Həmsədrlərin məqsədi işğalçı Ermənistanı xilas etməkdir

Bakı:

23 °C

56 %

8 m/s

Əlaqə

AZ RU EN

Ana səhifə / Siyasət / Həmsədrlərin məqsədi işğalçı Ermənistanı xilas etməkdir

Həmsədrlərin məqsədi işğalçı Ermənistanı xilas etməkdir

28.10.2020 [08:48]

Ermənistan humanitar atəşkəsi pozaraq terrorçu fəaliyyətini davam etdirir
Məlum olduğu kimi, Azərbaycan Respublikası Ermənistanın işğalçılıq siyasətinə son qoyulması istiqamətində uğurlu siyasət həyata keçirir. Bu siyasət həm döyüş meydanında, həm də diplomatik müstəvidə uğurla davam etdirilməkdədir. Xatırladaq ki, BMT Təhlükəsizlik Şurasının hələ 1993-cü ildə qəbul etdiyi 822, 853, 874 və 884 saylı qətnamələrində Azərbaycanın ərazi bütövlüyü, suverenliyi və sərhədlərinin toxunulmazlığının zəruriliyi bildirilir. BMT Təhlükəsizlik Şurasının sənədlərində işğalçı qüvvələrin Azərbaycan ərazilərindən dərhal və qeyd-şərtsiz çıxması tələb olunsa da, Ermənistanın açıq-aşkar işğalçılıq mövqeyi tutması nəticəsində bu qətnamələr indiyədək yerinə yetirilməyib.
Sözügedən qətnamələrin yerinə yetirilməməsinin digər bir səbəbi isə beynəlxalq birliyin işğalçı Ermənistana hər hansı formada təzyiq göstərməməsidir. Xüsusilə, münaqişənin nizamlanması prosesində vasitəçilik missiyasını həyata keçirən ATƏT-in Minsk qrupunun həmsədrləri nəinki təcavüzkara qarşı heç bir addım atmayıb, əksinə Ermənistanın hərbi və beynəlxalq cinayətlərinə göz yumublar.
Belə olan halda, təcavüzkar Ermənistanın cinayətlərinə son qoymaq üçün Azərbaycan dövləti BMT Təhlükəsizlik Şurasının qətnamələrini icra etməyə başlayıb. Amma sentyabrın 27-dən etibarən işğal edilmiş torpaqlarını ard-arda azad edən Azərbaycana xaricdən çoxsaylı təzyiqlər edilir. Məqsəd ordumuzun zərbələrindən acınacaqlı vəziyyətə düşən işğalçı Ermənistanı xilas etməkdir. Bu təzyiqlərin birini oktyabrın 19-da BMT Təhlükəsizlik Şurasında məsləhətləşmələr zamanı gördük. Belə ki, BMT Təhlükəsizlik Şurasının daimi üzvləri, eyni zamanda, ATƏT-in Minsk qrupunun həmsədr ölkələri hazırladıqları bəyanat layihəsinə 1993-cü ildə qəbul edilmiş 822, 853, 874 və 884 saylı qətnamələrə istinadı daxil etməmişdilər. Üstəlik onlar bir sıra ölkələrin həmin qətnamələrə istinadın mətnə salınması ilə bağlı təkidli mövqeyini də qəbul etmədilər. Hansı ki, Təhlükəsizlik Şurasında təmsil olunan Qoşulmama Hərəkatına (QH) üzv olan 7 ölkə - İndoneziya, Niger, Vyetnam, Tunis, Cənubi Afrika, Dominikan Respublikası, Sent Vinsent və Qrenadin layihəyə Təhlükəsizlik Şurasının məlum qətnamələrinə istinadın daxil edilməsini təklif edib, lakin həmsədr ölkələr tərəfindən bu qəbul olunmayıb. Həmsədr ölkələr tərəfindən bəyanatın iki dəfə sükut proseduru vasitəsilə qəbuluna cəhd göstərilməsinə baxmayaraq, Qoşulmama Hərəkatına üzv ölkələr prinsipial mövqe nümayiş etdirərək Təhlükəsizlik Şurasının qətnamələrinə istinadın yer almasında təkid edərək BMT Nizamnaməsinə, beynəlxalq hüququn norma və prinsiplərinə, Bandunq prinsiplərinə, Qoşulmama Hərəkatının sənədlərinə sadiqliyini növbəti dəfə nümayiş etdirib və nəticədə adı çəkilən bəyanat layihəsi rəsmən geri götürülüb.
Onu da qeyd edək ki, Dağlıq Qarabağ münaqişəsi ilə bağlı oktyabrın 25-də ABŞ Dövlət Departamenti və Minsk qrupunun həmsədrlərinin bəyanatının ilkin layihəsi də son mətndən fərqlənirdi. Azərbaycan tərəfi qəti mövqe nümayiş etdirərək açıqlamanın birtərəfli olmasının, yəni onun, ancaq humanitar atəşkəs ilə məhdudlaşdırılmasının qarşısını almağa nail olub. Bəyanatların özünə gəldikdə isə ilk olaraq vurğulanmalıdır ki, burada söhbət atəşkəsdən deyil, humanitar atəşkəsdən gedir.
Bəyanatda yer alan atəşkəsin monitorinqi üzrə parametrlər məsələsi isə münaqişənin müfəssəl həlli prosesi ilə paralel getməlidir. Bu o deməkdir ki, Ermənistanın işğalçı qoşunlarının Azərbaycanın işğal edilmiş ərazilərindən çıxarılması ilə bağlı konkret vaxt cədvəli müəyyən edilməlidir. Bəyanatda öz əksini tapmış “vaxt cədvəli” (timeline) ifadəsi məhz bunu nəzərdə tutur. Eyni zamanda, atəşkəsin monitorinqi üzrə parametrlər Ermənistandan işğal olunmuş ərazilərə silah, canlı qüvvə daşınmasına nəzarət olunmasını da ehtiva etməlidir. Bu mənada həmsədrlərin bəyanatında yer almış məqamların geniş surətdə müzakirə olunmasına və razılaşdırılmasına ehtiyac var.
Hazırkı reallıqlar isə onu göstərir ki, işğalçı Ermənistan növbəti humanitar atəşkəsi də pozaraq terrorçu fəaliyyətini və müharibə cinayətlərini davam etdirir.
N.BAYRAMLI

Paylaş:

Baxılıb: 378 dəfə