“Bakı-2015” I Avropa Oyunları ilə bağlı fərdi jurnalist yazıları müsabiqəsinin qalibləri mükafatlandırılıb

Bakı:

12 °C

76 %

8 m/s

AZ RU EN

Ana səhifə / Sosial / “Bakı-2015” I Avropa Oyunları ilə bağlı fərdi jurnalist yazıları müsabiqəsinin qalibləri mükafatlandırılıb

“Bakı-2015” I Avropa Oyunları ilə bağlı fərdi jurnalist yazıları müsabiqəsinin qalibləri mükafatlandırılıb

25.06.2015 [09:44]

İyunun 24-də Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) və Milli Olimpiya Komitəsinin (MOK) birgə elan etdikləri “Birinci Avropa Oyunlarının Bakıda keçirilməsinin ölkəmiz üçün əhəmiyyəti” mövzusunda fərdi jurnalist yazıları müsabiqəsinin nəticələri açıqlanıb və qaliblərin mükafatlandırılması mərasimi keçirilib.
AZƏRTAC xəbər verir ki, MOK-un inzibati binasında təşkil olunan tədbirdə 40-dək aparıcı KİV-in rəhbərləri, idman ictimaiyyətinin nümayəndələri, habelə qalib jurnalistlər iştirak ediblər.
Tədbirdə əvvəlcə Azərbaycan idmançılarının birinci Avropa Oyunlarında əldə etdikləri nailiyyətlərdən söhbət açılıb. Eyni zamanda, bu Oyunların mahiyyətinin ictimaiyyətə dolğun şəkildə çatdırılması baxımından Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun və Milli Olimpiya Komitəsinin birgə keçirdiyi müsabiqənin əhəmiyyəti qeyd olunub.
Çıxış edən Fondun icraçı direktoru Vüqar Səfərli Azərbaycanın bu günlərdə böyük bayram sevinci yaşadığını, idmançılarımızın qazandıqları parlaq qələbələrin hər bir azərbaycanlı üçün qürurverici olduğunu deyib. Birinci Avropa Oyunlarının yüksək səviyyədə təşkil edildiyini vurğulayan Vüqar Səfərli bu mötəbər idman tədbirinin yerli və beynəlxalq ictimaiyyətə dolğun şəkildə çatdırılması baxımından kütləvi informasiya vasitələrinin üzərinə mühüm vəzifələrin düşdüyünü vurğulayıb.
İcraçı direktor, həmçinin, bildirib ki, müsabiqənin məqsədi ölkəmiz üçün müstəsna əhəmiyyət kəsb edən birinci Avropa Oyunlarının əsl mahiyyətinin ölkə ictimaiyyətinə çatdırılması, bununla bağlı jurnalistlərin yaradıcı əməyinin stimullaşdırılması, onların sosial vəziyyətlərinin yaxşılaşdırılması olub.
Vüqar Səfərli aprelin 8-dən mayın 15-dək davam edən müsabiqəyə 34 KİV-dən 52 yazının təqdim edildiyini, yazıların üç ekspert tərəfindən qiymətləndirildiyini diqqətə çatdırıb. O, müsabiqənin yekun nəticələrinə görə 6 nəfərin əsas, 10 nəfərin həvəsləndirici mükafata layiq görüldüyünü, ümumilikdə 16 nəfərin mükafatlandırılması barədə qərar qəbul olunduğunu qeyd edib.
Müsabiqənin şərtlərinə əsasən, birinci yerin qalibinə 700, ikinci yerin qaliblərinə 500, üçüncü yerin qaliblərinə 300 manat, həvəsləndirici yerlər üçün 200 manat məbləğində mükafatın veriləcəyi bildirilib.
MOK-un baş katibi, Milli Məclisin deputatı Ağacan Abiyev Avropa Oyunları ilə bağlı operativ məlumatların hazırlanması və yayılmasında Azərbaycan jurnalistlərinin zəhmətini yüksək dəyərləndirərək onlara təşəkkürünü bildirib. Müsabiqənin əhəmiyyətinə toxunan Ağacan Abiyev bunun ilk Avropa Oyunlarına sanballı töhfə olduğunu qeyd edib.
Gənclər və idman nazirinin müavini İsmayıl İsmayılov ilk Avropa Oyunlarının Azərbaycan üçün böyük əhəmiyyətə malik idman hadisəsi olduğunu vurğulamaqla yanaşı, ölkəmizin təşkilatçılığının beynəlxalq miqyasda rəğbətlə qarşılandığını vurğulayıb. Müsabiqənin qaliblərini təbrik edən İsmayıl İsmayılov Fondun uğurlu layihələri sayəsində medianın MOK ilə əlaqələrinin gələcəkdə daha da genişlənəcəyinə əminliyini ifadə edib.
Mətbuat Şurasının sədri Əflatun Amaşov Azərbaycan idmançılarının uğurlu çıxışlarının gənclərin idmana marağının daha da artırılması, idmanın kütləviləşməsi, insanlarda vətənpərvərlik hisslərinin gücləndirilməsi baxımından əhəmiyyətini diqqətə çatdırıb.
Çıxışlardan sonra müsabiqənin qaliblərinə diplomlar, pul mükafatları və MOK-un xüsusi hədiyyələri təqdim edilib.

Paylaş:

Baxılıb: 851 dəfə