ABŞ Konqresinin qəbul etdiyi qərar AGAT-nin də haqlı narazılığına səbəb olub

Bakı:

22 °C

78 %

6 m/s

Əlaqə

AZ RU EN

Ana səhifə / Siyasət / ABŞ Konqresinin qəbul etdiyi qərar AGAT-nin də haqlı narazılığına səbəb olub

ABŞ Konqresinin qəbul etdiyi qərar AGAT-nin də haqlı narazılığına səbəb olub

22.12.2009 [11:01]

“Vəsaitin bölgədə separatçılığın və terrorun dəstəklənməsinə yönəldiləcəyi ehtimalı daha böyükdür”
ABŞ Konqresinin Dağlıq Qarabağ separatçılarına maliyyə yardımı ayırmasına etiraz olaraq, Azərbaycan Gənclərinin Avropaya İnteqrasiyası Təşkilatının sədri Gülsel Səfərova təşkilatın ABŞ Konqresinin Dağlıq Qarabağa 8 milyon dollar ayırmasına etiraz bəyanatını yayıb: “Azərbaycan Gənclərinin Avropaya İnteqrasiya Təşkilatı(AGAT) Azərbaycanda gənc nəslin iştirakı ilə sülh, insan hüquqları və qərb demokratik dəyərlərinin təbliğatçılarlından biri kimi fəaliyyət göstərir. Əsas missiyası qərb vətəndaş cəmiyyəti modelinin və dəyərlərinin Azərbaycanda daha da möhkəmlənməsinə nail olmaqdır. Amerika Birləşmiş Ştatları dünyada sülhün, demokratiyanın və insan hüquqlarının təminatçısı olan dövlətlərdən biri kimi tanınır. Bir faktdır ki, hal-hazırda on minlərlə amerikan əsgəri dünyanın ən gərgin bölgələrində sülh keşikçisi kimi şərəfli missiyanı yerinə yetirir. ABŞ hər il 100 milyardlarla dollar vəsaiti bu istiqamətə yönəldir. Bütün bunlar dünya demokratiyasına xidmət edən təqdirəlayiq və alqışlanacaq strategiyadır. Lakin AGAT olaraq biz, ABŞ konqresinin Azərbaycan Respublikasının Dağlıq Qarabağ bölgəsinə 8 milyon dollar yardım ayırması ilə bağlı qərarını narahatçılıq hissi ilə qarşıladıq. Belə ki, 1990-cı illərin əvvəllərindən həmin bölgə və ətraf 7 rayon Ermənistan silahlı qüvvələrinin işğalı altındadır. Bu gün qondarma “Dağlıq Qarabağ Respublikası” Azərbaycan Respublikasının, beynəlxalq təşkilat və institutların nəzarəti və təsiri xaricindədir. Belə bir şəraitdə ABŞ konqresinin 8 milyon dollar vəsaiti qondarma “respublikanın” hakimiyyətinin ixtiyarına verməsi təşviş doğurmaya bilməz. Bu maliyyənin Konqresin tövsiyə etdiyi istiqamətlər üzrə xərclənəcəyi də böyük şübhə doğurur. Vəsaitin bölgədə separatçılığın və terrorun dəstəklənməsinə yönəldiləcəyi ehtimalı daha böyükdür. Bütün bunlar haqlı narazılığa səbəb olur. AGAT Dağlıq Qarabağ bölgəsinin erməni icmasına 8 milyon dollar məbləğində yardımın ayrılmasını, işğal nəticəsində həmin bölgədən didərgin düşmüş yüz minlərlə azərbaycanlının isə belə yardımdan kənarda qoyulmasını yolverilməz sayır. Hesab edirik ki, Azərbaycan Respublikasının ərazi bütövlüyünü tanıdığını dəfələrlə bəyan etmiş ABŞ beynəlxalq hüquq normalarına hörmət etməli, Dağlıq Qarabağ bölgəsi ilə bağlı qəbul etdiyi hər bir qərarı və atdığı bütün addımları rəsmi Bakı ilə razılaşdırmalıdır. Fərqli yanaşma Azərbaycan ictimaiyyəti tərəfindən separatçılığın dəstəklənməsi kimi qiymətləndiriləcəkdir. Bütün bunları nəzərə alaraq, AGAT ABŞ Konqresini Dağlıq Qarabağ regionuna yardımla bağlı qərarına yenidən baxmağa, prezident Barak Obamanı isə öz veto hüququndan istifadə edərək həmin qərarın icrasını dayandırmağa çağırır”.

Paylaş:

Baxılıb: 1187 dəfə