“Xankəndi əməliyyatı”nı düşünənlər...

Bakı:

11 °C

93 %

2 m/s

Əlaqə

AZ RU EN

Ana səhifə / Siyasət / “Xankəndi əməliyyatı”nı düşünənlər...

“Xankəndi əməliyyatı”nı düşünənlər...

17.03.2022 [10:11]

Erməni kəşfiyyatının dəyirmanına su tökürlər

Nicat DİLQƏMLİ

Son günlər qanunsuz erməni separatçılarının xeyli fəallaşması müşahidə edilir. Sosial şəbəkələr vasitəsilə həm Azərbaycan, həm də erməni seqmentində guya Rusiya-Ukrayna müharibəsindən istifadə edib, Xankəndində “əməliyyatlar” aparılması, bu şəhərdən əhalinin çıxarılması ilə bağlı şaiyələr dolaşmaqdadır. Əslində nə baş verir? Azərbaycan öz ərazilərində belə əməliyyatlar aparırmı? Ekspertlərin fikrincə, Azərbaycan de-yure öz ərazilərində qanunsuz silahlı dəstələrə qarşı əməliyyat aparması hüquqi cəhətdən qəbulediləndir. Amma bu gün belə əməliyyatların keçirilməsi haqqında rəsmi məlumat yoxdur. Məlumatlar yalnız sosial şəbəkələrdə dolaşır. Bu şaiyələrlə bağlı Azərbaycan Baş Prokurorluğu da bəyanat yayıb. Bəyanatda deyilir ki, süni ajiotaj yaratmaq məqsədilə dövlət qurumları ilə hər hansı dəqiqləşdirmə aparmadan yoxlanılmamış bu cür informasiyaların, səs yazılarının, foto və videogörüntülərin yayılması yolverilməz olmaqla qanunvericiliklə nəzərdə tutulmuş məsuliyyətə səbəb olur. Baş Prokurorluq media subyektləri və sosial şəbəkə istifadəçilərinə xəbərdarlıq etməklə diqqətə çatdırır ki, qeyd olunan neqativ hallara yol vermiş şəxslər barəsində mövcud qanunvericiliyin tələblərinə uyğun olaraq müvafiq tədbirlər görüləcək.

Bəyanatdan göründüyü kimi, siyasi ekspertlərin də fikrincə, bu tipli məlumatlar Azərbaycan - Rusiya münasibətlərinə xələl gətirmək məqsədilə yayılır. Ekspertlərin bir qismi isə bu xəbərlərin erməni kəşfiyyatı vasitəsilə yayıldığı qənaətindədirlər. Bu arada qeyd edək ki, Dövlət Təhlükəsizliyi Xidməti erməni kəşfiyyatına məlumat ötürməkdə şübhəli bilinən Emil Məmmədovun həbsi ilə bağlı məlumat yayıb. Məlumata əsasən, o, Azərbaycan Respublikası Cinayət Məcəlləsinin 274-cü (dövlətə xəyanət) maddəsi ilə məsuliyyətə cəlb olunaraq məhkəmənin qərarına əsasən həbs edilib.

Mövzu ilə bağlı “Yeni Azərbaycan”a danışan siyasi şərhçi İlqar Vəlizadə deyib ki, burada məqsəd Azərbaycan-Rusiya münasibətlərinə kölgə salmaqdır: “Ermənistan yaranmış hazırkı geosiyasi vəziyyətdən istifadə etməyə, məkrli planlarını həyata keçirməyə çalışır. Onların planlarına görə, sözügedən təxribatlar Azərbaycanla Rusiya sülhməramlıları arasında gərginliyə səbəb olmaqdır. Sonra isə regionda vəziyyət gərginləşəcək və yeni münaqişə ehtimallarının yaranması fonunda Ermənistan tərəfi bəzi siyasi gedişatlar edə bilərdi. Yəni münaqişə alovlanır, yeni forma alır, Ermənistan tərəfi bundan istifadə edir və üçtərəfli sazişin pozulmasına nail olur. Ssenari təxminən bundan ibarətdir.

Azərbaycan tərəfi isə proseslərdən xəbərdardır. Müdafiə Nazirliyinin yaydığı rəsmi açıqlamada da dövlətimiz cəmiyyəti müxtəlif dezinformasiyalara inanmamağa, təxribatlara uymamağa çağırır”.

Paylaş:

Baxılıb: 1144 dəfə