Azərbaycan-Meksika parlamentlərarası əlaqələri müzakirə olunub

Bakı:

23 °C

78 %

8 m/s

Əlaqə

AZ RU EN

Ana səhifə / Siyasət / Azərbaycan-Meksika parlamentlərarası əlaqələri müzakirə olunub

Azərbaycan-Meksika parlamentlərarası əlaqələri müzakirə olunub

11.07.2020 [09:52]

İyulun 9-da Milli Məclisin Ailə, qadın və uşaq məsələləri komitəsinin sədr müavini, Azərbaycan-Meksika parlamentlərarası əlaqələr üzrə işçi qrupunun rəhbəri Jalə Əliyeva Meksika Birləşmiş Ştatları Senatının Azərbaycanla dostluq qrupunun rəhbəri Aqustin Qarsiya Rubio ilə onlayn görüş keçirib.

Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, videokonfransda Azərbaycanın Meksikadakı fövqəladə və səlahiyyətli səfiri Məmməd Talıbov, Meksikanın ölkəmizdəki fövqəladə və səlahiyyətli səfiri Xuan Rodriqo Labardini Flores və digər rəsmi şəxslər iştirak ediblər.

Azərbaycan-Meksika parlamentlərarası əlaqələr üzrə işçi qrupuna ilk dəfə rəhbər seçildiyini bildirən Jalə Əliyeva əvvəlcə Meksika Senatının üzvlərinə Azərbaycan Milli Məclisinin Sədri, professor Sahibə Qafarovanın salamlarını çatdırıb. Qeyd edib ki, məhz dövlət qadın siyasətinin nəticəsidir ki, Azərbaycanın Birinci vitse-prezidenti Mehriban Əliyevadır, VI çağırış Milli Məclisə də xanım Sahibə Qafarova sədr seçilib. Dünya siyasətində qadınların artan rolu Meksika parlamentinin hər iki palatasının – Senatın və Deputatlar Palatasının sədrlərinin də qadın olmasında özünü parlaq nümayiş etdirir.

Ölkələrimiz arasında dostluq və əməkdaşlığın inkişafında diplomatik münasibətlərin rolundan danışan işçi qrupun rəhbəri parlamentlərarası əlaqələrin əhəmiyyətini yüksək qiymətləndirib. Qeyd edib ki, Milli Məclisdə və Meksika parlamentində yaradılmış dostluq qrupları ölkələrimiz arasında ikitərəfli əlaqələrin genişlənməsində mühüm rol oynayırlar.

Meksika parlamentinin 2011-ci ildə Dağlıq Qarabağ münaqişəsi və Xocalı faciəsi ilə bağlı obyektiv gerçəkliyi əks etdirən sənədlər qəbul etdiyini minnətdarlıqla vurğulayan Jalə Əliyeva Azərbaycanın haqq işini və ədalətli mövqeyini dəstəklədiklərinə görə Meksika parlamentarlarına minnətdarlığını bildirib.

Sonra videokonfransda Meksika-Azərbaycan dostluq qrupunun rəhbəri Aqustin Qarsiya Rubio pandemiya şəraitində onlayn görüşün təşkilinə görə təşəkkür edib. VI çağırış Milli Məclisə seçkilərdə müşahidəçi qismində iştirak etdiyini, seçkinin şəffaf və demokratik keçirilməsindən məmnun qaldığını söyləyib. Azərbaycan mədəniyyətinə heyranlığını bildirib. Ölkələrimiz arasında elm, texnologiya, kənd təsərrüfatı, enerji, nəqliyyat, vulkanologiya, turizm, mədəniyyət, iqtisadiyyat və digər sahələrdə ikitərəfli faydalı əməkdaşlıq üçün geniş imkanların olduğunu qeyd edib. Milli Məclislə əməkdaşlığın möhkəmləndirilməsi istiqamətində bütün imkanlardan istifadə edəcəklərini bildirib. Parlamentlərarası əlaqələrin daha da genişlənməsi üçün hər iki tərəfdən deputatların qarşılıqlı səfərlərinin, görüşlərin və təcrübə mübadiləsinin intensivləşməsini vacib hesab edib.

Söhbət zamanı Azərbaycan-Meksika əlaqələrinin inkişafında səfirlərin mühüm xidmətləri olduğu vurğulanıb.

Görüşdə Meksikanın ölkəmizdəki səfiri Xuan Rodriqo Labardini Flores və Azərbaycanın Meksikadakı səfiri Məmməd Talıbov xalqlarımızın dostluq və ölkələrimizin hərtərəfli əməkdaşlıq münasibətlərinin genişləndirilməsi perspektivlərinə dair fikirlərini açıqlayıblar.

Söhbət zamanı perspektivdə duran bir sıra məsələlər müzakirə edilib. COVID-19 pandemiyasının tezliklə bitməsi, bəşəriyyətin bu bəladan xilas olması və parlamentlərimiz arasında qarşılıqlı səfərlərin və görüşlərin baş tutması arzulanıb.

Sonda videokonfransda ölkələrimiz arasında diplomatik münasibətlərin yarandığı dövrdən etibarən Meksika-Azərbaycan münasibətlərinin inkişaf templərini, iqtisadi əlaqələri, ticarət dövriyyəsini və s. əks etdirən slaydlar nümayiş olunub.

Paylaş:

Baxılıb: 410 dəfə