Əli Kərimli Dağlıq Qarabağı güzəştə getməklə hakimiyyətə gəlmək istəyir

AZ RU EN

Ana səhifə / Siyasət / Əli Kərimli Dağlıq Qarabağı güzəştə getməklə hakimiyyətə gəlmək istəyir

Əli Kərimli Dağlıq Qarabağı güzəştə getməklə hakimiyyətə gəlmək istəyir

02.10.2010 [09:11]

Xarici qərəzli dairələrin ölkəmizdə maraqlarının təmin olunacağını vəd edən AXCP lideri Azərbaycanın Dağlıq Qarabağ məsələsində istənilən güzəştə gedəcəyi öhdəliyini də üzərinə götürüb
... Bu cür faktlara dünyanın bir çox ölkələrində və tarixin istənilən mərhələsində rast gəlinib. Söhbət hər hansı bir ölkənin siyasi meydanında ciddi fiqur olmayan, eyni zamanda, sosial-ictimai dəstəkdən məhrum olan bir “siyasətçi”nin hakimiyyətə gəlmək üçün xarici qüvvələr qarşısında öhdəlik götürməsindən gedir.
Təəssüflər olsun ki, müasir dövrdə də bu hallara tez-tez rast gəlirik. Təkcə XXI əsrin başlanğıcında xarici maraq qruplarının qarşısında öhdəliklər götürərək, hakimiyyətə gələn bəzi “siyasətçi”lər öz doğma dövlətlərinin inkişafdan geri qalmasına və xalqının dövlətçilik tarixinin silinməsinə səbəb olublar. Bu faktla bağlı da istənilən qədər misal göstərmək olar.
Bu tip insanları yalnız şəxsi maraqları düşündürdüyünə görə, onlar üçün dövlət, xalq, milli maraqlar, ali dəyərlər və digər keyfiyyətlər heç bir əhəmiyyət kəsb etmir. Ona görə də, onları yalnız Vətən xainləri adlandırmaq olar...
Azərbaycanda da xarici qüvvələrə işləyənlər peyda olub...
Hazırki iqtidarın düşünülmüş və praqmatik siyasət yürütməsi nəticəsində Azərbaycan sürətlə inkişaf edir. Bu tərəqqinin məntiqi yekunu olaraq, dövlətimizin beynəlxalq aləmdə mövqeyi möhkəmlənir, nailiyyətlərinə görə, dünyanın aparıcı ölkələri sırasına yüksəlir, paralel olaraq, insanların rifah halı yaxşılaşır. Maddi rifah halı yüksələn və azərbaycanlı olması ilə fəxr edən insanlarımızın iqtidara etimadı da məhz bu amillərdən irəli gəlir. Ona görə də, bu gün Azərbaycan o dövlətlərdən hesab olunur ki, xalq-iqtidar birliyi istənilən məsələdə özünü açıq şəkildə göstərir.
Bu səbəbdən də, xarici qüvvələr Azərbaycanda istədikləri planı reallaşdıra bilmirlər. Onlar Azərbaycanın daxilində özlərinə işləyə biləcək tərəfdaşlar axtarırlar. Heç də təsadüfi deyil ki, Azərbaycan ictimaiyyəti dəfələrlə müxalifətin Dağlıq Qarabağ məsələsindən sui-istifadə etdiyinin, öz maraqlarının təmin olunması üçün milli maraqlarımıza zidd təkliflər irəli sürdüyünün, müxtəlif vaxtlarda erməni lobbisi ilə işbirliyində olan xarici dairələrlə yaxından təmas qurduğunun şahidi olub. Hətta erməni lobbisi ilə yaxın, onun maraqlarına xidmət edən xarici təşkilatlar, siyasətçilər və ekspertlər Müsavat və AXCP-nin qəhrəmanlarına çevriliblər, onların dövlətimizə qarşı irəli sürdüyü iddialar müxalifət mətbuatı tərəfindən geniş işıqlandırılıb və bu işini indi də davam etdirir. Bu mənada, Azərbaycana qarşı fəaliyyət göstərən qərəzli xarici dairələr müxalifətin timsalında özünə tərəfdaş tapıb.
Əli Kərimli Dağlıq Qarabağın əvəzinə hakimiyyətə gəlmək istəyir...
Əvvəldə qeyd etdiyimiz kimi, müasir Azərbaycanda da xarici qərəzli dairələrlə əməkdaşlıq etmək istəyən, yalnız şəxsi maraqlarını düşünən, dövlət, xalq, milli maraqlar, ali dəyərlər haqqında düşünməyən “siyasətçi” var. Onun Azərbaycan cəmiyyətində heç bir sosial dəstəyi yoxdur. Keçirilən bütün seçkilərdə o, yalnız məğlub olub. Bu səbəbdən də, partiya lideri hakimiyyətə gəlmək üçün xarici dairələrin dəstəyinə ümid bəsləyib. Həmin “siyasətçi” AXCP sədri Əli Kərimlidir.
Ermənistan mətbuatında yer alan məlumatlara görə, Əli Kərimli Qərb dairələri ilə yaxından təmaslar qurmaq və dəstək almaq üçün ciddi-cəhdlə çalışır. Qeyd olunur ki, o, hakimiyyətə gəlmək üçün dəstək göstərilməsi müqabilində ciddi vədlər də verib. Həmin dairələrin ölkəmizdə maraqlarının təmin olunacağını vəd edən Əli Kərimli Azərbaycanın Dağlıq Qarabağ məsələsində istənilən güzəştə gedəcəyi öhdəliyini də üzərinə götürüb. Bəzi politoloqlar isə Qərbdəki erməni lobbi təşkilatları vasitəsilə AXCP sədrinə yardım göstərilməsinin mümkün olduğunu bildiriblər.
Göründüyü kimi, AXCP lideri hakimiyyət arzularının reallaşması üçün istənilən addıma, hətta Azərbaycanın maraqlarını zərbə altına qoymağa belə hazırdır.
Xalq belələrini heç bir zaman bağışlamayacaq...
Azərbaycan xalqı şəxsi maraqları naminə siyasi qərarlar verən “siyasətçilərin” ucbatından hələ 19 il əvvəl əldə etdiyi müstəqilliyi itirmək təhlükəsi ilə üz-üzə qalmışdı. Müxtəlif xarici dairələrin, kəşfiyyat orqanlarının göstərişlərinə əsasən hərəkət edən AXC-Müsavat hakimiyyəti Azərbaycanı uçurum kənarına sürükləmişdi. O zaman, xalq AXCP-nin, Müsavatın indiki liderlərini hakimiyyətdən getməyə vadar etdi və ümummilli lider Heydər Əliyevi dövlət başına gətirdi. Bununla demək istəyirik ki, Azərbaycan xalqı kimin qəhrəman, kimin isə xəyanətkar olduğunu çox yaxşı bilir. Ona görə də, düşünürük ki, xalq AXCP lideri Əli Kərimlini və onun kimi digərlərini heç bir zaman bağışlamayacaq.
Ramil VƏLİBƏYOV

Paylaş:

Baxılıb: 885 dəfə