Növbəti ikili standart

Bakı:

28 °C

49 %

5 m/s

Əlaqə

AZ RU EN

Ana səhifə / Siyasət / Növbəti ikili standart

Növbəti ikili standart

21.09.2023 [10:22]

Azərbaycan mülki vətəndaşları hədəfə almır...

Ermənistan isə 2020-ci ildə xaincəsinə Gəncəni, Bərdəni, Tərtəri raket atəşinə tutmuşdu

Azərbaycanın Qarabağ iqtisadi rayonunda apardığı lokal antiterror tədbirləri bir sıra ermənipərəst mərkəzlər, o cümlədən anti - Azərbaycan fəaliyyəti ilə məşğul olan “siyasi dairələr” tərəfindən şantaj edilir, hədəfə alınır. Aparılan yalan təbliğat kampaniyasının əsassız və qərəzli olması ilk baxışdan ortadadır. Guya Azərbaycanın lokal antiterror tədbirləri zamanı “mülki şəxsləri hədəfə götürməsi” kimi qərəzli məlumatlar yayan, buna münasibət bildirən Qərb siyasətçiləri növbəti dəfə məsələyə fərqli don geyindirməyə çalışıb.

Erməni “mənbələrinə” istinad edənlər...

İlk növbədə vurğulanmalıdır ki, belə “informasiyalar” yayan həmin “siyasi ekspertlərin” xəbər mənbəyi bəllidir - onlar ermənilərə “istinad” edərək bu kimi birtərəfli və yalan xəbər yaymaqla məşğuldurlar. Halbuki xəbər istehsalının və yayımının ən ümdə şərtlərindən biri tərəfsizliyin qorunması, hər iki tərəfin mövqeyinə nəzər yetirilməsidir. Məsələn, Azərbaycanın Müdafiə Nazirliyi sentyabrın 19-da gün ərzində dəfələrlə rəsmi məlumatlar yayaraq, brifinqlər təşkil edərək baş verənlərlə bağlı dolğun informasiyalar çatdırıb - həmin informasiyalarda isə açıq şəkildə bildirilib ki, Azərbaycanın Qarabağ bölgəsində keçirilən lokal xarakterli antiterror tədbirləri zamanı mülki əhali və mülki infrastruktur obyektləri hədəfə alınmır. Ordumuzun arsenalında olan yüksək dəqiqlikli silahların tətbiqi ilə yalnız legitim hərbi hədəflər sıradan çıxarılır. Eyni zamanda, məhv edilən hərbi hədəflərin videogörüntüləri də yayımlanır. Bütün bunlar isə erməni mənbələrinə istinad edən həmin qərbli siyasi ekspertlərin yenidən ikili standartlara müraciət etdiklərini təsdiqləyir.

Mülki əhalinin zərər çəkməməsi üçün bütün tədbirlər görülüb

Bəli, Azərbaycan birmənalı olaraq mülki əhalinin zərər çəkməməsi üçün bütün lazımi addımları atıb və atır. Məqsədli şəkildə dezinformasiyalar yayan həmin şəxslər və “dairələr” son iki gündə Azərbaycanın rəsmi strukturlarının yaydıqları informasiya bülletenlərinə nəzər salsaydılar, arqumentsiz ifadələrinin məsuliyyətsizliyini görər və dərk edərdilər. Məsələn, Azərbaycanın Müdaifə Nazirliyinin yaydığı məlumatda yaşayış yerlərinin yaxınlığında atəş vasitələrinin Ermənistan silahlı qüvvələrinin birləşmələri tərəfindən yerləşdirilməsinin nəzərə alınaraq ərazidə olan mülki əhaliyə hərbi obyektlərdən kənar durmaq və Ermənistan silahlı qüvvələrinin birləşmələrinə dəstək olmamaq şəklində çağırışlar ünvanlanıb. Bu barədə mobil SMS xidməti vasitəsilə Azərbaycanın Qarabağ bölgəsinin erməni sakinlərinə məlumat göndərilib. Eyni zamanda səsgücləndirici texniki vasitələrlə əhali xəbərdar edilib və məlumat vərəqələri paylanılıb. Azərbaycan Respublikasının qanunlarına və beynəlxalq humanitar hüquq normalarına uyğun olaraq təhlükəsizliyinə zəmanət verilən inzibati, sosial, təhsil, tibbi, dini və digər obyektlərin mühafizəsinin və müdafiəsinin təşkili aktuallaşdırılıb. Eyni zamanda, rəsmi məlumatda qadınlara, uşaqlara, qocalara, habelə fiziki məhdudiyyətli şəxslərə və xəstələrə lazımi tibbi və digər yardımların göstəriləcəyi, onların içməli su və ərzaqla təmin olunacağı öz əksini tapıb. Hətta əhalinin təhlükəli ərazidən təxliyəsini təmin etmək üçün Laçın yolu üzərində və digər istiqamətlərdə humanitar dəhliz və qəbul məntəqələrinin yaradıldığı da bəyan edilib.

Bəzi Qərb siyasətçilərin danışdıqları yalanlar isə növbəti dəfə erməni məkri ilə Azərbaycana qarşı kampaniya aparmaq istəyənlərin əsl simasını ortaya qoyur. Qeyd edilənlər bir daha onu sübut edir ki, Azərbaycan heç bir halda mülki əhaliyə xələl gətirilməsini istəmir və bunun üçün Silahlı Qüvvələr öz üzərinə düşən vəzifələri yerinə yetirirlər.

2020-ci ildə azərbaycanlı mülki vətəndaşlara edilən xain raket hücumları...

Maraqlıdır ki, mülki əhalinin “təəssübünü” çəkən Qərb siyasətçiləri 2020-ci ildə Ermənistan silahlı birləşmələri tərəfindən mülki əhalinin hədəfə götürülməsinə, Gəncə, Bərdə və Tərtərin vəhşicəsinə atəşə tutulmasına niyə münasibət bildirməyiblər və bu gün də bildirmirlər. Yüzlərlə mülki şəxsin, hətta döyüş zonasından 100 kilometrlərlə uzaqda yaşayan günahsız dinc insanların Ermənistan tərəfindən qətl edilməsi haqda niyə danışılmır? 2020-ci ildə Gəncədə və Bərdədə raket atəşi nəticəsində günahsız körpələr, qocalar, qadınlar həyatını itirmişdi - niyə həmin mərkəzlər və ya dairələr bir dəfə bu fakta müraciət etmədi? Amma bu gün Ermənistanın apardığı şər-böhtan kampaniyasına “dəstək” olaraq ikili standartdan çıxış edirlər. Bu, ölkəmizə qarşı növbəti qərəzin və ikili standartın bariz nümunəsidir...

P.İSMAYILOV

Paylaş:

Baxılıb: 629 dəfə