Qanun qarşısında hər kəs məsuliyyət daşıyır

Bakı:

20 °C

83 %

4 m/s

Əlaqə

AZ RU EN

Ana səhifə / Siyasət / Qanun qarşısında hər kəs məsuliyyət daşıyır

Qanun qarşısında hər kəs məsuliyyət daşıyır

18.08.2016 [11:27]

Natiq Cəfərov da törətdiyi cinayətə görə cavab verir
Azərbaycan demokratik dəyərlərin bərqərar olduğu müasir hüquqi dövlətdir. Demokratik, hüquqi dövlət, vətəndaş cəmiyyəti quruculuğu, dünya birliyinə fəal inteqrasiya müstəqil Azərbaycanın əsas hədəflərindən biri kimi elan olunub. Ölkə rəhbərliyi tərəfindən məqsədli və planlı şəkildə həyata keçirilən demokratikləşmə prosesi sosial, siyasi, iqtisadi olmaqla cəmiyyət həyatının bütün sferalarını əhatə edir.
Hazırda ölkəmizdə siyasi plüralizm, söz və fikir azadlığı, vətəndaş cəmiyyətinin inkişafı tam təmin olunub. Xüsusilə, son illər QHT sektorunda çox ciddi inkişaf müşahidə olunmaqdadır. Bu prosesdə dövlətin üçüncü sektora hərtərəfli dəstəyi xüsusi rol oynayır.
Amma təəssüf ki, ölkəmizdə vətəndaş cəmiyyətinin inkişafına yaradılmış yüksək şəraitdən sui-istifadə edənlər də var. Belə ki, ayrı-ayrı şəxslər və QHT-lər ölkədəki demokratik mühitdən istifadə edərək ciddi qanun pozuntularına yol verirlər. Onların “məntiqincə” belə bir mühitdə istədiklərini reallaşdıra bilərlər. Amma Azərbaycan demokratik ölkə olmaqla bərabər, hüquqi dövlətdir və qanunları pozan heç kəs məsuliyyətdən qaça bilməz. Bu baxımdan, vergidən yayınan hüquqi və fiziki şəxslər də eyni məsuliyyəti daşıyır.
Respublika Baş Prokurorluğunun mətbuat xidmətinin bu günlərdə yaydığı məlumatda da məhz belələrindən bir qrupunun qanundan kənar əməllərinə aydınlıq gətirilib. Məlumatda bildirilir ki, bir sıra qeyri-hökumət təşkilatları və xarici qeyri-hökumət təşkilatlarının filial və nümayəndəliklərinin fəaliyyətlərində aşkar edilmiş qanun pozuntuları faktlarına dair Maliyyə və Ədliyyə nazirliklərindən Baş Prokurorluğa daxil olmuş materiallar üzrə Baş Prokurorluğun Ağır cinayətlərə dair işlər üzrə istintaq idarəsində başlanmış cinayət işi üzrə zəruri istintaq əməliyyatları davam etdirilir.
Məlumatda qeyd edilir ki, cinayət işi üzrə çoxsaylı dindirmə, baxış, axtarış, götürmə və sair istintaq hərəkətləri yerinə yetirilmiş, Cəfərov Natiq Mehman oğlunun cinayət yolu ilə əldə edilmiş pul vəsaitlərinin leqallaşdırılması barədə səlahiyyətli dövlət orqanlarından daxil olmuş məlumatlar məhkəmə qərarı əsasında Maliyyə və Vergilər nazirlikləri, həmçinin Qeyri-Hökumət Təşkilatlarına Dövlət Dəstəyi Şurasının mütəxəssisləri tərəfindən yoxlanılıb.
Natiq Cəfərov 2011-2014-cü illərdə hüquqi şəxs yaratmadan sahibkarlıq fəaliyyəti ilə məşğul olan vəzifəli şəxs kimi özü üçün qanunsuz üstünlük əldə etmək, yəni vergiləri ödəməkdən yayınaraq gəlir əldə etmək məqsədilə qulluq səlahiyyətlərindən qulluq mənafeyinə qəsdən zidd olaraq sui-istifadə edib. Demokratiyaya Milli Dəstək Fondu tərəfindən özünün bilavasitə həyata keçirdiyi layihələr üzrə ayrılmış 94 565 ABŞ dolları məbləğində müvafiq icra hakimiyyəti orqanında qeydiyyata alınmayan qrant müqavilələri üzrə pul vəsaitlərinin “Bank Respublika” ASC-nin Nərimanov filialında yerləşən bank hesablarına köçürülməsini təmin etməklə nağdlaşdırıb götürərək təşkilati-sərəncamverici funksiyaları həyata keçirən layihə rəhbəri kimi müxtəlif vəzifələrə işçilər cəlb edərək özünə, eləcə də həmin şəxslərə xidmət və əmək haqları adı ilə pul vəsaitlərinin ödənilməsini təşkil etməsində, müvafiq icra hakimiyyəti orqanında qeydiyyata alınmayan qrant müqavilələri üzrə qanunsuz sahibkarlıq fəaliyyətini həyata keçirərək 71 334 manat məbləğində xeyli miqdarda gəlir əldə etməklə dövlətin qanunla qorunan mənafelərinə ağır nəticələrə səbəb olan mühüm zərər vurmasında əsaslı şübhələr müəyyən edilib.
Natiq Cəfərovun Cinayət Məcəlləsinin 192.1 (qanunsuz sahibkarlıq) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələrində nəzərdə tutulan əməlləri törətməsində əsaslı şübhələr olduğundan təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib. Hazırda Baş Prokurorluğun Ağır cinayətlərə dair işlər üzrə istintaq idarəsində cinayət işi üzrə istintaq davam etdirilir.
İş burasındadır ki, özünü “REAL” adlanan təşkilatın həmtəsisçisi kimi təqdim edən Natiq Cəfərov qanunsuz əməllərini bu təşkilatdakı “şəriki” İlqar Məmmədovla birlikdə reallaşdırıb. Törətdikləri cinayətin üstü açıldığı üçün İlqar Məmmədov da həbsdə qalmalı olub. Baş Prokurorluğun mətbuat xidmətinin yaydığı məlumatda bildirilir ki, N.Cəfərov təqdim olunan təkzibolunmaz sübutlar qarşısında öz cinayət əməllərini etiraf etmək məcburiyyətində qalıb. O, iş üzrə verdiyi ifadələrində göstərilənləri təsdiq edərək qrant müqavilələrini müvafiq icra hakimiyyəti orqanında qeydiyyatdan keçirmədiyini, ayrılmış qrant vəsaitini dostu, eyni zamanda, həmin dövrdə “REAL” hərəkatının həmsədri olmuş İlqar Məmmədovun köməkliyi ilə mənfəət əldə etmək məqsədi ilə aldığını və fiziki şəxs kimi həmin vəsaitlərin rəhbəri olduğu layihələr üzrə xərclənməsinə sərəncam verdiyini təsdiq edib.
Beləliklə, bir daha “REAL” təşkilatının demokratiya pərdəsinə bürünərək etdiyi qanunsuz əməlləri ifşa olundu. Amma Azərbaycan hüquqi dövlətdir və ölkəmizdə bütün proseslər hüquqi müstəvidə həll olunur. Kimsə qanundankənar fəaliyyətlə məşğul olursa, qanun qarşısında öz əməllərinə görə cavab verir.
N.BAYRAMLI

Paylaş:

Baxılıb: 414 dəfə