“Yeni media və yeni çağırışlar” mövzusunda konfransda internet medianın inkişaf perspektivləri müzakirə olunub

Bakı:

28 °C

43 %

3 m/s

AZ RU EN

Ana səhifə / Sosial / “Yeni media və yeni çağırışlar” mövzusunda konfransda internet medianın inkişaf perspektivləri müzakirə olunub

“Yeni media və yeni çağırışlar” mövzusunda konfransda internet medianın inkişaf perspektivləri müzakirə olunub

28.05.2014 [13:04]

Mayın 27-də Beynəlxalq Mətbuat Mərkəzində Azərbaycan Mətbuat Şurasının və “Multimedia” Mərkəzinin birgə təşkilatçılığı ilə “Yeni media və yeni çağırışlar” mövzusunda konfrans keçirilib.
AzərTAc xəbər verir ki, tədbirdə media qurumlarının, dövlət orqanlarının, vətəndaş cəmiyyəti təşkilatlarının və beynəlxalq qurumların nümayəndələri iştirak ediblər.
Azərbaycan Mətbuat Şurasının sədri Əflatun Amaşov tədbirdə çıxış edərək deyib ki, ölkəmizdə internet medianın inkişafı daim diqqət mərkəzindədir. Bu gün Azərbaycanda genişzolaqlı internet istifadəçilərinin sayı 50 faizi ötüb. Ölkəmizdə 1 milyon 300 mindən çox insan “Facebook”da qeydiyyatdadır, təxminən 50-dək internet televiziya və radio fəaliyyət göstərir.
Mətbuat Şurasının sədri vurğulayıb ki, Ümummilli lider Heydər Əliyev tərəfindən 2003-cü il fevralın 17-də təsdiq edilmiş “Azərbaycan Respublikasının inkişafı naminə informasiya və kommunikasiya texnologiyaları üzrə Milli Strategiya (2003-2012-ci illər)” ölkəmizdə bu sahənin sürətli inkişafına güclü təkan verib.
Prezident Administrasiyası ictimai-siyasi məsələlər şöbəsinin sektor müdiri Vüqar Əliyev çıxış edərək aktual mövzuya həsr olunmuş konfransın əhəmiyyətindən və müzakirə olunacaq məsələlərin sosial medianın inkişafına verəcəyi töhfələrdən danışıb.
Bildirilib ki, Azərbaycan müstəqillik əldə etdikdən sonra Ümummilli lider Heydər Əliyevin rəhbərliyi altında azad informasiya mühitinin formalaşdırılması və paralel şəkildə dövlətin informasiya siyasətinin və informasiya təhlükəsizliyinin əsaslarının yaradılması prosesinə başlanılıb. Dövlətin informasiya siyasətinin əsas vəzifələri, istiqamətləri və onu həyata keçirəcək vasitələr müəyyənləşdirilib. Sonrakı mərhələdə demokratik cəmiyyət quruculuğuna uyğun olaraq azad informasiya fəaliyyətinin hüquqi-normativ bazası yaradılıb, söz və məlumat azadlığı təmin edilib, azad medianın inkişafına, onun iqtisadi və siyasi müstəqilliyinə, beynəlxalq rəqabətədavamlılığının artırılmasına hərtərəfli dəstək göstərilib. Nəticədə qısa zamanda respublikada azad informasiya mühiti formalaşıb, müstəqil media həm kəmiyyət, həm də keyfiyyət baxımından inkişaf edib.
Vüqar Əliyev deyib: “Azərbaycan informasiya-kommunikasiya texnologiyalarının sürətlə inkişaf etdiyi, bu sahədə innovasiyaların tətbiqinin hərtərəfli stimullaşdırıldığı, azad və keyfiyyətli internetin mövcud olduğu bir ölkədir. Bu gün əhalinin 70 faizinin internetə çıxışı mövcuddur, ölkədə yüzlərlə sayt, portal fəaliyyət göstərir, bloqosfera inkişaf edir, sosial şəbəkələrdən istifadə edənlərin sayı artıq 2 milyona çatmışdır. İKT sahəsində müasir standartların tətbiqi, ilk milli peykin orbitə çıxarılması, internetin infrastrukturunun təkmilləşdirilməsi, mətbuatla bağlı milli proqramların hazırlanması və həyata keçirilməsi nəticəsində dövlət orqanlarının fəaliyyətinin şəffaflaşdırılması və digər tədbirlər həm də yeni medianın imkanlarını genişləndirmiş, onun hərtərəfli inkişafına xidmət etmişdir”.
Müasir medianın qarşısında duran bir sıra mövcud problemləri diqqətə çatdıran Prezident Administrasiyası ictimai-siyasi məsələlər şöbəsinin sektor müdiri bildirib ki, sosial şəbəkələrdə insanların təhqir olunması, yalan, böhtan xarakterli yazıların yer alması yolverilməzdir, peşə etikasından kənardır və bu cür mənfi halların qarşısı qanunvericiliyin tələblərinə uyğun olaraq alınmalıdır.
Konfransda Rabitə və Yüksək Texnologiyalar Nazirliyinin şöbə müdiri İsfəndiyar Əliyev və Azərbaycan İnternet Forumunun prezidenti, “Multimedia” Mərkəzinin direktoru Osman Gündüz çıxış edərək internet medianın vəziyyətindən, bu sahədə ictimai informasiyaların açıqlanmasından, internet media qurumlarına dövlət dəstəyindən və digər məsələlərdən söz açıblar.
Sonra konfrans öz işini “İnternet medianın inkişaf meyilləri və perspektivlər”, “Sosial mediadan informasiya əldə edilməsi və informasiyaların yayılmasında səmərəli istifadə imkanları” mövzularında panel iclaslarında davam etdirib.

Paylaş:

Baxılıb: 1210 dəfə