Siyasi gerizəkalılıq sindromu şiddətlənir

Bakı:

21 °C

58 %

0 m/s

Əlaqə

AZ RU EN

Ana səhifə / Siyasət / Siyasi gerizəkalılıq sindromu şiddətlənir

Siyasi gerizəkalılıq sindromu şiddətlənir

18.03.2022 [10:51]

Ambisiyalılıq, qərəzlilik və savadsızlıq birləşdikdə

Siyasət özünü “müxalifət” adlandıran autsayderlərin primitiv düşüncələrindən ibarət deyil və ya bəsit təfəkkür ilə idarə olunmur

Nurlan QƏLƏNDƏRLİ

Rusiya-Ukrayna müharibəsi regionda geosiyasi zəlzələ effekti yaradıb. Şərait mürəkkəb, vəziyyət isə qeyri-müəyyəndir. Problem müxtəlif səviyyələrdə müzakirə olunur. Qarşıdurma tərəfləri ilə yanaşı, ayrı-ayrı ölkələrin rəsmiləri, siyasətçilər, beynəlxalq təşkilat nümayəndələri və digər şəxslər müxtəlif bəyanatlar verir, fikirlər səsləndirirlər. Diqqəti cəlb edən əsas məqamlardan biri ayrı-ayrı dövlətlərin rəhbərlərinin, rəsmi nümayəndələrinin Prezident İlham Əliyev ilə bu məsələ ətrafında müzakirə aparmalarıdır. Son olaraq martın 15-də ABŞ dövlət katibi Entoni Blinkenin Prezident İlham Əliyevə zəngi zamanı regional təhlükəsizlik məsələləri də müzakirə edilib.

Bütün bunlar Cənubi Qafqazın lider dövlətinin Liderinin - Azərbaycan Prezidentinin fikir, rəy və mövqeyinin xüsusi nəzərə alındığını - əsas götürüldüyünü bir daha təsdiqləyir. Digər tərəfdən, ölkələrin rəhbərlərinin mükəmməl geosiyasət bilicisi, təcrübəli siyasətçi və dövlət xadimi olan İlham Əliyev ilə bu məsələlər ətrafında müzakirələr aparması Azərbaycanın regionun geosiyasi gündəliyini formalaşdıran əsas qüvvələrdən biri olduğunu göstərir. Yeri gəlmişkən, Fransanın CAUSER nəşrində dərc olunan məqalədə qeyd edilir ki, Ukraynadakı vəziyyət fonunda Avropa liderləri bir-birinin ardınca Prezident İlham Əliyevə müraciət edir.

İntensiv diplomatik trafikin müşahidə edildiyi, fikir mübadilələrinin aparıldığı, dünya mətbuatının prosesləri diqqət mərkəzində saxladığı və gün ərzində onlarla informasiya verildiyi şəraitdə bəzi siyasi autsayderlər öz “fərq”lərini ortaya qoyurlar. Söhbət siyasətin kənarında qalmış - tozlu rəflərə qaldırılmış, yaxud tarixin arxivinə yollanmış radikal düşərgənin “parlaq sima”larının “analitik” yanaşmalarından gedir. Bir zamanlar virtual ictimai-siyasi gündəmi məişət problemləri ilə məşğul etmiş və bu gün də siyasi prosesləri məişət səviyyəsində “təhlil edən” Fuad Qəhrəmanlının, Əli Kərimlinin “yazan əli” Seymur Həzinin, “erməni lobbisindən nə qopartsam, QƏNİMƏTDİR” deyib qrant uğrunda mübarizə aparan Qənimət Zahidin, canlı yayımda Anna Akopyan duruşu və baxışı ilə Azərbaycanı hədəfə almağa çalışan Sevinc Osmanqızının və digərlərinin canfəşanlığı xüsusilə diqqəti cəlb edir.

