Azərbaycan dilinin rəqəmsal mühitdə qorunmasında vikipediyanın rolu

Bakı:

23 °C

53 %

5 m/s

Əlaqə

AZ RU EN

Ana səhifə / Sosial / Azərbaycan dilinin rəqəmsal mühitdə qorunmasında vikipediyanın rolu

Azərbaycan dilinin rəqəmsal mühitdə qorunmasında vikipediyanın rolu

13.08.2026 [13:20]

Azərbaycan dilinin rəqəmsal mühitdə qorunması və inkişaf etdirilməsi istiqamətində vikipediyanın Azərbaycan dili bölməsinin imkanları genişdir. Gündəlik olaraq çoxsaylı istifadəçinin müraciət etdiyi platformada Azərbaycan dilində məqalələrin hazırlanması və yayılması dilin internet məkanında istifadəsini genişləndirir.

Bu fikirləri AZƏRTAC-a açıqlamasında AMEA Mərkəzi Elmi Kitabxanasının Elektron resurslar şöbəsinin baş mütəxəssisi, vikipediya üzrə mütəxəssis Xəyalə Məmmədli söyləyib. Onun sözlərinə görə, Azərbaycan dilində vikipediya internet istifadəçiləri, xüsusilə gənclər üçün Azərbaycan dilində ensiklopedik məlumatların əlçatanlığını artıran mühüm platformalardan biridir. Məqalələrin hazırlanması zamanı dil qaydalarına riayət olunmasına diqqət yetirilir. Hazırlanmış materiallar sonradan müəlliflər və digər istifadəçilər tərəfindən nəzərdən keçirilərək aşkar edilən orfoqrafik və texniki səhvlər aradan qaldırılır. Məqalələrin keyfiyyətinin artırılmasında müxtəlif sahələrin mütəxəssisləri iştirak edirlər. Uzun müddət əvvəl hazırlanmış məqalələrin sonradan yenidən nəzərdən keçirilməsi və təkmilləşdirilməsi də mümkündür. Bu baxımdan, vikipediyanın açıq və kollektiv redaktə prinsipi Azərbaycan dilində yayımlanan məlumatların daim yenilənməsinə imkan yaradır. Xarici terminlərdən istifadə zamanı Azərbaycan dilinin mövcud qaydaları və qəbul olunmuş terminoloji normalar əsas götürülür. Terminlərdə yanlışlıq aşkarlandıqda isə onlar dilçilər və müvafiq sahənin mütəxəssisləri tərəfindən düzəldilə bilər.

Ümumilikdə, vikipediyanın Azərbaycan dili bölməsi rəqəmsal məkanda Azərbaycan dilində keyfiyyətli və əlçatan məlumat bazasının formalaşmasına, dilin internetdə istifadə dairəsinin genişlənməsinə və Azərbaycan dilində informasiya əldə edən gənc nəslin sayının artmasına mühüm imkan yaradır. Platformada Azərbaycan dilində yeni məqalələrin hazırlanması, mövcud materialların mütəmadi yenilənməsi və istifadəçilər tərəfindən redaktə olunması dilin rəqəmsal mühitdə daha fəal istifadəsinə şərait yaradır. Eyni zamanda, müxtəlif sahələr üzrə elmi, tarixi, mədəni və ictimai məlumatların Azərbaycan dilində təqdim edilməsi milli informasiya resurslarının zənginləşməsinə xidmət edir. Bu baxımdan, vikipediyanın Azərbaycan dili bölməsi həm Azərbaycan dilində məlumatların əlçatanlığının artırılması, həm də dilin internet məkanında mövqeyinin gücləndirilməsi baxımından əhəmiyyət daşıyır.

Paylaş:

Baxılıb: 401 dəfə