ATƏT PA-nın vitse-prezidenti: Problemlərin həlli üçün bu gün birliyə daha çox ehtiyacımız var

Bakı:

28 °C

54 %

1 m/s

Əlaqə

AZ RU EN

Ana səhifə / Siyasət / ATƏT PA-nın vitse-prezidenti: Problemlərin həlli üçün bu gün birliyə daha çox ehtiyacımız var

ATƏT PA-nın vitse-prezidenti: Problemlərin həlli üçün bu gün birliyə daha çox ehtiyacımız var

01.12.2016 [09:53]

Milli Məclisin deputatı, ATƏT-in Parlament Assambleyasının (PA) vitse-prezidenti Azay Quliyev Qara Dəniz İqtisadi Əməkdaşlıq Təşkilatı Parlament Məclisinin 48-ci sessiyasında iştirak edir. O, sessiyada ATƏT PA adından çıxış edib.
Azay Quliyev hazırda dünyada təhlükəsizliklə bağlı yaranmış vəziyyəti nəzərə alaraq, regionun bütün vətəndaşları üçün sülh və firavanlığın təmin olunması istiqamətində ATƏT Parlament Assambleyası ilə QDİƏT PA-nın birgə əməkdaşlığına əvvəlki dövrlərdən daha çox ehtiyac duyulduğunu deyib: “Biz hər tərəfdən problemlərin meydana gəldiyi çətin bir zamanda yaşayırıq. Həll olunmamış münaqişələr, terror aktları, qaçqın məsələləri, miqrant böhranı, müəyyən ölkələrdə mövcud olan humanitar fəlakət, din haqqında yayılan yanlış təsəvvürlər, sülh və təhlükəsizlik üçün bir çox digər maneələr həssas və kövrək dünyamızda davam edir. Bizim üzləşdiyimiz problemlər qlobal xarakter daşıyır və çoxtərəfli, kompleksli və strateji cavab tələb edir, bu səbəbdən birlikdə əməkdaşlıq etməyimiz olduqca vacibdir”.
ATƏT PA-nın vitse-prezidenti mövcud çətinliklərlə mübarizədə parlament diplomatiyasının xüsusi rolunu vurğulayaraq, təmsil etdiyi təşkilatla QDİƏT PA arasında əməkdaşlığın 5 mühüm məsələni diqqət mərkəzində saxlamasının zəruri olduğunu bildirib: “İlk sırada təhlükəsizlik məsələləri dayanır. Təəssüf ki, dünya fundamental və çoxşaxəli təhlükə rolunu oynayan beynəlxalq terrorizm tərəfindən ciddi təhdidlə üzləşir. İnsan hüquqları və hüququn aliliyi standartlarına uyğun olaraq biz, hər hansı gecikmə olmadan terrorizmə qarşı mübarizə aparmalı, hüquqlarımızı və həyatımızı müdafiə etməliyik. ATƏT PA hökumətləri terrorizmə qarşı mübarizə sahəsində əməkdaşlığın gücləndirilməsinə və terror təşkilatlarının maliyyələşdirilməsi ilə mübarizəyə çağırır”.
Azay Quliyev çıxışında ölkələrin qaçqın və miqrant probleminin həllində uğur qazana bilmədiyini qeyd edib: “Bu problemin həlli yolunu tapmaq getdikcə daha da çətinləşir. Biz təşkilatlarımızın və yerli parlamentlərimizin tam gücündən istifadə edərək miqrant problemini gündəlikdə ön plana çəkməliyik. ATƏT PA bu böhranın həllinə böyük önəm verir”.
ATƏT PA-nın vitse-prezidenti həll olunmamış və uzadılmış münaqişələrin Avropanın təhlükəsizliyinə və sabitliyinə böyük təhdid olduğunu bildirərək deyib: “Hər birinizin bildiyi kimi, Azərbaycan, Gürcüstan, Moldova və Ukrayna həll olunmamış münaqişələrin nəticələrindən böyük zərərlərə məruz qalıb. Faciəli və ağrılı nəticələr doğuran bu münaqişələr minlərlə insanın həyatını məhv edib. Bu çətinliklərin həlli üçün sürətli və asan çıxış yolları mövcud deyil, lakin Helsinki Yekun Aktı ruhunda ümumi bir yanaşma metodu hazırlanmalıdır. İnanıram ki, ATƏT regionunda münaqişələrin həlli yolunda parlament diplomatiyasının, qarşılıqlı etimadın və dialoqun mühüm əhəmiyyəti var”.
Vitse-prezident digər vacib məsələ olan parlament diplomatiyası vasitəsilə parlamentarilər arasında dialoq və əməkdaşlığın dövlətlərarası gərginliyi azaltmağa, etimad mühiti yaratmağa və mürəkkəb problemlərin mümkün həlli yollarının tapılmasına müsbət töhfə verəcəyini bildirib.
Azay Quliyev ATƏT PA, AŞPA, ATƏT DTİHB və digər əsas tərəfdaşların seçkiləri izləmək üçün seçki müşahidə missiyası kimi mühüm təcrübədən istifadə etdiyini deyib: “Bu çərçivənin köməyi ilə biz tərəfdaş təşkilatlarla əməkdaşlıq edərək seçkilərin müşahidə prosesinin effektivliyinin artırılmasına çalışırıq. ATƏT PA seçkiləri müşahidə mövzusunda önəmli təcrübəyə malikdir və bu sahədə əməkdaşlığa məmnuniyyətlə hazırdır. ATƏT PA QDİƏT PA-da olan həmkarla əməkdaşlığı davam etdirməkdən məmnunluq duyur”.

Paylaş:

Baxılıb: 504 dəfə