Astarada Dövlət Bayrağı Günü münasibətilə ümumrayon tədbiri keçirilib

Bakı:

22 °C

53 %

4 m/s

Əlaqə

AZ RU EN

Ana səhifə / Sosial / Astarada Dövlət Bayrağı Günü münasibətilə ümumrayon tədbiri keçirilib

Astarada Dövlət Bayrağı Günü münasibətilə ümumrayon tədbiri keçirilib

07.11.2015 [10:15]

Dünən Astara rayonundakı Dövlət Bayrağı Meydanında 9 noyabr -Dövlət Bayrağı Gününə həsr olunmuş ümumrayon tədbiri keçirilib. Tədbiri rayon İcra hakimiyyətinin məsul işçisi Mərasim Hacıyev açaraq artıq bir neçə ildir ki, ölkəmizdə 9 noyabr tarixinin Dövlət Bayrağı Günü kimi qeyd olunduğunu bildirib.
Natiq qeyd edib ki, Azərbaycan Respublikasının Dövlət bayrağı Azərbaycan dövlətinin suverenliyinin rəmzidir. Bu bayraq 1918-ci il noyabrın 9-da Azərbaycan Xalq Cümhuriyyəti Hökumətinin iclasında qəbul edilib və 1920-ci ilin aprel ayınadək dövlət statusuna malik olub. 1990-cı il noyabrın 17-də Naxçıvan Muxtar Respublikası Ali Məclisinin Sədri, xalqımızın Ümummilli lideri Heydər Əliyevin təşəbbüsü və rəhbərliyi ilə keçirilən sessiyada üçrəngli bayrağımız Naxçıvan Muxtar Respublikasının dövlət bayrağı olaraq təsdiq edilib.
1991-ci il fevralın 5-də Azərbaycan Respublikasının Ali Soveti “Azərbaycan Respublikasının Dövlət bayrağı haqqında” Qanun qəbul edərək onu Dövlət Bayrağı elan edib.
Qeyd olunub ki, Azərbaycan Respublikasının Prezidenti İlham Əliyevin “Azərbaycan Respublikasının paytaxtı Bakı şəhərində Dövlət Bayrağı Meydanının yaradılması haqqında” 2007-ci il 17 noyabr tarixli Sərəncamı Dövlət bayrağının dövlət rəmzləri sırasında xüsusi yerini müəyyən edir. 2007-ci il dekabrın 30-da Bayıl qəsəbəsində Prezident İlham Əliyev tərəfindən Dövlət Bayrağı Meydanının təməli qoyulub, 2010-cu il sentyabrın 1-də təntənəli açılışı olub.
Dövlət Bayrağı Meydanında ucaldılan bayrağın eni 35 metr, uzunluğu 70 metr, hündürlüyü isə 162 metrdir. Azərbaycanın dövlət bayrağı dirəyi dünyada ən hündür bayraq dirəyi kimi Ginnesin rekordlar kitabına salınıb. Meydanda qurulmuş Azərbaycan Respublikasının Gerbi, Dövlət himninin mətni və Dövlət Bayrağı Muzeyi Bayraq Meydanının görkəminin möhtəşəmliyini daha da artırıb, onu daha da baxımlı edib.
Diqqətə çatdırılıb ki, rayonda da iki yerdə - Astara şəhərində və Kijəbə qəsəbəsində Azərbaycanın Dövlət bayrağı ucaldılıb.
Tədbirdə həmçinin rayon İcra Hakimiyyəti başçısının müavini, sosial-iqtisadi inkişafın təhlili və proqnozlaşdırılması şöbəsinin müdiri İlqar Malıyev, hüquq şöbəsinin müdiri Bəsti Əliyeva, rayon mərkəzi kitabxanasının müdiri, YAP Astara rayon təşkilatı Gənclər Birliyinin sədri Tural Eyvazov, Astara Pedaqoji Kollecinin dil-ədəbiyyat müəllimi Vüsalə Cavadova və başqaları çıxış ediblər.

Paylaş:

Baxılıb: 971 dəfə