Azərbaycan Dillər Universitetində dünyanın 20-dən çox aparıcı dili tədris olunur

Bakı:

24 °C

62 %

1 m/s

Əlaqə

AZ RU EN

Ana səhifə / Sosial / Azərbaycan Dillər Universitetində dünyanın 20-dən çox aparıcı dili tədris olunur

Azərbaycan Dillər Universitetində dünyanın 20-dən çox aparıcı dili tədris olunur

16.09.2014 [09:38]

Sentyabrın 15-də Azərbaycan Dillər Universitetində (ADU) birinci kurs tələbələri ilə görüş keçirilib.
ADU-nun ictimaiyyətlə əlaqələr departamentindən AzərTAc-a bildiriblər ki, “Bilik Günü”nə həsr olunan görüşdə ADU-nun rektoru, Milli Məclisin deputatı, professor Səməd Seyidov yeni tədris ilinin başlanması münasibətilə müəllim və tələbələri təbrik edib.
ADU-ya bu il qəbul olunan tələbələrə uğurlar arzulayan rektor “Bilik Günü”nün ölkəmizdə şərəfli bir gün kimi qeyd olunduğunu vurğulayıb. S.Seyidov Ümummilli lider Heydər Əliyevin layiqli davamçısı olan Prezident İlham Əliyevin təhsilə, gənclərə xüsusi qayğısı nəticəsində Azərbaycan təhsil sisteminin ilbəil inkişaf etdiyini, ölkəmizin ali təhsil müəssisələrinin yüksək səviyyəli mütəxəssislər hazırladığını, azərbaycanlı gənclərin təhsillərini davam etdirmək üçün dünyanın müxtəlif ölkələrinə göndərildiyini söyləyib.
Rəhbərlik etdiyi ali təhsil ocağının tarixi, universitetdəki fakültə və mərkəzlər haqqında məlumat verən rektor bildirib ki, ADU-da dünyanın 20-dən çox aparıcı dili tədris olunur, müxtəlif mədəniyyət və dil mərkəzləri fəaliyyət göstərir. Bu gün 6000-dən çox istedadlı tələbənin təhsil aldığı Azərbaycan Dillər Universiteti mədəniyyət mərkəzinə çevrilmiş ali məktəbdir. 2014/2015-ci tədris ilində ADU-ya təxminən 1665 tələbə qəbul olunub. Onların 1465-i təhsilin bakalavriat , 200-ü isə magistratura pilləsində oxuyacaq.
Təhsillə elmin yanaşı addımladığını qeyd edən rektor ADU-da ən səviyyəli professor-müəllim heyətinin çalışdığını bildirib. Tələbələrə peşəkarların biliklərindən yararlanmağı, fəal olmağı, elmi məqalələr yazmağı tövsiyə edib.
S.Seyidov ADU-da aparılan islahatlardan, tələbələrin beynəlxalq tədbirlərdə iştirakından, dünyanın qabaqcıl ali məktəblərində təhsillərini davam etdirmələrindən də söz açıb.
Tədbirdə çıxış edən valideyn və tələbələr yüksək keyfiyyətli təhsil üçün ADU-da yaradılan hərtərəfli şəraitə görə minnətdarlıqlarını bildiriblər.
Milli Məclisin deputatları Məlahət İbrahimqızı, Asim Mollazadə, Cavanşir Feyziyev, İslam Əməkdaşlıq Təşkilatının Avropa İttifaqı yanındakı nümayəndəliyinin rəhbəri, səfir Arif Məmmədov ADU-nun fəaliyyətini yüksək qiymətləndirib, birinci kurs tələbələrini təbrik ediblər.
Sonra S.Seyidov prorektorları, dekanları və kafedra müdirlərini tələbələrə təqdim edib.
Daha sonra universitetə yüksək balla daxil olan gənclərə tələbə biletləri və qiymət kitabçaları, həmçinin qiymətli hədiyyələr təqdim olunub.
Görüş ADU-nun himninin səslənməsi ilə yekunlaşıb.

Paylaş:

Baxılıb: 1100 dəfə