Hakim komandada yerdəyişmələr məğlub ölkə üçün nə vəd edir?

Bakı:

24 °C

61 %

13 m/s

Əlaqə

AZ RU EN

Ana səhifə / Siyasət / Hakim komandada yerdəyişmələr məğlub ölkə üçün nə vəd edir?

Hakim komandada yerdəyişmələr məğlub ölkə üçün nə vəd edir?

20.08.2021 [10:01]

Məlum olduğu kimi, məğlub Ermənistanda daxili vəziyyət gərgin olaraq qalmaqdadır. Parlamentdə jurnalistlərə qarşı yeni qaydaların tətbiqi və hakimiyyətin müxalifət təmsilçilərinə qarşı təzyiqi fonunda Paşinyan hakimiyyəti tərəfindən hökumətin formalaşdırılması prosesi də davam edir. Ermənistan mətbuatı yeni hökumətin qurulması prosesinin ciddi dəyişikliklərlə müşayiət olunduğunu yazır.

Bu arada “Joğovurd” qəzeti öz mənbələrinə istinadən yazır ki, jurnalistlərin parlamentdə akkreditasiya prosedurunda dəyişiklik ediləcək. Qəzetin yazdığına görə, dəyişikliklərin müəllifləri hakim “Vətəndaş müqaviləsi” partiyasından olan iki deputatdır. Onlardan biri keçmiş jurnalist Sisak Qabrielyan, digəri isə keçmiş aktyor, Paşinyanın qaynı Hraçya Hakopyandır. Qəzet yazır ki, dəyişikliklər artıq parlament sədrinə təqdim olunub. Belə ki, həmin deputatlar bu günlərdə parlamentin spikeri Alen Simonyanla görüşərək hansı jurnalistlərin parlamentə daxil ola biləcəyini, kimlərin akkreditasiyadan məhrum edilməli və ya ümumiyyətlə, hansı akkreditasiya prosedurunun tətbiq edilməli olduğunu müzakirə ediblər. Vurğulanır ki, yeni akkreditasiya qaydaları parlamentin payız sessiyasını işıqlandıran jurnalistlər üçün qüvvəyə minəcək.

Qeyd olunduğu kimi, parlamentdəki yeniliklərlə paralel olaraq Paşinyan hakimiyyətdə ciddi dəyişiklik və yerdəyişmələrə rəvac verib. Belə ki, prezident Armen Sarkisyan tərəfindən avqustun 2-də baş nazir vəzifəsinə təyin edilən N.Paşinyan artıq hökumətin formalaşdırılmasını başa çatdrımaq üzrədir. Həm komanda daxilində, həm də cəmiyyətdə ciddi etirazlara baxmayaraq, bəzi şəxslərin yüksək vəzifəyə təyinatına nail olan Paşinyan bu dəfə sabiq spiker Ararat Mirzoyanı xarici işlər naziri təyin edib. “Panorama.am” yazır ki, artıq bu təqdimat Ermənistan prezidenti A.Sarkisyan tərəfindən təsdiq edilib.

Bu xəbər erməni cəmiyyəti və mediasında təəccüblə qarşılanıb. Ona görə ki, yaxın günlərə qədər sabiq spiker A.Mirzoyanın təhlükəsizlik şurasının katibi təyin olunacağı gözlənilirdi. Lakin gözlənilənin tam əksinə olaraq qərar verilib. Belə ki, baş nazir N.Paşinyanın qərarı ilə bundan bir müddət əvvəl xarici işlər nazirinin birinci müavini vəzifəsinə təyin edilən Armen Qriqoryan da yenidən təhlükəsizlik şurasının katibi vəzifəsinə qaytarılıb.

Yeri gəlmişkən, baş nazir N.Paşinyan hökumətin 2021-2026-cı illər üçün fəaliyyət proqramını da nazirlər kabinetinə təqdim edib və onun təsdiqinə nail olub.

Beləliklə, Paşinyan hakimiyyəti seçkidən sonra yeni fəaliyyət proqramı təqdim etsə də, Ermənistanda mövcud olan sosial-iqtisadi böhranın aradan qaldırılması sual altındadır. Belə ki, hakimiyyət qonşuları ilə münasibətlərdə mövqeyini dəyişməsə, son 3 ildə heç bir inkişafa və irəliləyişə nail olmadığı kimi, bundan sonra da tənəzzül bataqlığında çırpınmağa məhkum olacaq.

Qaşqay ZİYƏDDİNOĞLU

Paylaş:

Baxılıb: 642 dəfə