Bir qrup veteran cəbhə bölgəsinə səfər edib

Bakı:

22 °C

74 %

11 m/s

Əlaqə

AZ RU EN

Ana səhifə / Sosial / Bir qrup veteran cəbhə bölgəsinə səfər edib

Bir qrup veteran cəbhə bölgəsinə səfər edib

21.05.2016 [10:34]

Müharibə, Əmək və Silahlı Qüvvələr Veteranları Təşkilatının sədri, istefada olan general-mayor Dadaş Rzayev və müavini, ehtiyatda olan polkovnik, siyasi elmlər üzrə fəlsəfə doktoru Cəlil Xəlilov cəbhə bölgəsinə səfər edərək şəxsi heyətlə görüşüblər.
Bu barədə AZƏRTAC-a Müdafiə Nazirliyinin mətbuat xidmətindən məlumat verilib.
Müdafiə Nazirliyinin zabiti, polkovnik Abdulla Qurbani görüşlər zamanı qeyd edib ki, nazirliyin qeyri-hökumət, xüsusilə də veteran təşkilatları ilə əlaqələri gündən-günə genişlənir. Birgə keçirilən tədbirlər əsgər və zabitlərin, xüsusi təyinatlı hərbi təhsil müəssisələri kursantlarının mənəvi-psixoloji hazırlığının, döyüş ruhunun və vətənpərvərlik hissinin daha da yüksəldilməsində mühüm əhəmiyyət kəsb edir.
İstefada olan general-mayor Dadaş Rzayev cari ilin aprelində dördgünlük döyüşlər zamanı hərbçilərimizin erməni silahlı təxribatlarının qarşısını alarkən göstərdikləri mərdlik və igidliklərdən danışıb, bir çox əhəmiyyətli yüksəkliklərin azad edilməsindən xalqımız kimi veteranların da qürur duyduğunu və fərəh hissi keçirdiklərini bildirib.
O, fəxrlə əsgər və zabitlərin nəzərinə çatdırıb ki, mayın 9-da faşizm üzərində Qələbənin 71-ci ildönümünə həsr olunan anma mərasimində, veteranlarla görüşdə də dövlətimizin başçısı, Ali Baş Komandan İlham Əliyev Ordumuzun aprel ayında qələbəsini xüsusilə qeyd edib. İstefada olan general bütün xalqımız kimi veteranlarımızın da yaşlarının ixtiyar çağlarında Qarabağ uğrunda döyüşlərə atılmağa hazır olduqlarını diqqətə çatdırıb. D.Rzayev gənclərin vətənpərvərlik tərbiyəsində, onların orduya hazırlanmasında bundan sonra da səylərini əsirgəməyəcəklərini vurğulayıb.
Respublika Veteranlar Təşkilatının sədri əminliklə bildirib ki, işğal altındakı ərazilərimiz müdrik və qətiyyətli sərkərdəmiz İlham Əliyevin rəhbərliyi ilə istər sülh yolu, istərsə də hərbi yol ilə tezliklə azad ediləcək və əzəli torpaqlarımızda üçrəngli bayrağımız dalğalanacaq.
Ehtiyatda olan polkovnik C.Xəlilov çıxış edərək Veteranlar Şurasının Rəyasət Heyətinin bu günlərdə geniş iclas keçirdiyini və aprel döyüşlərində xüsusilə fərqlənən bir qrup hərbi qulluqçunun mükafatlandırılması haqqında qərar qəbul etdiyini bildirib.
Cəbhə bölgəsindəki bütün hərbi hissələri təmsil edən, döyüşlərdə şəxsi şücaət və rəşadət nümunələri göstərən bir qrup hərbi qulluqçu təşkilatın təsis etdiyi və ilk nümunələrinin dövlətimizin başçısına təqdim olunduğu “General Səməd bəy Mehmandarov”, “General Əliağa Şıxlinski”, “General Cəmşid Naxçıvanski”, “General Həzi Aslanov” yubiley medalları, fəxri fərman və qiymətli hədiyyələrlə mükafatlandırılıb.
Veteranlar Şurasına bu tədbirə görə minnətdarlığını bildirən birlik komandiri, general-mayor Hikmət Həsənov bu diqqət və qayğıya cavab olaraq döyüşçülərimizin bundan sonra da Vətən torpaqlarının keşiyində ayıq-sayıq dayanacaqlarını, düşmənin istənilən təxribatlarının qarşısını mərdliklə alacaqlarını xüsusi qeyd edib.
Sonra zabitlərlə keçirilən müşavirədə veteranlar döyüş təcrübələri barədə onlara dəyərli məsləhətlərini veriblər.
Sonda qonaqlar əsgərlər üçün yaradılan xidmət şəraiti ilə tanış olublar. Veteranlar burada yaradılan şəraitin yüksək səviyyədə olduğunu bildiriblər.

Paylaş:

Baxılıb: 842 dəfə