Vyanada ikinci, sayca üçüncü...

Bakı:

19 °C

94 %

5 m/s

Əlaqə

AZ RU EN

Ana səhifə / Siyasət / Vyanada ikinci, sayca üçüncü...

Vyanada ikinci, sayca üçüncü...

30.04.2022 [10:51]

Növbəti dəfə Ankara ilə İrəvanın təmasları baş tutacaq

Nardar BAYRAMLI

Türkiyə və Ermənistanın xüsusi nümayəndələri Serdar Kılıçla Ruben Rubinyan arasında növbəti görüş mayın 3-də keçiriləcək. Sayca üçüncü olan bu görüş də Avstriyanın paytaxtı Vyana şəhərində baş tutacaq. Belə ki, xüsusi nümayəndələrin ilk görüşü bu ilin yanvar ayında Moskvada, ikinci görüşü isə fevralda Vyanada keçirilmişdi.

Daha çox Ermənistana lazımdır

Görüşdən hansı gözləntilər var? Məsələ ilə bağlı qəzetimizə açıqlama verən Milli Məclisin deputatı Ramil Həsən bildirib ki, tərəflərin məqsədi münasibətlərin normallaşdırılmasıdır. Onun sözlərinə görə, bu prosesdə əsas məqamlardan biri Türkiyə və Ermənistan arasında sərhədlərin açılmasıdır: “İki ölkə arasında sərhədlərin açılması daha çox Ermənistana lazımdır. Çünki işğalçı siyasəti nəticəsində özünü regionda təcrid vəziyyətə salan, qonşuları ilə münasibətlərini pozan bu ölkə dərin böhran içərisindədir. Türkiyə Cümhuriyyəti Ermənistanla sərhəddi 1993-cü ildə bu ölkənin Azərbaycana qarşı işğalçı siyasətinə görə bağlayıb. Məhz Azərbaycan torpaqlarının işğalı səbəbinə görə Ermənistan 30 ilə yaxın regionda tam təcrid vəziyyətində yaşayıb. Ermənistanın təkcə Azərbaycana yox, Türkiyəyə qarşı da müxtəlif iddiaları var. Hazırda Ermənistan Türkiyə ilə sərhədlərin açılmasına çox çalışır. Amma onu da bilirlər ki, sərhədlərin açılması üçün əsassız iddialardan geri çəkilməlidirlər”.

İki görüş ilkin şərt olmadan...

“Təsadüfi deyil ki, erməni tərəfi Türkiyə ilə münasibətlərin bərpasının zəruriliyini anlayır. Bir müddət öncə Ermənistanın baş naziri Nikol Paşinyan da Türkiyə ilə münasibətlərin vacibliyi etiraf etmişdi. İndiyə qədər keçirilmiş iki görüş ilkin şərt olmadan baş tutub. Amma təbii ki, müzakirələr zamanı problemli məsələlər xüsusi olaraq diqqətdə saxlanılır. Türkiyənin bu prosesi Azərbaycanla koordinasiyalı formada apardığını nəzərə alsaq, deyə bilərik ki, Ermənistan Azərbaycanın ərazi bütövlüyünü tanımalı, uydurma “erməni soyqırımı” iddialarına son qoyulmalı və Zəngəzur dəhlizinin açılmasına əngəl törədilməməlidir”.

Yeganə çıxış yolu

Millət vəkilinin fikrincə, 44 günlük Vətən müharibəsindən sonra rəsmi İrəvan başa düşməlidir ki, qonşulara qarşı ərazi iddiaları ilə çıxış etmək bu ölkəyə yalnız fəlakət gətirə bilər: “Ona görə də Ermənistanın iflasdan yeganə çıxış yolu Azərbaycan və Türkiyə ilə əməkdaşlıqdan keçir. Bu ölkənin isə Türkiyəyə qarşı irəli sürə biləcəyi heç bir şərt yoxdur. Çünki Türkiyə kimi böyük bir dövlətə Ermənistan kimi kiçik və zəif bir ölkənin hansısa şərtlər irəli sürməsi reallıqlarla uzlaşmır. Mart ayında Antalya Diplomatiya Forumunda Ermənistanın xarici işlər naziri Ararat Mirzoyanın iştirak etməsi və forum çərçivəsində iki ölkənin xarici işlər nazirlərinin görüşünün keçirilməsi deməyə əsas verir ki, erməni tərəfi artıq reallıqları anlayır. Ümumiyyətlə, Türkiyə xoşməramlı jestlərini qarşı tərəfə göstərir. Əgər Ermənistan düzgün yanaşma sərgiləsə, Azərbaycana və Türkiyəyə qarşı iddialarından əl çəksə, prosesdə müsbət nəticələr əldə ediləcək. Şübhəsiz ki, xüsusi nümayəndələrin ilk görüşündə bu məsələlər diqqət mərkəzində olacaq”.

Paylaş:

Baxılıb: 1366 dəfə