Daşqın zonasından köçürülmüş əhali tezliklə evlərinə qaytarılacaq

Bakı:

26 °C

78 %

6 m/s

Əlaqə

AZ RU EN

Ana səhifə / Siyasət / Daşqın zonasından köçürülmüş əhali tezliklə evlərinə qaytarılacaq

Daşqın zonasından köçürülmüş əhali tezliklə evlərinə qaytarılacaq

15.05.2010 [08:33]

Dünən təbii fəlakət bölgəsindəki operativ qərargahda Baş nazirin müavini Abid Şərifovun və ərazidə işləyən əlaqədar qurumların nümayəndələrinin iştirakı ilə növbəti yığıncaq keçirilib.
Yığıncaqdan sonra mətbuata açıqlama verən A.Şərifov əvvəlcə bəzi KİV-lərdə verilmiş əsassız məlumatlara münasibət bildirərək deyib ki, təbii fəlakətdən qrup maraqları naminə istifadə etmək sağlam düşüncə ilə bir araya sığmır. Hadisələrin gedişinə obyektiv yanaşmaq lazımdır. Bunu bacarmayanlar əks-təbliğat, şayiə yaymaqla məşğul olmamalıdırlar. Kürün Bayramlı qəsəbəsi ərazisində yıxdığı bəndin bərpası ən qısa müddətdə aradan qaldırılıb. Əraziyə 5 min kubmetrə yaxın ağır daş parçaları, dəmir-beton hissələr daşınıb.
Baş nazirin müavini bildirib ki, fəlakət ərazisinə Fövqəladə Hallar Nazirliyinin 2 min, Daxili İşlər Nazirliyinin 1500 və Müdafiə Nazirliyinin çoxsaylı canlı qüvvələri cəlb edilib. Bu qüvvələr yerli əhali ilə birlikdə daşqının nəticələrinin aradan qaldırılması ilə məşğuldurlar. Mürsəlli kəndindəki dambanın bərpası ilə bağlı işlərin dünən - mayın 14-də yekunlaşacağını qeyd edən A.Şərifov bildirib ki, ikinci dambanın bərkidilməsi ilə bağlı işlər də yekunlaşmaq üzrədir.
Yaxın iki gün ərzində əhalinin doğma evlərinə köçürülməsi üçün hazırlıq işlərinin də aparıldığını bildirən Baş nazirin müavini ilk növbədə həmin kəndlərdəki infrastrukturun bərpa olunacağını deyib. Yəni kəndlərə elektrik enerjisinin, qazın, suyun verilməsi bərpa olunacaq, sel suları qurudulduqdan sonra dezinfeksiya işləri aparılacaq.
Daxili işlər naziri, general-polkovnik Ramul Usubov da jurnalistlərə açıqlama verərək bildirib ki, Mürsəlli istiqamətində uçmuş bəndin bərpası mayın 14-də axşama yaxın başa çatdırılacaq. Prezident İlham Əliyevin tapşırığına əsasən Fövqəladə Hallar, Daxili İşlər, Müdafiə nazirliklərinin, “Meliorasiya və Su Təsərrüfatı” ASC-nin bütün qüvvələri və yerli əhalinin birgə səmərəli fəaliyyəti nəticəsində bu işlərin görüldüyü vurğulanıb.
Nazir daşqın zonasında ciddi qanun pozuntusu hallarının olmadığını qeyd edib. Yalnız 2 oğurluq faktı qeydə alınıb. Belə halların baş verəcəyi ehtimalının olduğunu bildirən nazir, bunun qarşısını almaq, vətəndaşların əmlakını qorumaq məqsədi ilə bütün lazımi tədbirlərin görüldüyünü deyib.
Jurnalistlərin suallarını cavablandıran R.Usubov evakuasiya olunmuş əhalinin yaxın günlərdə evlərinə qaytarılacağını bildirib. Əlaqədar qurumların su basmayan evlərdəki vəziyyəti araşdıracağı, yalnız bundan sonra qarşılıqlı razılaşma əsasında əhalinin geriyə köçürülməsinə icazə veriləcəyi qeyd olunub.
Bəndbərkitmə işlərinin gedişi ilə tanış olmaq üçün hadisə yerinə gedəcəklərini bildirən nazir, vəziyyətlə bağlı növbəti yığıncağın keçiriləcəyini deyib.

Paylaş:

Baxılıb: 1255 dəfə