Mübariz Qurbanlı: İrandan Azərbaycana gələn soydaşlarımız da Azərbaycan Respublikasının qanunlarına əməl etməlidirlər

Bakı:

15 °C

82 %

3 m/s

AZ RU EN

Ana səhifə / Siyasət / Mübariz Qurbanlı: İrandan Azərbaycana gələn soydaşlarımız da Azərbaycan Respublikasının qanunlarına əməl etməlidirlər

Mübariz Qurbanlı: İrandan Azərbaycana gələn soydaşlarımız da Azərbaycan Respublikasının qanunlarına əməl etməlidirlər

07.09.2011 [10:57]

Yeni Azərbaycan Partiyası (YAP) İcra katibinin müavini, deputat Mübariz Qurbanlı “Media forum”a açıqlamasında bildirib ki, İranda yaşayan azərbaycanlılar bu dövlətin vətəndaşlarıdır və azərbaycanlıların orada ta qədimdən mövcud olmaları hamıya bəlidir: “İran adlanan ərazinin, dövlətin idarə olunmasında tarixən Azərbaycan etnosu həlledici rol oynayıb və uzun müddət azərbaycanlılar bu ərazidə aparıcı etnos kimi fəaliyyət göstərib. Azərbaycanlılar bu gün də İran dövlətinin qurucusu, yaradıcısı və vətəndaşı olaraq həmin ölkədə yaşayırlar. Azərbaycanlıların hansısa ölkəyə getməsi yalnız dövlətlərarası münasibətlərlə əlaqədardır. Yəni İranda yaşayan azərbaycanlı, fars, bəluc, ərəb başqa ölkəyə İran vətəndaşı kimi gedir. İranda yaşayan azərbaycanlılar etnik baxımdan bizimlə eyni millətdən olsalar da, onlar başqa dövlətin vətəndaşıdırlar”.
Mübariz Qurbanlı hesab edir ki, başqa xalqların nümayəndələri kimi İrandan Azərbaycana gələn soydaşlarımız da Azərbaycan Respublikasının qanunlarına əməl etməlidirlər. Onun sözlərinə görə, milliyyətindən asılı olmayaraq Azərbaycana gələn bütün xarici vətəndaşlar burada qanun çərçivəsində yaşamalı, fəaliyyət göstərməlidirlər: “Ona görə də hesab etmirəm ki, İrandan Azərbaycana gələn kimlərəsə qarşı ayrı-seçkilik olub. Həmin şəxslərə qanun çərçivəsində münasibət bəslənir”.
Mübariz Qurbanlı vurğulayıb ki, İrandakı vəziyyətlə razılaşmayıb başqa ölkələrə gedən insanlara münasibət də qanunla tənzimlənir. Onun fikrincə, Azərbaycanın Dövlət Miqrasiya Xidməti bu məsələdə düzgün mövqe tutub: “Dövlət Miqrasiya Xidməti hər bir məsələyə fərdi yanaşır. Bizdə ikili vətəndaşlıq yoxdur. Azərbaycana gələn insanlar vətəndaşlıq almaq üçün qanunlara uyğun formada gözləməlidir, sənədlər təqdim etməlidir. Biz kimlərəsə süni formada fərq qoymamalıyıq”.
Azərbaycan Respublikasına gələn siyasi mühacirlərin İranın təzyiqi ilə buradan çıxarılmasına gəlincə, Mübariz Qurbanlı bunu mümkün saymır: “Mən inanmıram ki, hansısa ölkə Azərbaycan Respublikasına təzyiq etsin və Azərbaycan da bu təzyiqlə siyasi qərar qəbul etsin, siyasətini dəyişsin. Bizim ölkə müstəqil siyasət yürüdür. Milliyyətindən asılı olmayaraq İrandakı siyasi vəziyyətlə razılaşmayıb Azərbaycana, Gürcüstana, başqa ölkəyə gedən varsa, həmin dövlətin qanunları nəyi tələb edirsə ona uyğun hərəkət etməlidirlər. Kimsə bizim ölkəyə pənah gətirirsə, bura sığınırsa Azərbaycan qanunları çərçivəsində onlara himayədarlıq edə bilərik. Amma bunu siyasiləşdirmək, milli mənsubiyyətlə məhdudlaşdırmaq olmaz. Bu məsələ qanunlar və beynəlxalq hüququn normaları əsasında tənzimlənə bilər”.

Paylaş:

Baxılıb: 974 dəfə