“Xalqın xidmətçisi” NATO-dan nə istəyir?

Bakı:

26 °C

61 %

12 m/s

Əlaqə

AZ RU EN

Ana səhifə / Siyasət / “Xalqın xidmətçisi” NATO-dan nə istəyir?

“Xalqın xidmətçisi” NATO-dan nə istəyir?

10.03.2022 [10:10]

Alyans ölkələri ilə təhlükəsizlik təminatları haqqında sazişin bağlanması III Dünya Müharibəsini başlada bilər

PƏRVİZ

Ukraynanın hakim partiyası olan “Xalqın xidmətçisi” partiyası yeni bir təkliflə çıxış edib. Belə ki, partiya ölkəsinin NATO-ya qəbul ediləcəyi vaxta qədər ABŞ, Türkiyə və qonşu dövlətlərin iştirakı ilə təhlükəsizlik təminatları haqqında saziş bağlamağı təklifini irəli sürüb. Bu barədə partiyanın və Ali Radanın “Telegram” kanallarında dərc edilmiş bəyanatda bildirilib. “Xalqın xidmətçisi”, həmçinin Rusiyanı Ukrayna dövlətçiliyini “hüquqi olaraq tanımağa” çağırıb.

Maraqlıdır ki, belə bir təklif hansı zərurətdən irəli gəlib və bu saziş Ukraynaya nə verə bilər? İndiki halda, NATO ölkələri bu sazişi bağlamağa maraq göstərəcəklərmi?

Məsələ ilə bağlı fikirlərini “Yeni Azərbaycan”a bölüşən politoloq İlqar Vəlizadə Ukraynanın hakim partiyasının irəli sürdüyü təklifin anlaşılan olmadığı qənaətindədir. O qeyd edib ki, ilk növbədə, söhbətin nəyə təminatın verilməsindən getdiyi anlaşılmalıdır: “Söhbət nəyin təminatından gedir? Artıq Ukraynanın ərazisində aktiv müharibə başlayıb. Onlar hansı təhlükəsizliyin təminatını almaq istəyirlər? Bütün hallarda bu saziş NATO-nun müharibəyə tərəf kimi cəlb olunmasına xidmət göstərə bilər. Əslində Ukrayna tərəfi bunun üçün müəyyən cəhdlər edir. Məsələn, Ukraynanın Beynəlxalq Atom Enerjisi Agentliyindən (MAQATE) ölkənin nüvə obyektləri üzərində hava məkanına çıxışı bağlamaq tələbi ilə NATO-ya müraciət etməyi tələb etməsi kimi təkliflər onların niyyətini ortaya qoyur. Bu çağırış NATO-nun birbaşa prosesə daxil olması deməkdir. Vladimir Putin isə bildirib ki, belə bir addımın atılması Rusiyanı NATO ilə üz-üzə qoyacaq. Bu isə artıq III Dünya Müharibəsi deməkdir və bu faktı heç kim gizlətmir. Hətta ABŞ prezidenti Bayden də bu fikri təsdiqləyib ki, belə bir addım atılsa, NATO Rusiya ilə birbaşa münaqişəyə girmiş olacaq. Bu nöqteyi-nəzərdən təhlükəsizlik təminatları sazişinin bağlanması da qeyri-mümkündür”.

Ümumiyyətlə, son dövrlərdə hər iki tərəfin dövlət rəsmilərinin bir çox emosional ifadələrlə yadda qaldığını deyən İ.Vəlizadə bunun yolverilməz olduğunu vurğulayıb. “Məsələn, Ukrayna xarici işlər naziri Kuleba Antaliyada keçiriləcək görüş zamanı rusiyalı həmkarı Lavrovu baş verənlərdə əsas günahkar kimi ittiham edəcəyini bildirib. Bütün emosional gərginliklərə baxmayaraq XİN rəhbərinin belə bir bəyanatla çıxış etməsi anlaşılan deyil. Onda danışıqların nə mənası qalır? Danışıqlar indiki halda müharibənin dayandırılmasına, insan tələfatının qarşısının alınmasına hesablanmalıdır. Bunun üçün diplomatiya işləməlidir. Hazırkı gərgin vəziyyətdə adi insanlar emosional olsalar da, diplomatlar bir qədər ehtiyatlı davranmalıdırlar. Və yaxud Ukrayna prezidenti Zelenski bəyanat verib ki, mən artıq NATO-ya üzv olmaq niyyətindən soyumuşam. Bu nə bəyanatdır belə? Ölkədə müharibə gedir. Axı dövlət başçısı bunu müharibədən öncə fikirləşməli idi və bilməliydi ki, NATO onlara birbaşa dəstək göstərməyəcək. Bu kimi ifadələr, qeyri-peşəkar davranışlar onu göstərir ki, vəziyyət çox çətindir”, - deyə İ.Vəlizadə əlavə edib.

Paylaş:

Baxılıb: 1208 dəfə