Əli Əhmədov: Almaniyanın bəzi dairələrinin Azərbaycana qarşı apardığı kampaniyanın heç bir əsası yoxdur

Bakı:

24 °C

63 %

7 m/s

AZ RU EN

Ana səhifə / Siyasət / Əli Əhmədov: Almaniyanın bəzi dairələrinin Azərbaycana qarşı apardığı kampaniyanın heç bir əsası yoxdur

Əli Əhmədov: Almaniyanın bəzi dairələrinin Azərbaycana qarşı apardığı kampaniyanın heç bir əsası yoxdur

02.05.2012 [00:13]

“Bu il Azərbaycanla Almaniya arasında diplomatik münasibətlərin qurulmasının 20 ili tamam olur. Bu hadisəyə təkcə diplomatik münasibətlər tarixi kimi yox, həm də dostluq və əməkdaşlıq tarixi kimi yanaşmaq istəyərdim. Amma təəssüf ki, Almaniyada bəzi dairələr xalqlarımız arasında bu əlamətdar hadisəni özlərinəməxsus şəkildə qeyd etməyə hazırlaşırlar”. Bu fikirləri YAP Sədrinin müavini-İcra katibi, millət vəkili Əli Əhmədov dünən Milli Məclisin iclasında çıxışı zamanı deyib.
Əli Əhmədov bildirib ki, həmin dairələrin taktikası Azərbaycana qarşı kampaniya aparmaqdan ibarətdir. “Düşünürdüm ki, Almaniyanın ölkəmizdəki səfiri bu hadisənin fövqündə dayanan taktika seçəcək. Təəssüf ki, o da yuxarıda dediyim taktikanın iştirakçılarından biri kimi özünü dərk edir və belə hərəkətlərə yol verir” - deyə, o qeyd edib. YAP Sədrinin müavini Almaniyanın bəzi siyasətçilərinin və KİV-lərinin ölkəmizə qarşı qəribə üsullardan istifadə etdiyini diqqətə çatdırıb.
Onun sözlərinə görə, bu ölkənin bir sıra KİV-lərində Azərbaycanın Avropanın nüfuzlu mahnı müsabiqəsindən vasitə kimi istifadə edərək öz imicini yaxşılaşdırmağa çalışdığı iddia olunur: “Burada qəbahət nədən ibarətdir? Niyə bəzi dairələr bu tədbirdən istifadə edərək Azərbaycana qarşı çirkin kampaniya apararaq ölkəmizin imicinə kölgə salmağa çalışırlar?”.
YAP Sədrinin müavini Bakıda abadlıq-quruculuq işləri ilə əlaqədar bəzi vətəndaşların evlərinin sökülüb, başqa evlərlə təmin olunması ilə bağlı Almaniyanın bir sıra dairələrinin mövqeyinə də münasibət bildirib. Onun fikrincə, bu məsələ ilə əlaqədar Azərbaycan hökumətinin tənqid olunmasının heç bir əsası yoxdur.
“Almaniyanın səfiri, eləcə də, başqaları çox gözəl bilir ki, Azərbaycan hökuməti Ermənistanın təcavüzü nəticəsində öz yurdlarından didərgin düşmüş yüz minlərlə məcburi köçkünə müasir tələblərə uyğun evlər tikir. Bakı şəhərinin rekonstruksiyası ilə əlaqədar yararsız vəziyyətə düşmüş evlərdə yaşayan insanların yeni, layiqli mənzillərlə təmin olunmasına nə üçün tənqidi yanaşırlar? Bu tənqidlərin heç bir əsası yoxdur. Yaxşı olardı ki, Bakı şəhər İcra Hakimiyyəti həm yaşamaq üçün yararsız evlərin, həm də insanların o evlərdən köçürülərək təmin olunduqları yeni mənzillərin şəklini çəkib səfirə göndərsinlər. Onda əsl həqiqətin nədən ibarət olduğunu bilərlər” - deyə, Əli Əhmədov vurğulayıb.

Paylaş:

Baxılıb: 994 dəfə