Əli Kərimli cəfəng iddialarına son vermir

Bakı:

27 °C

47 %

1 m/s

Əlaqə

AZ RU EN

Ana səhifə / Siyasət / Əli Kərimli cəfəng iddialarına son vermir

Əli Kərimli cəfəng iddialarına son vermir

31.03.2012 [00:04]

AXCP sədri hakimiyyətdə olduqları dövrdə rüşvət və korrupsiyanın böyük vüsət almasından nə üçün danışmır?
Cənubi Qafqaz regionunun lider dövləti kimi Azərbaycan bu bölgənin siyasi, iqtisadi atmosferinin formalaşmasında həlledici təsirə malikdir. Məhz bu imkanlarından yararlanaraq ölkəmiz daxili sabitlik və çoxşaxəli xarici əlaqələr əsasında bölgədə sülh və sabitliyin təmin olunmasında öz mövqeyini konkret fəaliyyəti ilə ortaya qoyur. Eyni zamanda, ölkəmizdə iqtisadi inkişaf, bazar iqtisadiyyatı, invesitisiya mühiti ilə bağlı dünyanın nüfuzlu təşkilatları öz hesabatlarında Azərbaycanın siyasətini yüksək qiymətləndirirlər. Təbii ki, bu uğurlar indiki hakimiyyətin həyata keçirdiyi siyasət nəticəsində əldə edilir.
Amma ölkəmizdə qazanılan uğurlara, mövcud proseslərə kölgə salmaq istəyən dairələr də mövcuddur. Azərbaycanın kənar təsirlərə tabe olmadan müstəqil siyasət yeritməsi, öz yolu ilə irəliləməsi bəzi xarici qüvvələri ciddi narahat edir. Onlar ölkə daxilində bəzi qüvvələrdən öz məqsədləri üçün istifadə etməyə çalışırlar. AXCP və onun sədri Əli Kərimli isə bu prosesdə xüsusi fəallıq göstərir. Ə.Kərimli bu günlərdə “Reqnum” agentliyinə verdiyi müsahibədə də açıq-aşkar dövlətimizin inkişafı istiqamətində qazanılan uğurları qısqanclıqla qarşılayır. Belə olmasaydı, AXCP sədri mövcud reallıqları təhrif etməzdi.
Digər tərəfdən, əgər Əli Kərimli öz siyasi keçmişini, əməllərini, çıxışlarını unudursa, vaxtilə təmsil olunduğu hakimiyyətin Azərbaycan xalqına qarşı atdığı addımları xatırlatmaq yerinə düşər. AXCP sədri müsahibəsində deyir ki, hakimiyyətdə olduqları dövrdə “Biz rüşvət və korrupsiya ilə məşğul olmadıq, hakimiyyətdən sui-istifadə etmədik, xalqla əlaqəni kəsmədik”. Amma 1993-cü il mayın 25-də keçirilmiş müşavirədə səslənən fikirləri, sadalanan faktları, rüşvət və korrupsiya ilə bağlı məsələləri Ə.Kərimli niyə xatırlamaq istəmir? Yəqin ki, həmin müşavirədə Əbülfəz Elçibəyin üzünü dövlət məmurlarına tutaraq “Mənə cavab verin ki, respublika niyə dağılır?” sualını Ə.Kərimli unutmayıb. Bu müşavirədə məruzə ilə çıxış edərək anarxiyanın, korrupsiyanın baş alıb getdiyini müşavirə iştirakçılarının nəzərinə çatdıran Ə.Kərimli deyildimi? Həmin müşavirədə Ə.Kərimli demişdi: “İqtisadi sahədə cinayətkarlıq elə bir vüsət alıb ki, dövlət əmlakının açıq-aşkar mənimsənilməsi, qeyri-qanuni yollarla xaricə satılması, həmin vəsaitin xaricdə saxlanması və bir sözlə, dövlət əmlakının talan edilməsi adicə hala çevrilib. On milyonlarla dollar hələ də xaricdə, ayrı-ayrı adamların hesabında saxlanılır və biz yaddan çıxarmamalıyıq ki, bu, dövlət əmlakıdır və dövlət əmlakının mühafizəsi bizə tapşırılıb. Ona görə də, bilavasitə bu dövlət əmlakının dağılmasında məsul şəxslər kimi özümüzü mənən iştirakçı saymalıyıq”. Həmçinin, mərhum Ə.Elçibəyin öz çıxışında söylədiyi “Barı alanda və oğurlayanda da insafınıza və nəfsinizə sahib çıxın” kəlməsini AXCP sədri nə tez unudub? Bununla yanaşı, o zaman qızıl ehtiyatlarının dağıdılması, II Dünya müharibəsi veteranlarının orden-medallarının zorla yığılıb mənimsənilməsini və s. faktları da Ə.Kərimli xatırlasa, yaxşı olar.
Təəccüblü məqamlardan biri də odur ki, müsahibəsində Ə.Kərimli bir qrup müxalifətçi gəncin martın 17-də keçirdiyi biabırçı mitinqi az qala özləri üçün son dövrlərin böyük uğuru kimi qələmə verir. Bütün ictimaiyyət təxminən 350 nəfərlik mitinqdə səslənən əsas şüarların söyüşdən ibarət olmasına şahidlik etdi. Mitinqdə elan olunan şüarlar, səslənən fikirlər bir daha müxalifət düşərgəsində sağlam ruhlu gənclərin formalaşmadığını göstərir. Eyni zamanda, mitinq iştirakçılarının böyük bir meydanın kiçik bir küncündə toplaşması Azərbaycan gəncliyinin müxalifətə inanmadığını və onların arxasınca getmədiyini nümayiş etdirdi. Bununla yanaşı, onlar qanuni hərəkət, etik davranış və siyasi mədəniyyət baxımından geridə qaldıqlarını, sivil cəmiyyətin tələbləri ilə ayaqlaşa bilmədiklərini əyani şəkildə təsdiqlədilər.
Bir sözlə, müxalifətin fəaliyyəti, keçirmək istədikləri mitinqlər fiaskoya uğrayır. Bu da qarşı düşərgənin sosial dayaqlarının olmamasından, insanların radikalların arxasınca getməməsindən irəli gəlir. Bu reallıqları anlayan Ə.Kərimli isə bəzi xarici KİV-lərdə çıxış etməklə Azərbaycan haqqında mənfi imic formalaşdırmağa çalışır.
ümumiyyətlə, Azərbaycan cəmiyyəti uzaqgörən və siyasi cəhətdən təkmilləşmiş bir toplumdur və radikal müxalifətin dağıdıcı mövqeyini heç zaman qəbul etmir. Xalqımız bu gün Azərbaycanın inkişafını təmin edən mövcud hakimiyyətin siyasətini dəstəkləyir və mövqeyini də seçkilər zamanı nümayiş etdirir.
Nardar BAYRAMLI

Paylaş:

Baxılıb: 1022 dəfə