Fransanın nümayəndəsi ölkəmizə nə üçün gəlir?

Bakı:

21 °C

62 %

1 m/s

Əlaqə

AZ RU EN

Ana səhifə / Siyasət / Fransanın nümayəndəsi ölkəmizə nə üçün gəlir?

Fransanın nümayəndəsi ölkəmizə nə üçün gəlir?

30.04.2022 [10:41]

Paris Cənubi Qafqaz siyasətini yeni geosiyasi reallıqlara uyğun müəyyənləşdirir

Sadiq İSMAYILZADƏ

Fransanın Avropa İttifaqının (Aİ) Şərq Tərəfdaşlığı proqramı üzrə səfiri Bris Rokfeyl gələn həftə Azərbaycana səfər edəcək. Bununla bağlı Fransa Avropa və Xarici İşlər Nazirliyinin Mətbuat Xidməti məlumat yayıb. Məlumatda bildirilir ki, Fransa Azərbaycan və Ermənistan xarici işlər nazirlərinin bu yaxınlardakı telefon söhbətini, sərhəd məsələlərinə dair ikitərəfli komissiyanı toplayaraq iki ölkə arasında sülh sazişi ilə əlaqədar danışıqlara başlamaq qərarını alqışlayır. Rəsmi Paris bundan sonra da prosesə tam dəstək verəcək.

Fransada keçirilən sonuncu prezident seçkilərinin ardından Bakıya ediləcək bu səfər nəyin ifadəsidir və nə vəd edir?

Siyasi şərhçi İlyas Hüseynov “Yeni Azərbaycan”a açıqlamasında qeyd etdi ki, son dövrlərdə Fransa ilə Azərbaycan arasındakı münasibətlərin inkişafında yeni səhifənin açılması üçün münbit şərait yaranıb. Onun fikrincə, 44 günlük müharibədən sonra regionda yaranan yeni geosiyasi reallıqları artıq Fransa da qəbul edir və əməkdaşlığın bu reallıqlar əsasında qurulmasında maraqlıdır: “Azərbaycan ilə Fransa arasında müxtəlif sahələrdə əməkdaşlığın dərinləşdirilməsi imkanları var. Eləcə də işğaldan azad olunmuş ərazilərdə müxtəlif layihələr icra etmək mümkündür”.

İ.Hüseynov xatırladıb ki, Azərbaycan öz gücü, qüdrəti hesabına torpaqlarını işğaldan azad etdi. “Fransa hazırda Avropa İttifaqına sədrliyi həyata keçirir. Fevral ayında Azərbaycan Prezidenti İlham Əliyevin, Fransa prezidenti Makronun, Aİ İttifaqının prezidenti Şarl Mişelin və Ermənistanın baş naziri Paşinyanın iştirakı ilə onlayn formatda görüş keçirildi. Bu görüşə Makron Aİ-nin sədrliyini həyata keçirən dövlətin başçısı kimi qatılmışdı. Nəzərə alınmalıdır ki, son dövrlərdə Aİ Azərbaycan ilə Ermənistan arasında münasibətlərin normallaşdırılması üçün vasitəçilik missiyası həyata keçirir və müəyyən müsbət məqamlar da ortaya çıxıb. Bu mənada, artıq Prezident Makron da Cənubi Qafqaz siyasətində müəyyən korrektələr etməlidir. Azərbaycan regionun aparıcı qüvvəsi - lideridir. Siyasi, iqtisadi, hərbi, enerji, nəqliyyat-kommunikasiya sahələrində Azərbaycanla əməkdaşlıq etmək cəlbedici və əhəmiyyətlidir. Fransa Cənubi Qafqaza münasibətdə kənar təsirlərdən çıxmalı, qarşılıqlı faydalılıq və bərabərhüquqluq prinsiplərini əsas götürməlidir. Bu, mühüm siyasi - iqtisadi dividendlər vəd edir. Çünki Azərbaycan həm də Aİ-nin əsas ticarət tərəfdaşlarından biridir, ticarət dövriyyəmiz ildən-ilə artır. Eyni zamanda, Avropanın Azərbaycanın karbohidrogen ehtiyatlarına olan tələbatını görürük. Aİ-nin enerji təhlükəsizliyində fəal rol oynayan Azərbaycanla əməkdaşlığın dərinləşməsi ikitərəfli münasibətlərə müsbət təsir göstərir. Ona görə də Paris regiona münasibətini yeni geosiyasi reallıqlar əsasında formalaşdırır”.

Paylaş:

Baxılıb: 643 dəfə