Dimitri Kerkentzes: Azərbaycan “Expo-2025” üçün yeni və çox maraqlı bir məkandır

Bakı:

26 °C

57 %

8 m/s

Əlaqə

AZ RU EN

Ana səhifə / Siyasət / Dimitri Kerkentzes: Azərbaycan “Expo-2025” üçün yeni və çox maraqlı bir məkandır

Dimitri Kerkentzes: Azərbaycan “Expo-2025” üçün yeni və çox maraqlı bir məkandır

13.12.2017 [10:49]

Bakıya səfərim çərçivəsində Azərbaycan üçün “Expo-2025” layihəsinin çox böyük önəm daşıdığının və bu istiqamətdə ciddi hazırlıq işlərinin aparıldığının şahidi oldum. Həmçinin Bakının bu istiqamətdə gördüyü işlər və atacağı addımlarla yaxından tanış olmaq imkanı qazandım. Azərbaycan Ümumdünya “Expo-2025” Sərgisi üçün yeni və çox maraqlı bir məkandır.
AZƏRTAC xəbər verir ki, bu sözləri “Expo-2025” Ümumdünya Sərgisinə ev sahibliyi etmək üçün namizədliyi irəli sürülən Bakının bu layihəyə hazırlıq prosesi ilə yaxından tanış olmaq məqsədilə Azərbaycana səfər edən Beynəlxalq Sərgilər Bürosunun baş katibinin müavini Dimitri Kerkentzes jurnalistlərə müsahibəsində deyib.
Səfər çərçivəsində “Bakı Expo-2025”ə məsul olan bir sıra rəsmilərlə, o cümlədən biznes, gənclər, könüllülər və digər sahələrə cavabdeh olan şəxslərlə görüşdüyünü deyən D.Kerkentzes vurğulayıb ki, Bakı ev sahibliyi uğrunda mübarizədə var gücü ilə çalışır.
Beynəlxalq Sərgilər Bürosunun baş katibinin müavini qeyd edib ki, mart-aprel aylarında Büronun qiymətləndirmə missiyasının hazırlıq prosesi ilə yaxından tanış olmaq üçün Bakıya səfəri gözlənilir. Qiymətləndirmə missiyası təkcə Azərbaycan üçün deyil, “Expo-2025”ə ev sahibliyi etmək üçün namizədliyi irəli sürülən digər üç ölkə - Fransa, Rusiya və Yaponiya üçün böyük əhəmiyyət daşıyır. 2018-ci ilin noyabr ayında Beynəlxalq Sərgilər Bürosunda qalib şəhərin adı müəyyənləşəcək.
D.Kerkentzes deyib ki, Beynəlxalq Sərgilər Bürosu üçün Bakının namizədliyi sadəcə olaraq şəhər namizədliyi deyil, həm də şəhər sakinlərinin, eyni zamanda, gənclərin bu layihəyə marağının nümayişidir. Bu layihənin əsas istiqamətlərindən biri də gənclərdir. Hər bir sərginin həyata keçirilməsində gənclərin müstəsna rolu olub. Düşünürük ki, növbəti sərginin keçirilməsində inkişaf baxımından gənclərin böyük rolu olacaq.
Baş katibin müavini bildirib ki, qiymətləndirmə missiyasının səfəri çərçivəsində bir sıra önəmli məqamlar var. Əsas məqam ondan ibarətdir ki, Bakı Büronun missiyası ilə görüşə nə təqdim edəcək, hazırlığını necə nümayiş etdirəcək. Bakı Beynəlxalq Sərgilər Bürosuna üzv olan 176 ölkəni necə inandıracaq ki, həqiqətən o, Ümumdünya Sərgisinin keçirilməsinə layiqli şəhərdir. Həmçinin qiymətləndirmə missiyasına təqdim edilməli olan məqamlardan biri də xalq ilə dövlətin birliyidir. Bu, “Expo”ya bərabər arzunun nümayişidir.
Dimitri Kerkentzes deyib ki, bu mübarizəyə ilk dəfə qoşulan Azərbaycan özünəməxsus zəngin təbiəti, mədəniyyəti, qədim tarixi, Avropa ilə Asiya arasında böyük İpək Yolunun üstündə yerləşməsi, dini tolerantlığı ilə “Expo” ailəsi üçün kifayət qədər cəlbedici ölkədir.
Beynəlxalq Sərgilər Bürosunun baş katibinin müavini Dimitri Kerkentzes jurnalistlərlə görüşdən sonra “Bakı Expo-2025”in “Arzular kitabı”na ürək sözlərini yazdı.

Paylaş:

Baxılıb: 511 dəfə