BANM-də tələbələrin dördüncü elmi-texniki konfransı keçirilir

Bakı:

28 °C

49 %

12 m/s

Əlaqə

AZ RU EN

Ana səhifə / Sosial / BANM-də tələbələrin dördüncü elmi-texniki konfransı keçirilir

BANM-də tələbələrin dördüncü elmi-texniki konfransı keçirilir

22.04.2016 [10:14]

Bakı Ali Neft Məktəbində (BANM) tələbələrin dördüncü elmi-texniki konfransı keçirilir.
Konfrans Ümummilli lider Heydər Əliyevin anadan olmasının 93-cü ildönümünə həsr edilib.
BANM-dən AZƏRTAC-a bildiriblər ki, əvvəlcə tədbir iştirakçıları Ulu öndər Heydər Əliyevin bu ali məktəbin foyesindəki büstü önünə gül dəstələri düzüb, xatirəsini ehtiramla yad ediblər.
Tədbirdə BANM-in rektoru Elmar Qasımov vurğulayıb ki, konfransın Ümummilli lider Heydər Əliyevin anadan olmasının 93-cü ildönümünə həsr edilməsi bu dahi insanın şəxsiyyətinə böyük hörmət və ehtiramın ifadəsidir. Elmi-texniki konfransların təşkilinin məqsədi Prezident İlham Əliyevin rəhbərliyi ilə uğurla həyata keçirilən neft strategiyasının banisi, Ulu öndər Heydər Əliyevin şəxsiyyətinə və səmərəli fəaliyyətinə hörmət hisslərini nümayiş etdirməkdir. Eyni zamanda, məqsəd tələbələrə elmi araşdırmalar aparmaq, nəticələri təqdim etmək bacarıqlarını aşılamaq və onların arasında informasiya mübadiləsini təmin etməkdir. Tələbələri elmi fəaliyyətə cəlb etmək məqsədilə 2016-cı ildən BANM-də “İlin gənc tədqiqatçısı” müsabiqəsinin keçirildiyini deyən rektor ən fəal iştirakçıların gələcəkdə təhsillərini magistratura və doktorantura səviyyələrində davam etdirəcəklərinə əminliyini bildirib.
Azərbaycan Milli Elmlər Akademiyası Nizami adına Ədəbiyyat İnstitutunun direktoru, akademik İsa Həbibbəyli tələbələrin peşəkar kadr kimi yetişmələrində belə tədbirlərin əhəmiyyətini qeyd edib. Konfransda beynəlxalq şirkətlərin nümayəndələrinin iştirakını nəzərə çatdıran alim bu tədbirin tələbələrə gələcək tərəfdaşları ola biləcək şirkətlərlə ünsiyyət qurmaq, peşəkar vərdişlərə yiyələnmək baxımından əlverişli imkan yaratdığını bildirib.
Digər çıxış edənlər də konfransın əhəmiyyətini qeyd edib, BANM-də yüksək ixtisaslı kadrların hazırlanması istiqamətində mühüm işlərin görüldüyünü vurğulayıblar.
Qeyd olunub ki, konfrans işini dörd bölmədə davam etdirəcək. “Neft-qaz mühəndisliyi”, “Kimya mühəndisliyi”, “Fizika və riyaziyyat” və “Proseslərin avtomatlaşdırılması mühəndisliyi” bölmələri üzrə iclaslarda ümumilikdə 127 məruzə dinləniləcək.
Münsiflər heyətinin üzvləri ən maraqlı məruzələri təqdim edən iştirakçıları müəyyənləşdirəcək. Konfransın yekun iclasında qaliblərə BANM tərəfindən sertifikat və hədiyyələr, digər iştirakçılara isə həvəsləndirici mükafatlar təqdim olunacaq.
Konfrans aprelin 22-dək davam edəcək.

Paylaş:

Baxılıb: 909 dəfə