəsində regionumuzda yerləşən ölkələrin hüquq mühafizə orqanlarının məsul əməkdaşları ilə ikitərəfli görüşlərimiz də nəzərdə tutulub. Həmin görüşlər zamanı konkret olaraq, Baş İdarə tərəfindən istintaq olunan cinayət işləri ilə əlaqədar göndərilmiş hüquqi yardımların bu və ya digər ölkələrdə icrası vəziyyəti ilə maraqlanmaq və onları daha da sürətləndirmək üçün imkanlar əldə edəcəyik”, - deyə Korrupsiyaya Qarşı Mübarizə Baş İdarəsinin rəisi vurğulayıb.

Paylaş:

Baxılıb: 531 dəfə