Kipr parlamentindən qəbuledilməz addım...

Bakı:

24 °C

61 %

1 m/s

Əlaqə

AZ RU EN

Ana səhifə / Siyasət / Kipr parlamentindən qəbuledilməz addım...

Kipr parlamentindən qəbuledilməz addım...

11.12.2021 [10:46]

Azərbaycana qarşı qərəzli qətnamənin qəbul edilməsi nəyin ifadəsidir?

Nardar BAYRAMLI

Qəbul olunmuş sənəd ölkəmizin beynəlxalq nüfuzuna və regiondakı yeni reallıqlara təsir edə bilməz

Bir neçə gün öncə Kipr Respublikasının Nümayəndələr Palatası tərəfindən qeyri-obyektiv, qərəzli sənəd qəbul edilib. Belə ki, “Azərbaycanın ermənilərə qarşı davamlı təcavüzü və Dağlıq Qarabağdakı mövcud vəziyyət” adlı qətnamədə həqiqətlər təhrif olunur, ermənilərin dağıdıcı maraqlarına uyğun fikirlər yer alıb.

Artıq Azərbaycan Milli Məclisinin Beynəlxalq münasibətlər və parlamentlərarası əlaqələr komitəsi Kipr Respublikasının Nümayəndələr Palatası tərəfindən qəbul edilmiş bu sənədlə bağlı etiraz bəyanatı yayıb. Bəyanatda bildirilir ki, regionda sabitliyi pozmağa yönəlmiş bu cür təxribatlar 30 il ərzində Azərbaycan ərazisinin 20 faizini qeyri-qanuni olaraq işğal altında saxlayan, bütün Azərbaycan əhalisini etnik təmizləməyə məruz qoyan, Xocalı soyqırımını törədən və bölgəni yenidən xaos və müharibə vəziyyətinə qaytarmağa çalışan qüvvələrə xidmət edir. Kipr Nümayəndələr Palatasının deputatları bu lüzumsuz qətnaməyə səs verərək, özlərini və parlamentlərini dəyərdən salaraq, müharibəyə can atanlarla eyni səviyyəyə qoyurlar. Ermənilərin çirkin siyasi oyunlarında iştirak etmək qəbulolunmazdır.

Sənədin qəbul olunmasında erməni lobbisinin xüsusi rolu var

Bəs Kipr parlamentinin belə bir sənəd qəbul etməsi nədən qaynaqlanır? Məsələ ilə bağlı qəzetimizə açıqlama verən politoloq Ramiz Alıyev bildirib ki, bu sənəd həqiqəti əks etdirmir və müəyyən dairələrin siyasi maraqlarına xidmət edir. Onun sözlərinə görə, Kipr parlamentində belə bir sənədin qəbul olunmasında erməni lobbisinin xüsusi rolu var: “Kiprdə erməni lobbisinin güclü olduğu məlumdur. Digər tərəfdən, məlum səbəblərdən bu ölkədə türklərə qarşı mənfi münasibət formalaşıb. Ona görə də əvvəllər də Kipr parlamenti Türkiyəyə və Azərbaycana qarşı qərəzli sənədlər qəbul ediblər”.

Qərəzli xarici qüvvələrin diktəsi

Politoloq deyib ki, hazırda regionda sülhün, təhlükəsizliyin və əməkdaşlığın təmin olunması üçün addımlar atılır: “Müharibəyə son qoyaraq regionda dinc yaşayışın yeni mərhələsinə şərait yaradan, Azərbaycan, Rusiya prezidentləri və Ermənistanın baş naziri tərəfindən üçtərəfli Bəyanatın imzalanmasından artıq bir il ötür. Hazırda Qarabağın dirçəldilməsi, soydaşlarımızın öz evlərinə qaytarılması, regionda yeni infrastrukturun qurulması ilə yanaşı, xalqlar arasında etimad tədbirlərinin də gücləndirilməsi üçün səylər göstərilir. Bu gün Azərbaycan bütün səviyyələrdə hər iki ölkənin ərazi bütövlüyünün qarşılıqlı tanınması şərti ilə Ermənistanla sülh müqaviləsi imzalamağa hazır olduğunu açıq şəkildə bəyan edir, delimitasiya və demarkasiya prosesinə başlamağa hazır olduğunu bildirir.

Belə olan halda, Kipr parlamenti tərəfindən bu cür qətnamənin qəbul olunması təəssüf doğurur. Görünən odur ki, regionumuzda təhlükəsizliyin və əməkdaşlığın təmin olunmasını istəməyən xarici qüvvələr var. Kipr parlamentində qəbul olunmuş qətnamə də buradan qaynaqlanır. Amma bütün hallarda belə bir sənədlərin qəbul edilməsinin proseslərə heç bir təsiri yoxdur. Azərbaycan haqq mübarizəsində qalib gəlib və regionda yeni reallıqlar yaradıb. Bütün dünya bu reallıqlarla hesablaşmaqdadır, bölgədə yeni əməkdaşlıq platformaları müzakirə edilməkdədir. Belə bir şəraitdə Kipr kimi kiçik bir dövlətin parlamentinin qəbul etdiyi qərəzli sənədin Azərbaycanın beynəlxalq nüfuzuna və bölgədəki proseslərə zərrə qədər də təsiri ola bilməz”.

Paylaş:

Baxılıb: 843 dəfə