Səbail rayonunda 42 mindən çox sakinin tibbi müayinələrdən keçməsi təmin olunub

Bakı:

26 °C

60 %

7 m/s

Əlaqə

AZ RU EN

Ana səhifə / Sosial / Səbail rayonunda 42 mindən çox sakinin tibbi müayinələrdən keçməsi təmin olunub

Səbail rayonunda 42 mindən çox sakinin tibbi müayinələrdən keçməsi təmin olunub

02.04.2014 [09:10]

Prezident İlham Əliyevin apardığı siyasətin məntiqi nəticəsi olaraq ölkəmizdəki iqtisadi tərəqqi səhiyyə sahəsində də görülən işlərin daha böyük vüsətlə davam etdirilməsinə imkan yaradıb.
AzərTAc xəbər verir ki, əhalinin sağlamlığını hər zaman diqqətdə saxlayan dövlət başçısının tapşırığına əsasən, fevralın 14-dən mayın 1-dək bütün ölkə vətəndaşlarının icbari tibbi müayinələrdən keçirilməsi kampaniyası Səbail rayonunda da uğurla aparılır. Bununla əlaqədar Səbail rayon İcra Hakimiyyəti tərəfindən aidiyyəti qurumların nümayəndələrindən ibarət komissiya yaradılıb, xüsusi qrafiklər tərtib olunub. Rayonda, onun qəsəbə və yaşayış sahələrində aksiya ilə bağlı əhali arasında təşkilati-izahat işləri davam etdirilir, görülən işlər İcra Hakimiyyəti tərəfindən gündəlik nəzarətdə saxlanılır. Tibbi müayinələrin yüksək səviyyədə keçirilməsi üçün rayon ərazisindəki 4 poliklinikada bütün lazımi şərait yaradılıb. Həmçinin yaşayış sahələrində, idarə və təşkilatlarda müayinələrin keçirilməsi üçün, evdə olan yataq xəstələrinində müayinəsi məqsədilə səyyar həkim briqadaları təşkil olunub. Fevralın 17-dən etibarən artıq rayon üzrə 42 min 84 nəfərin müayinələrdən keçməsi təmin olunub. Onlardan 5 min 649 nəfərə ambulator, 143 nəfərə stasionar müalicə təyin edilib.
2 nömrəli şəhər poliklinikasının baş həkiminin müavini Şahin Quliyev çalışdığı tibb müəssisəsinin ötən il Dövlət Proqramına uyğun olaraq əsaslı təmirdən çıxdığını və ən müasir tibbi avadanlıqlarla təchiz edildiyini deyib. Bildirib ki, poliklinikada həkimlərdən ibarət səyyar briqadalar yaradılıb. Bu briqadalar qrafik əsasında idarə və təşkilatlarda, məktəblərdə müayinələr aparır, həmçinin yaşlı və xəstə insanlara evlərində xidmət göstərirlər. Onun sözlərinə görə, indiyədək poliklinikada 10 mindən artıq sakin hərtərəfli müayinə olunub. Onlardan 137 nəfər nəzarətə götürülüb, 70 nəfər isə xəstəxanalara göndərilib.
Müayinədən keçən vətəndaşlar onların sağlamlıqlarının qeydinə qaldığı üçün Prezident İlham Əliyevə minnətdarlıqlarını bildiriblər.
Poliklinikanın həkim heyətindən, burada yaradılan şəraitdən razılıq edən Faiq Qarayev isə vurğulayıb ki, ölkə başçısının verdiyi bu tapşırıq əhalinin sağlamlığının dövlətimiz üçün nə qədər vacib olduğunun ən gözəl göstəricisidir.

Paylaş:

Baxılıb: 1210 dəfə