Səbaillilərin cəbhə bölgəsində xidmət edən əsgərlərə ənənəvi Novruz töhfəsi

Bakı:

15 °C

63 %

5 m/s

Əlaqə

AZ RU EN

Ana səhifə / Sosial / Səbaillilərin cəbhə bölgəsində xidmət edən əsgərlərə ənənəvi Novruz töhfəsi

Səbaillilərin cəbhə bölgəsində xidmət edən əsgərlərə ənənəvi Novruz töhfəsi

20.03.2014 [09:50]

Xalqımızın ən əziz bayramlarından olan Novruz bayramı ərəfəsində Səbail rayon İcra Hakimiyyəti və Müdafiə Nazirliyinin birgə təşkilatçılığı ilə cəbhə bölgəsində, birbaşa düşmənlə üz-üzə mövqelərdə dayanmış əsgərlər üçün tədbir keçirilib.
Səbail rayon İcra Hakimiyyətinin rəhbərliyi, rayon ictimaiyyətinin nümayəndələri və populyar incəsənət xadimləri ənənəvi olaraq Tərtər rayonundakı “N” saylı hərbi hissədə xidmət edən əsgər və zabitlərin görüşünə gəliblər. Qonaqlar hərbi hissə komandanlığı ilə birlikdə əvvəlcə ön cəbhə xəttindəki səngərlərə gəlib, burada əsgərlərimizin xidməti, məişət şəraiti ilə maraqlanıb, onlarla söhbətlər aparıb, bayram sovqatları çatdırıblar.
Hərbi hissədə əsgər kazarmaları və təmas xəttindəki bir neçə bölüklərlə tanışlıqdan sonra şəxsi heyətlə keçirilən görüşdə çıxış edən Səbail rayon İcra Hakimiyyətinin başçısı Asif Əsgərov Novruz bayramı münasibətilə əsgərlərimizi təbrik edib, onlara çətin və şərəfli xidmətlərinin yerinə yetirilməsində müvəffəqiyyətlər arzulayıb. O, hərbi hissənin şəxsi heyətini Azərbaycan Prezidenti, Silahlı Qüvvələrin Ali Baş Komandanı İlham Əliyev tərəfindən Ordumuz üçün yaradılmış şərait müqabilində daha yaxşı xidmət etməyə çağırıb və işğal altında olan bütün torpaqlarımızın dövlətimizin başçısının apardığı məqsədyönlü siyasət nəticəsində düşməndən azad ediləcəyinə, ərazi bütövlüyümüzün bərpa olunacağına əminliyini bildirib.
Tərtər rayon İcra Hakimiyyətinin başçısı Ceyhun Cəfərov da əsgərləri bayram münasibətilə təbrik edib.
Qonaqlar hərbi hissə və onun yeni istifadəyə verilmiş kazarmaları üçün Səbail rayon İcra Hakimiyyətinin hədiyyələrini, döyüş bölgəsi üçün lazım olan ləvazimatları, rayonun orta məktəblərinin kollektivlərinin hazırladıqları bayram xonçalarını, məktəblilərin əsgərlərə ünvanladıqları məktubları şəxsi heyətə təqdim ediblər.
Xidmətdə fərqlənən əsgər, çavuş və zabitlərin bir qrupu Səbail rayon İcra Hakimiyyətinin xatirə hədiyyələri ilə mükafatlandırılıblar.
“N” saylı hərbi hissənin komandir müavini şəxsi heyətin xidməti və döyüş hazırlığı barədə məlumat verib, bu tədbirin düşmənlə üz-üzə səngərdə xidmət edən hərbçilərin ruh yüksəkliyinin qalxmasında böyük rol oynadığını vurğulayıb və Səbail rayon İcra Hakimiyyətinə minnətdarlıq edib.
Sonra tanınmış incəsənət ustalarının ifasında konsert proqramı olub.
Şənlikdən sonra qonaqlar hərbi hissənin şəxsi heyəti ilə birlikdə bayram süfrəsi arxasında nahar ediblər.

Paylaş:

Baxılıb: 1148 dəfə