Ulu öndər Heydər Əliyev Vətən və xalq qarşısında misilsiz xidmətlər göstərib

Bakı:

30 °C

49 %

4 m/s

Əlaqə

AZ RU EN

Ana səhifə / Sosial / Ulu öndər Heydər Əliyev Vətən və xalq qarşısında misilsiz xidmətlər göstərib

Ulu öndər Heydər Əliyev Vətən və xalq qarşısında misilsiz xidmətlər göstərib

06.05.2016 [10:16]

Mayın 5-də Nəsimi rayon İcra Hakimiyyətinin təşəbbüsü ilə Azərbaycan xalqının Ümummilli lideri Heydər Əliyevin xatirəsinə həsr edilən tədbir keçirilib.
AZƏRTAC xəbər verir ki, dövlət himninin səsləndirilməsi ilə başlayan tədbirdə çıxış edən rayon İcra Hakimiyyətinin başçısı Asif Əsgərov Ümummilli lider Heydər Əliyevin Vətən və xalq qarşısındakı misilsiz tarixi xidmətlərindən danışıb. Bildirib ki, Ümummilli lideri mənsub olduğu xalqa bəxş edən günün özü də ümummilli önəm daşıyır. Milli dövlətçiliyin inkişafını və qüdrətlənməsini təmin edən tarixi şəxsiyyətin həyatı və fəaliyyəti bu tarixin özü ilə eyniləşir, bu dövrün başlıca mahiyyətini təşkil edir. Heydər Əliyev çağdaş Azərbaycanın tarixinin yönünü və məzmununu müəyyən etməklə zamanın fövqünə yüksəlib, əbədiyyət qazanıb. O, xalqının taleyində dönüş yaradaraq ölkəsini tənəzzüldən tərəqqiyə qovuşdurub.
“Ümummilli lider Heydər Əliyevin Azərbaycan tarixindəki yeri nə qədər müstəsna və önəmlidirsə, Onun dünyaya göz açdığı gün də Azərbaycan xalqı üçün bir o qədər dəyərli və əlamətdardır. Ulu öndərin Azərbaycan xalqına göstərdiyi xidmətlər o qədər böyük və əhəmiyyətlidir ki, onun qiyməti və çəkisi zaman keçdikcə daha aydın və dəqiq görünür”, - deyə A.Əsgərov vurğulayıb.
Qeyd edilib ki, müstəqil Azərbaycan Respublikasının bu gününün və gələcəyinin inkişafını təmin edən strategiyanın müəllifi məhz Ulu öndər Heydər Əliyevdir. Ümummilli liderin bu siyasəti ölkəmizin gələcək tərəqqisinin təminatı baxımından zəruridir. Heydər Əliyev siyasəti tarazlı siyasətdir, cəmiyyətin bütün təbəqələrinin mənafelərini ifadə edir, cəmiyyətdə ahəngdarlıq yaradır, vətəndaşların hüquq və azadlıqlarını, onların milli dövlətçilik mənafelərini, açıq cəmiyyətin ali dəyərlərini müdafiə edir. Ən önəmlisi isə odur ki, Heydər Əliyev siyasəti bu günlə yekunlaşmır, bitmir, tükənmir. Heydər Əliyevin Azərbaycan xalqı qarşısında ən böyük xidmətlərindən biri də Öz siyasi varisi İlham Əliyevi ərsəyə çatdıraraq, müstəqil dövlətimizin ardıcıl inkişafı üçün zəmin yaratmasıdır. Azərbaycan Respublikasının Prezidenti İlham Əliyev ilk gündən Heydər Əliyev siyasi kursunu qəti və prinsipial mövqe ilə davam etdirməklə xalqın böyük ehtiramını qazanıb. Bu prosesdə - demokratik dövlət quruculuğu istiqamətində Ümummilli liderin miras qoyduğu irsin öyrənilməsi, təbliği və tətbiqində Heydər Əliyev Fondunun prezidenti, UNESCO-nun və ISESCO-nun xoşməramlı səfiri Mehriban Əliyevanın çoxşaxəli xidmətləri də müstəsna əhəmiyyət kəsb edir.
“Bu gün biz qüdrətli və müstəqil dövlətin övladları olaraq, məhz belə dahi insanların fədakar fəaliyyəti sayəsində firavan respublikada, ictimai-siyasi sabitlik şəraitində, sosial rifahın təmin olunduğu, inkişaf edən və güclü bir Azərbaycanda yaşayırıq. Bu güclü Azərbaycanı bizə miras qoyan xalqın Ümummilli lideri Heydər Əliyev, sözün bütün mənalarında, şərəfli ömür yaşadı. Lakin Onun ideyalarının, qurduqlarının və yaratdıqlarının ömrü daha böyükdür”, - deyə icra başçısı vurğulayıb.
Tədbir konsert proqramı ilə davam etdirilib.

Paylaş:

Baxılıb: 940 dəfə