Azərbaycanın və Fransanın Daxili İşlər nazirlikləri arasında əməkdaşlıq məsələləri müzakirə edilib

Bakı:

19 °C

94 %

4 m/s

AZ RU EN

Ana səhifə / Siyasət / Azərbaycanın və Fransanın Daxili İşlər nazirlikləri arasında əməkdaşlıq məsələləri müzakirə edilib

Azərbaycanın və Fransanın Daxili İşlər nazirlikləri arasında əməkdaşlıq məsələləri müzakirə edilib

23.06.2016 [10:10]

Azərbaycan Respublikasının daxili işlər naziri, general-polkovnik Ramil Usubov iyunun 22-də Fransanın ölkəmizdəki səfiri xanım Orelia Buşez ilə görüşüb.
Daxili İşlər Nazirliyinin mətbuat xidmətindən AZƏRTAC-a bildiriblər ki, söhbət zamanı səfirin ölkəmizdəki diplomatik fəaliyyəti müddətində Azərbaycan-Fransa münasibətlərinin daha da genişlənəcəyinə əminlik ifadə olunub.
Fransanın Azərbaycanın müstəqilliyini tanıyan, respublikamızda səfirlik açan ilk dövlətlərdən biri olduğunu xatırladan nazir son illər ölkələrimiz arasında bütün sahələrdə əməkdaşlığın yüksələn xətt üzrə inkişaf etdiyini vurğulayıb. Bu əlaqələrin qurulmasında Ulu öndər Heydər Əliyevin danılmaz xidmətləri məmnunluqla vurğulanıb, dövlət başçılarının siyasi iradəsi və qarşılıqlı səfərləri nəticəsində ikitərəfli münasibətlərin keyfiyyətcə yeni müstəviyə qədəm qoyduğu nəzərə çatdırılıb.
Fransalı diplomata müstəqilliyin ilk illərində ölkəmizdə cərəyan edən gərgin ictimai-siyasi hadisələr, Ümummilli lider Heydər Əliyevin xalqın tələbi ilə ali hakimiyyətə qayıdışından sonra ölkədə həyata keçirilən köklü hüquqi-demokratik və sosial-iqtisadi islahatlar, cinayətkarlıqla qətiyyətli mübarizə, sabitliyin bərpası, kriminogen durumun nəzarətə götürülməsi barədə məlumat verilib. Ölkəmizin Avropaya inteqrasiya etdiyi, demokratik prinsiplərə söykənən, polisin fəaliyyətini tənzimləyən yeni qanunların qəbul olunduğu, bu işdə bir sıra inkişaf etmiş dövlətlərin, beynəlxalq təşkilatların, o cümlədən fransalı mütəxəssislərin böyük rolu olduğu, həmin qanunların icrasının mühüm əhəmiyyət kəsb etdiyi bildirilib.
Fəaliyyətin dünya təcrübəsinə uyğun təkmilləşdirilməsində beynəlxalq əməkdaşlığın da əhəmiyyətli rolunu vurğulayan nazir son 10 ildə 7 minə yaxın əməkdaşın və hərbi qulluqçunun bir sıra beynəlxalq təşkilatların xətti ilə çoxsaylı təlim və treninqlərə cəlb edildiyini, bunun ümumi işə müsbət təsir göstərdiyini qeyd edib.
Hər iki ölkənin Daxili İşlər nazirlikləri arasında əməkdaşlığın genişləndirilməsi məqsədilə müvafiq Anlaşma Memorandumu layihəsinin hazırlanaraq qarşı tərəfə təqdim olunduğu, həmin sənədin imzalanmasının əlaqələrin inkişafına əlverişli hüquqi zəmin yaradacağı bildirilib. İnsan hüquq və azadlıqlarının qorunması, vətəndaş məmnunluğunun təmin edilməsi sahəsində əhəmiyyətli işlər görüldüyü, DİN rəhbərliyinin bu işə xüsusi həssaslıqla yanaşdığı qonağın diqqətinə çatdırıb.
Problemlərə toxunularkən transmilli mütəşəkkil cinayətkarlığın əsas növlərindən olan beynəlxalq terrorçuluq, narkotiklərin qanunsuz dövriyyəsi, insan alveri və qanunsuz miqrasiyanın diqqət mərkəzində dayandığı və belə qlobal xarakterli təhlükəli hallarla səmərəli mübarizədə səylərin birləşdirilməsinin zəruriliyi vurğulanıb. Xüsusən ölkəmizin hər zaman terrorçuluqdan əziyyət çəkdiyini xatırladan nazir ötən il Parisdə baş vermiş terror hadisələri zamanı dinc və günahsız vətəndaşların həlak olması ilə əlaqədar səfirə bir daha başsağlığı verib.
Xanım Orelia Buşez səmimi qəbula, ətraflı məlumata və başsağlığına görə təşəkkür edib. Diplomat Azərbaycanda tolerantlıq mühitinin, multikultural dəyərlərin hökm sürməsindən məmnunluğunu vurğulayıb. O, diplomatik fəaliyyəti dövründə ikitərəfli əlaqələrin daha da inkişafı üçün səylərini əsirgəməyəcəyini bildirib.

Paylaş:

Baxılıb: 515 dəfə