“Cinayət və cəzanın fəlsəfəsi” kitabının təqdimat mərasimi keçirilib

Bakı:

7 °C

87 %

5 m/s

Əlaqə

AZ RU EN

Ana səhifə / Sosial / “Cinayət və cəzanın fəlsəfəsi” kitabının təqdimat mərasimi keçirilib

“Cinayət və cəzanın fəlsəfəsi” kitabının təqdimat mərasimi keçirilib

27.11.2013 [09:31]

Noyabrın 26-da Bakı Dövlət Universitetində (BDU) Azərbaycanın Əməkdar Hüquqşünası, hüquq elmləri doktoru, professor İlham Rəhimovun “Cinayət və cəzanın fəlsəfəsi” kitabının təqdimat mərasimi keçirilib.
AzərTAc xəbər verir ki, tədbirdə çıxış edən Bakı Dövlət Universitetinin rektoru, akademik Abel Məhərrəmov bildirib ki, kitabın təqdimatının bu ali təhsil ocağında keçirilməsi təsadüfi deyildir. Çünki Azərbaycanda hüquq elmi məhz BDU-da formalaşıb.
Rektor bildirib ki, müəllif kitabda cinayətlərin baş vermə səbəblərinin fəlsəfi izahını verib. Qeyd edilib ki, kitab yalnız hüquq fakültəsinin müəllimləri və tələbələrinin deyil, başqa sahələrdə çalışan insanların da marağına səbəb olacaq. A.Məhərrəmov kitabın Azərbaycan və ingilis dillərinə də tərcümə olunmasının vacibliyini vurğulayıb.
Ümummilli lider Heydər Əliyevin “Dövlətə iki amil zərər gətirə bilər: günahkar cəzasız qalanda və günahsız cəzalandırılanda” kəlamını xatırladan BDU-nun rektoru deyib ki, professor İ.Rəhimov tərəfindən bu problem hərtərəfli, hüquqi, tarixi planda təhlil edilib və ona fəlsəfi əsaslandırma verilib.
Rusiya Federasiyası İstintaq Komitəsinin sədri, professor Aleksandr Bastrıkin, BDU-nun kafedra müdirləri, professorlar Kamil Səlimov və Rüstəm Məmmədov, Rusiya Pedaqoji və Sosial Elmlər Akademiyasının akademiki Yuri Qolik, professorlar Mina Hacıyeva, Dmitri Şestakov, Tatyana Nipomniyaşaya, Aleksandr Korobeyev, Xanlar Ələkbərov, Vladimir Catiyev, filosof Elmir Quliyev kitab haqqında fikirlərini bölüşüblər. Qeyd ediblər ki, kitabda cinayət və cəzanın xüsusiyyətləri araşdırılır, cinayət hüququnun problemləri təhlil edilir, cinayətə qarşı mübarizənin yeni yolları nəzərdən keçirilir. Diqqətə çatdırılıb ki, hüquq fakültəsinin tələbələri, müəllimləri və bu mövzu ilə maraqlananlar üçün nəzərdə tutulan kitabın rəyçiləri Rusiyanın tanınmış hüquqşünaslarıdır.
Vurğulanıb ki, kitabda cinayətin səbəbləri və mənşəyi, cəzanın mahiyyətinə fəlsəfi nöqteyi-nəzərdən yanaşma öz əksini tapıb.
Azərbaycanın Əməkdar hüquqşünası, hüquq elmləri doktoru, professor İlham Rəhimov tədbirdə iştirak edənlərə minnətdarlığını bildirib, bu sahədə fəaliyyətini gələcəkdə də davam etdirəcəyini söyləyib.
İlham Rəhimov bildirib ki, o, kitabda cinayətin və cəzanın mahiyyətini özünəməxsus yanaşma ilə təhlil edib, cinayət fəlsəfəsinin izahını verib.
İ.Rəhimov deyib ki, cinayətin kökünü tam şəkildə kəsmək qeyri-mümkündür, lakin mübarizə aparmaqla onun qarşısını cüzi də olsa almaq olar. Hər bir cəmiyyətdə qanunu pozan insanlar layiq olduqları cəzanı alsalar, cinayətlərin və cinayətkarların sayı da azalar.
Tədbirdə dövlət və hökumət rəsmiləri, Milli Məclisin deputatları, səfirlər, Rusiyanın tanınmış alimləri, ziyalılar və ictimaiyyətin nümayəndələri iştirak ediblər.

Paylaş:

Baxılıb: 1331 dəfə