Bəhs olunan virtual şoumenlər guya Azərbaycana təzyiq göstərilməsi görüntüsünü yaratmaq üçün müxtəlif vasitələrdən istifadə edirlər. Məsələn, Blinkenin İlham Əliyevə zəngini “şərh etmək” adı altında absurd fikirlər səsləndirirlər. Gah əlaqəsiz olaraq “demokratiyaya hörmət”dən danışırlar, gah da telefon danışığı zamanı müzakirə mövzusu olmayan məsələləri ortaya atırlar (əslində, dezinformasiya yayırlar).

Fuad Qəhrəmanlı “Ermənistanın Azərbaycana qarşı hərbi-siyasi təxribatı” ifadəsini yazmağa cəsarət etmədiyindən “atəşkəsin pozulması” deyir. Əlbəttə, bu, təəccüblü deyil. Çünki internet resurslarında, elə onun özünün feysbuk səhifəsində kiçik və qısa monitorinq aparmaq yetərlidir ki, F.Qəhrəmanlının indiyə qədər bir dəfə də Ermənistanı təxribatçı əməllərinə görə qınamadığına şahidlik edəsən... Digər tərəfdən, o, ABŞ ilə Rusiya arasında mübarizədə “demokratiya” amilindən bəhs edir. Amma anlamır ki, məsələnin demokratiya ilə heç bir əlaqəsi yoxdur, söhbət ərazi bütövlüyünün, təhlükəsizliyin və mənafelərin qorunmasından gedir. Siyasətin əlifbası ilə tanış - anlayışlardan xəbərdar olan istənilən şəxs geosiyasi məsələləri belə primitiv səviyyədə anlamaz və anlatmaz. Bu, özünü hakimiyyətə iddialı göstərən bir qrupun hansı səviyyədə olduğunu təsdiqləyən faktdır...

Seymur Həzi isə ABŞ-ın Azərbaycana təşəkkür etməsinə də anti-Azərbaycan məzmunu verməyə çalışaraq “Təşəkkür dövlət başçısına deyil, Azərbaycana ünvanlanıb” deyib. Burada qərəzlilik ilə yanaşı, savadsızlıq, hətta siyasi cahillik də özünü göstərir. “Həftə səkkiz, mən doqquz” prinsipi ilə internet televiziyalarında moizələr oxuyan, beynəlxalq münasibətlərdən, Qərb siyasi mədəniyyətindən danışan bu şəxsin siyasətdən zərrə qədər anlayışı yoxdur. Belə olmasaydı, o, dövlət başçısının timsalında və fəaliyyəti fonunda ölkəyə təşəkkür ünvanlandığından xəbərdar olardı. Azərbaycana təşəkkür etmək elə Prezidentə və xalqa minnətdarlıq bildirməkdir. Bu, diplomatik etiket, siyasi ənənədir. S.Həzi kimilər isə öz “ənənə”lərinə sadiqdirlər... Bununla yanaşı, o, guya “sensasion” fikir səsləndirərək hakimiyyətin İlham Əliyev və Blinken arasındakı telefon danışığı haqqında susqun?uq nümayiş etdirdiyini, rəsmi dövlət agentliyinin bu barədə məlumat vermədiyini söyləyib. Görünən odur ki, özünü “ictimai-siyasi fəal” kimi göstərən, “mətbuat katibi” adı altında Əli Kərimlinin mirzəliyini edən bu şəxsin nəinki dünyadan, heç yerli mediadan da xəbəri yoxdur...

Bu cür “nümunə”lərin sayı çox, faktlar isə istənilən qədərdir. Reallıq budur ki, özlərindən başqa kimsəni bəyənməyən, ac toyuğun yuxusunda darı gördüyü kimi xəyallarında özlərini hakimiyyət olimpində təsvir edən belələri hələ də siyasət haqqında yetkin təsəvvürə malik deyillər - ibtidai düşüncədən əl çəkə bilməyiblər. Anlamırlar ki, siyasət onların primitiv düşüncələrindən ibarət deyil və ya bəsit təfəkkür ilə idarə olunmur... Ambisiyalılıq, qərəzlilik və savadsızlıq birləşdikdə isə siyasi gerizəkalılıq sindromu özünü aşkar surətdə göstərir - şiddətlənir!

Paylaş:

Baxılıb: 701 dəfə