"Azərbaycan Respublikası Dağlıq Qarabağ bölgəsi azərbaycanlı icması" İctimai Birliyinin idarə heyətinin iclası keçirilib

Bakı:

31 °C

32 %

3 m/s

AZ RU EN

Ana səhifə / Siyasət / "Azərbaycan Respublikası Dağlıq Qarabağ bölgəsi azərbaycanlı icması" İctimai Birliyinin idarə heyətinin iclası keçirilib

"Azərbaycan Respublikası Dağlıq Qarabağ bölgəsi azərbaycanlı icması" İctimai Birliyinin idarə heyətinin iclası keçirilib

13.06.2009 [08:31]

Dünən Azərbaycan Respublikasının Prezidenti yanında Dövlət İdarəçilik Akademiyasında “Azərbaycan Respublikası Dağlıq Qarabağ bölgəsi azərbaycanlı icması” İctimai Birliyinin qurultayında seçilmiş İdarə Heyətinin iclası keçirilib. İdarə Heyətinin sədri-icmanın rəhbəri Bayram Səfərov qurultayın ictimaiyyət arasında geniş əks-səda doğurduğunu vurğulayıb, iclasın gündəliyi barədə məlumat verib.
İdarə heyətinin üzvləri arasında vəzifə bölgüsü aparılıb, onların daxil olduğu Elm, təhsil və mədəniyyət, İcmadaxili məsələlər, Beynəlxalq əlaqələr, İnformasiya və ictimaiyyətlə əlaqələr, Hüquqi təminat və insan hüquqları bölmələrinin fəaliyyət istiqamətləri müəyyənləşdirilib, əlaqələndirmə şurasının strukturu təsdiq edilib. Bakı Slavyan Universitetinin rektoru, AMEA-nın müxbir üzvü Kamal Abdulla, AMEA-nın akademik-katibi Vaqif Fərzəliyev, akademik Cəlal Allahverdiyev, Bakı Musiqi Akademiyasının rektoru Fərhad Bədəlbəyli, Milli Məclisin deputatları Elman Məmmədov, Havva Məmmədova və başqaları çıxış edib, İdarə Heyətinin fəaliyyəti barədə rəy və təkliflərini bildiriblər. İclasda Azərbaycan Respublikası Prezidenti Administrasiyasının rəhbəri, akademik Ramiz Mehdiyev çıxış edib.
Qurultayı Ermənistan-Azərbaycan, Dağlıq Qarabağ münaqişəsinin həlli prosesində atılan vacib addım adlandıran akademik Ramiz Mehdiyev deyib ki, icmanın yenidən formalaşması böyük əhəmiyyət kəsb edir. İcmanın qurultayında görkəmli, təkcə Qarabağda yox, həm də bütün Azərbaycanda yaxşı tanınan, sayılan nüfuzlu şəxslər iştirak edirdilər. Bu şəxslərin qüvvəsindən, sözünün sanbalından səmərəli istifadə olunmalıdır. İdarə Heyəti iki istiqamətdə fəaliyyət göstərməlidir: həm ölkə daxilində iş aparmalı, həm də beynəlxalq qurumlarla, onların nümayəndələri ilə əlaqələri genişləndirməlidir.
Akademik R.Mehdiyev vurğulayıb ki, icmanın fəaliyyəti canlandırılmalı, Qarabağ əhalisi arasında maarifləndirmə işlərinin səviyyəsi yüksəldilməlidir. Əlbəttə, bu sahədə icmanın saytı, mətbu orqanı xüsusi rol oynayacaq, onların vasitəsilə Azərbaycanın mövqeyi dünyaya çatdırılacaq. Tərtib olunmuş tədbirlər planı vaxt itirmədən həyata keçirilməlidir. Dağlıq Qarabağın azərbaycanlı icmasının fəaliyyəti məqsədyönlü xarakter almalıdır.
R.Mehdiyev beynəlxalq görüşlərin vacibliyini diqqətə çatdırıb, ermənilərin Azərbaycan, azərbaycanlılar barədə yaratdıqları təsəvvürü bu görüşlərin köməyi ilə dağıtmağı tövsiyə edib. Prezident Administrasiyasının rəhbəri əmin olduğunu bildirib ki, İdarə Heyəti qarşıya qoyulmuş vəzifələri uğurla yerinə yetirəcək. Azərbaycan Respublikası Prezidenti Administrasiyasının regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyev, xarici əlaqələr şöbəsinin müdiri Novruz Məmmədov çıxış edərək İdarə Heyətinin fəaliyyətinin səmərəsinı artırmaq barədə tövsiyələrini veriblər.
Məlumat verilib ki, “Azərbaycan Respublikası Dağlıq Qarabağ bölgəsinin azərbaycanlı icması” İctimai Birliyi üçün inzibati bina ayrılıb.

Paylaş:

Baxılıb: 1468 dəfə