Moldovada Xocalı faciəsinin qurbanlarının xatirəsi yad olunub

Bakı:

21 °C

83 %

7 m/s

Əlaqə

AZ RU EN

Ana səhifə / Siyasət / Moldovada Xocalı faciəsinin qurbanlarının xatirəsi yad olunub

Moldovada Xocalı faciəsinin qurbanlarının xatirəsi yad olunub

22.02.2017 [09:56]

Moldova hökuməti Etnik Əlaqələr Bürosunda Moldova Azərbaycanlılar Konqresi və Azərbaycanın bu ölkədəki səfirliyinin təşkilatçılığı, eləcə də Bakı Beynəlxalq Multikulturalizm Mərkəzi (BBMM) və Moldova İctimai Palatasının dəstəyi ilə Xocalı faciəsinin 25-ci ildönümü ilə əlaqədar tədbir keçirilib.
Tədbirdə Moldovanın dövlət rəsmiləri, parlament deputatları, ölkədə akkreditə olunmuş xarici diplomatlar, Azərbaycan diasporunun nümayəndələri, alimlər, politoloqlar, jurnalistlər, tələbə və gənclər iştirak ediblər.
Öncə Xocalı soyqırımı qurbanları və şəhidlərin xatirəsi bir dəqiqəlik sükutla yad edilib. Heydər Əliyev Fondunun dəstəyi ilə hazırlanmış Xocalı faciəsi haqqında sənədli film nümayiş etdirilib.
Tədbiri Azərbaycanın Moldovadakı səfiri Qudsi Osmanov açaraq Xocalı soyqırımının dünyada tanınması və faciəyə siyasi-hüquqi qiymətin verilməsi istiqamətində Prezident İlham Əliyevin rəhbərliyi ilə həyata keçirilən tədbirlər barədə məlumat verib.
Moldova Azərbaycanlıları Konqresinin rəhbəri Vüqar Novruzov bildirib ki, Ermənistanın torpaqlarımızı işğal etməsi nəticəsində bir milyon insan doğma torpaqlarından didərgin düşüb: “Ədalətin bərqərar olacağına inanırıq və bu istiqamətdə mübarizəni davam etdirəcəyik. İlk növbədə bu faciəni törədənlər cəzalandırılmalı, Xocalı qətliamına siyasi-hüquqi qiymət verilməlidir ki, belə faciələr gələcəkdə təkrarlanmasın”.
Etnik Əlaqələr Bürosunun baş direktoru Oleq Babenko qeyd edib ki, belə faciə bəşəriyyət tərəfindən unudulmamalı və gələcək nəsillərə çatdırılmalıdır.
Tədbirdə çıxış edən Türkiyənin Moldovadakı səfiri Hulusi Kılıç deyib: “Qardaş Azərbaycanın ağrısı olan Xocalı faciəsi Türkiyənin də ağrısıdır. Azərbaycan torpaqları işğaldan azad olunmayana qədər Türkiyə ilə Ermənistan sərhədləri açılmayacaq”.
Eyni zamanda, səfir Birinci Dünya müharibəsində olmayan soyqırımı axtaranlara öncə yaxın tarixdə baş vermiş Xocalı faciəsinə diqqət yetirməyi tövsiyə edib.
Moldova Parlamentinin deputatı, parlamentin Xarici siyasət və Avropa inteqrasiyası komissiyasının sədr müavini Sergey Stati bildirib ki, Xocalı faciəsi dünya ictimaiyyəti üçün siyasi, millətçi ambisiyaların və işğalçı əməllərin əsl qiymətinin göstəricisidir: “Bizim ölkələri indiyədək həll olunmayan ərazi münaqişələrinin mövcudluğu və yaşanmış müharibələrin dəhşətləri birləşdirir. Və bu hadisələrin nəticəsi hər iki dövlət üçün eynidir: çoxsaylı günahsız qurbanlar”.
Bakı Beynəlxalq Multikulturalizm Mərkəzinin Moldova filialının rəhbəri Aureliya Qriqoriu çıxışında insanlığa qarşı törədilən bu ağır cinayətlərə görə səbəbkarların məsuliyyətə cəlb olunmağının vacibliyini qeyd edib. Eyni zamanda, o, Azərbaycanın multikulturalizm modelinin dünyanın ayrı-ayrı yerlərində gedən müharibələr və terrorizmə qarşı yeganə alternativ nümunə olduğunu vurğulayıb.
BBMM-in İsrail filialının sədri, Beynəlxalq əlaqələr üzrə ekspert, politoloq və “Ağrı” kitabının həmmüəllifi Arye Qut isə çıxışında qeyd edib ki, İkinci Dünya müharibəsində faşist rejimindən qaçan minlərlə yəhudi Azərbaycanda nəinki sığınacaq, Vətən tapıblar. Buna görə Xocalı faciəsinin onun üçün şəxsi faciə olduğunu bildirib.

Paylaş:

Baxılıb: 445 dəfə