Parlament seçkiləri beynəlxalq standartlara uyğun keçirilib

Bakı:

23 °C

63 %

12 m/s

Əlaqə

AZ RU EN

Ana səhifə / Siyasət / Parlament seçkiləri beynəlxalq standartlara uyğun keçirilib

Parlament seçkiləri beynəlxalq standartlara uyğun keçirilib

12.11.2010 [09:53]

Beynəlxalq təşkilatlar Azərbaycanda şəffaf və ədalətli seçkinin keçirildiyini təsdiqləyir
Seçkilərin keçirildiyi şərait, nəticələrin obyektivliyi hər bir ölkədə demokratiyanın hansı səviyyədə inkişaf etdiyini göstərən mühüm faktorlardandır. Gənc müstəqil dövlət olan Azərbaycanda baş tutan növbəti seçki isə ölkəmizin demokratik prinsiplərin, ənənələrin bərqərar olması yönündə böyük uğurlar əldə etdiyini bir daha təsdiqlədi. Belə ki, noyabrın 7-də Milli Məclisə keçirilən seçki şəffaflığı və rəqabətliliyi ilə beynəlxalq müşahidəçilərin diqqətini cəlb edib. Əslində, seçkilərin ədalətli keçiriləcəyi qabaqcadan heç kimdə şübhə doğurmurdu. çünki dövlət bütün namizədlərin seçkiqabağı kampaniyanı sərbəst və aktiv şəkildə həyata keçirməsi üçün hər bir şəraiti yaratmışdı. Xatırladaq ki, bütün müxalifət partiyalarının prosesdə iştirak etməsi, siyasi mövqeyindən asılı olmayaraq bütün namizədlərə bərabər şəraitin yaradılması, eləcə də, hər bir namizədə pulsuz efir vaxtından istifadə hüququnun verilməsi və digər çoxsaylı amillər seçkinin obyektiv keçirilməsi üçün lazım olan ilkin şəraiti yaratmışdı. Seçki öncəsi mühiti müşahidə edən müxtəlif beynəlxalq təşkilatlar da yaradılmış şəraitdən razı qaldıqlarını bildirmişdilər.
Beləliklə, gözlənildiyi kimi, seçkilər yüksək səviyyədə keçirildi. Bunu Avropa Parlamenti, AŞPA, ATƏT kimi nüfuzlu beynəlxalq təşkilatların seçkilərin obyektiv keçirilməsi ilə bağlı yaydıqları rəsmi bəyanatlar da təsdiq edir. Belə ki, Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi və Avropa Komissiyasının vitse-prezidenti Ketrin Eşton Azərbaycanda parlament seçkiləri ilə bağlı bəyanatla çıxış edərək bildirib ki, parlament seçkiləri dinc şəraitdə keçib, bütün müxalifət partiyaları siyasi proseslərdə iştirak edib. Bəyanatda, həmçinin, bildirilir ki, Azərbaycan Avropa İttifaqı üçün çox mühüm tərəfdaşdır: “Biz siyasi islahatların bundan sonra da həyata keçirilməsinə, bu prosesin, həmçinin, Şərq Tərəfdaşlığı çərçivəsində aparılmasına dəstəyimizi davam etdirməyə hazırıq”.
Müstəqil Dövlətlər Birliyi və MDB Parlamentlərarası Assambleyası Müşahidə Missiyaları üzvlərinin seçkinin gedişatı ilə bağlı açıqlamaları da avropalı diplomatların bəyanatları ilə üst-üstə düşür. MDB müşahidə missiyasının rəsmi açıqlamasında qeyd olunur ki, Azərbaycanda parlament seçkiləri ölkənin seçki qanunvericiliyinə uyğun, yüksək səviyyədə keçirilib.
Doğrudur, bəzi qüvvələr hər zaman olduğu kimi, bu dəfə də seçkilərin nəticələrinə kölgə salmağa çalışır, əksər dairələrdə Yeni Azərbaycan Partiyasından olan namizədlərin qalib gəlməsini həzm edə bilmir. Lakin Azərbaycan xalqı öz seçimini çoxdan edib və bütün seçkilərdə YAP-ın qalib gəlməsi xalqın bu partiyaya və onun nümayəndələrinə olan inamından irəli gəlir. YAP namizədlərinin bu seçkilərdə də qalib gəlməsi bəzi müxalifət partiyalarının iddia etdiyi kimi seçki saxtakarlığına deyil, xalqa, ölkəyə xidmət əsasında formalaşan ümumxalq rəğbəti və etimadına söykənir.
Elə AŞPA müşahidə missiyasının rəhbəri Pol Vill də AŞPA-nın, ATƏT-in, ATƏT Parlament Assambleyasının və Avropa Parlamentinin Azərbaycanda seçkiləri müşahidə etmiş missiyalarının birgə mətbuat konfransında çıxışında bunu əsaslandırıb. P.Vill bildirib ki, Yeni Azərbaycan Partiyası seçki kampaniyasını ictimai marağa səbəb ola biləcək şəkildə keçirib. AŞPA nümayəndəsinin sözlərinə görə, hakim partiyanın namizədləri təbliğatlarını əsasən seçicilərlə görüş, müzakirələr aparmaq prinsipi ilə həyata keçiriblər. O, həmçinin, əlavə edib ki, heç bir müxalifət partiyası və yaxud blokunun qeydiyyata alınmış namizədlərinin sayı 60-dan yuxarı olmadığı üçün, yalnız iqtidar partiyası İctimai TV və dövlət tərəfindən maliyyələşdirilən qəzetlərdən təbliğat üçün istifadə etmək hüququ qazanıb. Onun sözlərinə görə, hakim partiyanın pulsuz efir vaxtından istifadə etməsinin balanslaşdırılması rəqabətin göstəricisidir. P.Vill YAP namizədlərindən fərqli olaraq müxalifət namizədlərinin təbliğat kampaniyasında passivliyini və yaradılan şəraitdən tam yararlanmadığını da bildirib: “Hakim partiyanın namizədləri mediada geniş təbliğat işi aparsa da, müxalifət namizədləri bu istiqamətdə passivliyi ilə seçilirdi. Halbuki bütün namizədlərə bərabər şərait yaradılmışdı”.
Sonda, qeyd edək ki, 7 noyabr seçkiləri ilə Azərbaycan demokratik dövlətçilik yolunda inamla irəlilədiyini bir daha sübut edib və bu seçki ölkəmizdə demokratiyanın növbəti qələbəsi kimi dəyərləndirilməlidir.
Hülya MƏMMƏDLİ

Paylaş:

Baxılıb: 1084 dəfə