Bakıda Dağlıq Qarabağ münaqişəsi ilə bağlı beynəlxalq elmi-praktik konfrans keçirilib

Bakı:

15 °C

94 %

0 m/s

Əlaqə

AZ RU EN

Ana səhifə / Sosial / Bakıda Dağlıq Qarabağ münaqişəsi ilə bağlı beynəlxalq elmi-praktik konfrans keçirilib

Bakıda Dağlıq Qarabağ münaqişəsi ilə bağlı beynəlxalq elmi-praktik konfrans keçirilib

15.03.2017 [10:04]

Martın 14-də Bakıda Qafqaz Tarix Mərkəzinin təşkilatçılığı ilə “Dağlıq Qarabağ münaqişəsi: mənşəyi, sülhməramlılıq və vətəndaş cəmiyyətinin rolu” adlı beynəlxalq elmi-praktik konfrans keçirilib.
AZƏRTAC xəbər verir ki, tədbirdə Azərbaycan, Gürcüstan, Rusiya, Türkiyə, Qazaxıstan, Kanada, Ukrayna, İsveç, Özbəkistan və Ermənistan alimləri, siyasətçiləri, ictimai xadimləri, tədqiqatçıları iştirak ediblər.
Prezident Administrasiyasının İctimai-siyasi məsələlər şöbəsinin siyasi araşdırmalar və analitik təhlil sektorunun müdiri Fuad Axundov Azərbaycan ərazisinin iyirmi faizinin işğal olunduğunu xatırladıb. Qeyd olunub ki, torpaqlarımızın işğaldan azad edilməsinin vaxtı çatıb. “İnternetdə yayılan informasiyalardan da görünür ki, ermənilər artıq ortaya rasional mövqe qoymağa başlayıblar. Bugünkü tədbirdə erməni fəalları da iştirak edirlər. Mən onlara xüsusi təşəkkürümü bildirirəm”, - deyə F.Axundov əlavə edib.
Rusiya prezidenti yanında İctimai Palatanın üzvü, “Qafqaz siyasəti” portalının baş redaktoru Maksim Şevçenko Dağlıq Qarabağ münaqişəsinin həllinə qonşu ölkələrin mühüm töhfə verə biləcəyini vurğulayıb.
Xocalı soyqırımına toxunan erməni publisist və ictimai xadim Vahe Avetyan bunun öz xalqı üçün rüsvayçı bir fakt olduğunu bildirərək deyib: “Mən 2016-cı ildə Bakıda olarkən Xocalı soyqırımı qurbanlarının xatirəsini yad etdim. Yəqin ki, bu, Ermənistanda birmənalı qarşılanmadı. Bir çox erməni ictimai xadimləri və sadə insanlar məni dəstəkləyirlər. Lakin ermənilərin öz fikirlərini açıq ifadə etmələrinə imkan verilmir. Ermənistanda bir sözə görə adamı şikəst edə və öldürə bilərlər. İyirmi ildən çox sürən münaqişədən sonra ilk dəfə Xocalı qurbanlarının xatirəsinə həsr olunmuş abidəni ziyarət etdik. Sağlam düşüncəli ermənilər çalışırlar ki, Ermənistan prezidenti Serj Sarkisyanın yaratdığı qatil erməni stereotipi aradan qalxsın. Mən tarixçi deyiləm, yazıçıyam. Xalqların düşmənçiliyini bir kənara qoyub, yeni bir səhifə açmaq lazımdır”, - deyə V.Avetyan bildirib.
Əslən Dağlıq Qarabağdan olan erməni əsilli Ukrayna vətəndaşı tədqiqatçı Artur Ağacanov Dağlıq Qarabağ torpağının əsrlərboyu müxtəlif müharibə və münaqişələr meydanı olduğunu söyləyib. Qarabağın qədim Qafqaz Albaniyasının bir hissəsi olduğunu və özündə bu qədim dövlətin mədəniyyətini, tarixini, memarlığını yaşatdığını qeyd edən A.Ağacanov deyib: “Hazırda bu qədim irs ya məhv edilir, ya da erməni mədəniyyəti və tarixi kimi qələmə verilir. Artıq iki əsrdir ki, Türkiyə, İran və Yaxın Şərqdən köçürülmüş ermənilər qədim Qarabağ torpaqlarını özününküləşdirirlər. Eçmiədzin kilsəsinin fitvası ilə qədim Alban Avtokefal Kilsəsi ləğv edilib. Gandzasar, Amaras və Alban kilsəsinin digər patriarx taxtlarının ləğv edilməsi nəticəsində Qarabağda, eləcə də Cənubi Qafqazda olan çoxsaylı xalqlara məxsus mədəniyyət irsi Eçmiədzin kilsəsinin əlinə keçib. Bu xalqların bir hissəsi - qıpçaq türkləri, udin, aysor, tat, kürd və digərləri zor gücünə erməniləşdirilib. Qarabağın Azərbaycanın ayrılmaz hissəsi və qədim Qafqaz Albaniyasının tarixinin, xristian mədəniyyətinin bir hissəsi olduğunu dilə gətirən hər kəs həyati təhlükə ilə üzləşir. Lakin biz həqiqəti deməkdən çəkinməməli və mübarizə aparmalıyıq. Azərbaycanda Alban kilsəsinin və məbədlərdə ibadətin bərpası xəbərini sevinclə qarşıladıq. Yaxın gələcəkdə biz bu məqsədlə Qarabağın taleyi və tarixinə biganə olmayan insanların da qatıla biləcəyi bir təşkilat yaradacağıq”.
Tədbir digər çıxışlarla davam edib.

Paylaş:

Baxılıb: 726 dəfə