Ohanyan Qarabağ “səddi”ni niyə aşa bilmədi?

Bakı:

27 °C

48 %

2 m/s

Əlaqə

AZ RU EN

Ana səhifə / Siyasət / Ohanyan Qarabağ “səddi”ni niyə aşa bilmədi?

Ohanyan Qarabağ “səddi”ni niyə aşa bilmədi?

14.04.2022 [10:28]

Erməni deputatlar Azərbaycana buraxılmadı

P.İSMAYILOV

Bu ayın sonunda Azərbaycan ilə Ermənistan arasında dayanıqlı sülhün təmin olunması istiqamətində mühüm danışıqlar mərhələsinin başlanacağı gözlənilir. Brüssel görüşündə əldə olunan razılıq sərhədlərin delimitasiya və demarkasiya məsələlərinin həllinə yol açacaq. Artıq Ermənistan bununla bağlı öz razılığını ifadə edib.

Amma bu ölkədəki revanşist qüvvələr hələ də sülh prosesinə mane olmağa çalışır. Məsələn, Ermənistan parlamentinin “Hayastan” blokunun rəhbəri, keçmiş müdafiə naziri Seyran Ohanyan parlamentin son iclasında qondarma “artsax bayrağını” taxıb iclasları dörd günlüyə boykot etdiyini, fraksiyanın üzvləri ilə Xankəndiyə və sərhəd rayonlarına səfər edəcəklərini elan edib. Hakim partiyanın deputatı Aleksanyan isə “bayrağı” çıxararaq buna ehtiyac olmadığını bildirib. Ermənistan parlamentinin vitse-spikeri İşxan Saqatelyan isə erməni deputatların Rusiya sülhməramlılarının yerləşdiyi Azərbaycan ərazilərinə buraxılmadığı barədə məlumat verib. “Hayastan” fraksiyasının üzvü Artur Kazinyan isə bildirib ki, deputatların avtomobilləri nəzarət-buraxılış məntəqəsində saxlanılıb. O deyib ki, Azərbaycan tərəfi rusiyalı sülhməramlıların operativ qərargahına deputatların Azərbaycan ərazilərinə buraxılmaması ilə bağlı təlimat verib.

Məsələ ilə bağlı fikirlərini bölüşən Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Arzu Nağıyev Ermənistan parlamentində baş verənləri müxalifətlə iqtidar arasında dərin fikir ayrılığı kimi qiymətləndirib. Onun sözlərinə görə, Seyran Ohanyanın iclasların boykot olunması, qondarma separatçı quruma dəstəyi ilə bağlı bəyanatı bəzi məqamlardan xəbər verir: “Ohanyan, hətta tribunaya separatçılara məxsus qondarma əski parçasını yerləşdirməyə çalışsa da, digər deputatlar onu götürüb kənara qoydular. Bildirdilər ki, danışıqlar Azərbaycan ilə Ermənistan arasında gedir. Bu prosesdə hər hansı bir qondarma qurumdan söhbət gedə bilməz. Ermənistan parlamentində əsasən Ohanyanın və Hovanesyanın rəhbərlik etdiyi fraksiyalar revanşist ideyalar səsləndirirlər. O ki qaldı erməni deputatların Qarabağa getmək cəhdinə, bunun da qarşısı alınıb. Dövlətimiz Qarabağa gəlməyə çalışan erməni deputatların siyahısını sülhməramlı qüvvələrə təqdim edərək onların ümumiyyətlə Azərbaycan ərazisinə buraxılmaması ilə bağlı tapşırıq verib. Əks halda, onların həbsi, Azərbaycan ərazisindən çıxarılması məsələsi gündəmdə olacaqdı. Ermənilər nə qədər səs-küy salsalar da xeyri olmadı. Bu, başlanğıcdır. Onlar başa düşməlidirlər ki, Azərbaycanın ərazi bütövlüyü var, suverenliyi var, Qarabağ tarixi Azərbaycan torpağıdır. Oraya hər hansı bir siyasi və ya digər müdaxilə ola bilməz və olmayacaqdır”.

Revanşistlərin sülh danışıqlarına mane olmaq cəhdinə toxunan millət vəkilinin sözlərinə görə, onlar anlayır ki, sülh müqaviləsi imzalansa, sərhədlərin delimitasiya və demarkasiya prosesi başa çatsa, aqibətləri pis olacaq. “Bu insanlar törətdikləri cinayətlərin məsulyyətini daşıyacaqlar və həbs olunacaqlar. Bu baxımdan nəyin bahasına olursa olsun hazırki status-kvonu qoruyub saxlamaq və ya mitinqlər keçirmək istiqamətində addımlar atırlar. Amma bunun xeyri yoxdur”, - deyən A.Nağıyev Laçından çəkiləcək ikinci yolla bağlı məsələyə də toxunub. Onun fikrincə, burada əsas məsələ Laçın şəhərinin birmənalı şəkildə Azərbaycanın nəzarətinə keçməsidir: “Dəhliz Azərbaycanın nəzarətinə keçir. Ermənilərin Qarabağ ərazisinə gəlməsi müvafiq standartlara uyğun olaraq sərhəd keçid yoxlaması ilə tənzimlənəcək. Düşünürəm ki, sülhməramlı qüvvələr də Laçın dəhlizini tərk edərək dislokasiya edəcəklər”.

Paylaş:

Baxılıb: 776 dəfə