Antiterror tədbirlərini “etnik təmizləmə” adlandıranlar...

Bakı:

24 °C

47 %

3 m/s

Əlaqə

AZ RU EN

Ana səhifə / Siyasət / Antiterror tədbirlərini “etnik təmizləmə” adlandıranlar...

Antiterror tədbirlərini “etnik təmizləmə” adlandıranlar...

22.09.2023 [10:30]

Cənubi Qafqazda sülh istəmir!

Yeganə BAYRAMOVA

Rusiya Prezidentinin mətbuat katibi Dmitri Peskov Azərbaycanın Qarabağ iqtisadi rayonunda keçirilən yerli antiterror tədbirlərini şərh edib. Kreml nümayəndəsi Qarabağın Azərbaycanın daxili işi olduğunu vurğulayıb. O, bildirib ki, Azərbaycanın Qarabağdakı antiterror tədbirlərini etnik təmizləmə adlandırmağa heç bir əsas yoxdur. Peskov bu barədə “Birinci Kanal”a açıqlamasında deyib.

Xatırladaq ki, bundan əvvəl Ermənistan Xarici İşlər Nazirliyinin xüsusi tapşırıqlar üzrə səfiri Edmon Marukyan bildirmişdir ki, ABŞ Prezidenti Co Bayden, Fransa lideri Emmanuel Makron və digər Qərb ölkələrinin rəhbərləri Qarabağda “etnik təmizləmə”yə dözürlər.

Mövzu barədə “Yeni Azərbaycan”a danışan politoloq İlyas Hüseynov bildirib ki, Peskovun məhz lokal xarakterli antiterror tədbirləri zamanı Azərbaycan Ordusunun etnik təmizləmə aparması və buna dair bütün fikirlərin əsassız olduğunu söyləməsi həqiqətə uyğundur. Politoloq qeyd edib ki, Azərbaycan Qarabağda heç bir etnik təmizləmə aparmayıb və ümumiyyətlə, dövlətimizin belə bir fikri olmayıb: “Azərbaycan yalnız legitim hərbi hədəfləri sıradan çıxararaq regionda sülhü və təhlükəsizliyi təmin edib. Burada saxta təbliğata uymaq və bu təbliğatlar əsasında fikirlər formalaşdırmaq, bunu ali səviyyədə təqdim etmək tamamilə qəbuledilməzdir. Biz müxtəlif Qərb ölkələrinin rəhbərləri tərəfindən erməni təbliğatının davamını gördük. Buna son qoymaq lazımdır. Azərbaycan Qarabağa iqtisadi rayonunda dinc, mülki ermənilərin hüquqlarını və təhlükəsizliyini təmin etmək niyyətindədir. Ölkəmiz bu istiqamətdə zəmanətlər verir, reinteqrasiya planını və yol xəritəsini reallaşdırır və Azərbaycan üçün önəmli olan regional sabitlik, təhlükəsizlik mühitinin gücləndirilməsidir. Eyni zamanda, son dövlər etnik təmizləmə ilə bağlı geniş şəkildə manipulyasiyalar edilir, əsas məqsəd Azərbaycanın Ordusunun uğurlarına xələl gətirmək, onu ləkələmək, Azərbaycanın keçirdiyi çox dəqiq və sərrast antiterror tədbirlərini damğalamaq və ona qarşı çıxmaqdır. Lakin bu, baş tutmayacaq. Azərbaycan Ordusu yüksək peşəkarlıq nümayiş etdirib. 44 günlük Vətən Müharibəsində də, antiterror tədbirlərində də bütün dünya Ordumuzun peşəkarlığını gördü. Son günlər aparılan antiterror tədbirlərinin isə etnik təmizləmə olduğuna dair fikirlərin əsası yoxdur. Belə fikirlər siyasi nizamlama prosesinə mənfi təsir göstərir və bu fikirləri dilə gətirən qüvvələr regionda sülh istəmirlər”.

Paylaş:

Baxılıb: 567 dəfə