Pakistanın “Diplomatic Star” jurnalında Milli Məclisə seçkilərlə bağlı məqalə dərc edilib

Bakı:

27 °C

57 %

8 m/s

Əlaqə

AZ RU EN

Ana səhifə / Siyasət / Pakistanın “Diplomatic Star” jurnalında Milli Məclisə seçkilərlə bağlı məqalə dərc edilib

Pakistanın “Diplomatic Star” jurnalında Milli Məclisə seçkilərlə bağlı məqalə dərc edilib

18.11.2015 [10:14]

Pakistanın “Diplomatic Star” jurnalında İslamabad Münaqişələrin Həlli İnstitutu düşüncə mərkəzinin icraçı direktoru, tanınmış siyasi ekspert Sabah Aslamın “Azərbaycanda keçirilmiş parlament seçkiləri və onun regional əhəmiyyəti” sərlövhəli analitik məqaləsi dərc edilib.
Azərbaycanın Pakistandakı səfirliyindən AZƏRTAC-a bildiriblər ki, məqalənin girişində xalqın iştirakı ilə formalaşdırılmış hakimiyyətin mahiyyəti izah edilir, maksimum siyasi iştirak və rəngarəngliyin demokratik hakimiyyətdə mövcud olduğu bildirilir. Qeyd olunur ki, cəmi 24 illik müstəqillik tarixinə baxmayaraq, Azərbaycanda xalqın tələbləri əsasında qurulan, cəmiyyətin müxtəlif sinif və qruplarını əhatə edən demokratik idarəçilik bərqərar etmək mümkün olub. Azərbaycan rəhbərliyinin xalqa sadiqliyi və bu yolda qərarlı olması ölkənin sürətli inkişafının əsasında duran başlıca amildir. Ölkə rəhbərliyi daxili və xarici siyasət xəttini müəyyənləşdirərkən milli maraqları əsas götürməklə əsl vətənpərvərlik nümayiş etdirir. Bu da dövlətin rifahını və tərəqqisini şərtləndirir. Uzaqgörən siyasət nəticəsində indi Azərbaycanı regionun sülh adası adlandırmaq mümkündür.
Müəllif xatırladır ki, Azərbaycan İslam dünyasında demokratik respublika üsul-idarəsini ilk dəfə təsis etmiş ölkə kimi tanınır. 2015-ci il noyabrın 1-də keçirilən parlament seçkilərində də Azərbaycan xalqının rifah, tərəqqi, sülh və sabitliyə dərin inamını aydın görmək mümkün olub. Müxtəlif siyasi partiyaların mənsubu və bitərəf 767 namizəd Milli Məclisin 125 mandatı uğrunda mübarizə aparıb. Yeni Azərbaycan Partiyası bu mandatlardan 70-ni qazanıb. Seçici fəallığı 55 faiz təşkil edib. Gənclərin və qadınların seçkilərdə iştirakı, habelə seçki komissiyalarındakı fəaliyyətləri dövlətin gələcəyi baxımından mühüm əhəmiyyət kəsb edir.
Ekspert seçkiləri 66 min yerli və 40 beynəlxalq təşkilatı təmsil edən 503 beynəlxalq müşahidəçinin izlədiyini diqqətə çatdırıb. Müəllif vurğulayıb ki, Pakistan senatorlarından ibarət nümayəndə heyətinin rəhbəri Müşahid Hüseyn seçkiləri yüksək səviyyədə təşkil olunan, demokratik, şəffaf və heç bir insident baş vermədən keçirildiyini qeyd edib.
Müəllif Azərbaycanın müxtəlif inkişaf mərhələlərindən keçdiyini, respublikanın iqtisadi tərəqqisinin ölkə rəhbərliyinin düşünülmüş siyasət yürütdüyünü sübut etdiyini, Azərbaycanın beynəlxalq arenada mövqeyini gündən-günə möhkəmləndirdiyini bildirib.
Bölgədə əməkdaşlığın inkişafından danışan ekspert Azərbaycan iqtidarının regional işbirliyinə, həmçinin Azərbaycan-Pakistan münasibətlərinə böyük önəm verdiyini qeyd edib. O, hakim partiyanın parlament seçkilərində qələbəsinin regional və ikitərəfli əlaqələrin daha da genişlənməsinə mühüm təsir edəcəyini diqqətə çatdırıb.
Ölkələrimiz arasında dostluq və qardaşlıq əlaqələrindən bəhs edən müəllif Pakistanın Azərbaycanın təhsil və iqtisadi təcrübəsindən faydalana biləcəyini qeyd edib. Həmçinin Bakı-İslamabad birbaşa aviareysləri vasitəsilə mövcud iqtisadi əməkdaşlığın daha yüksək səviyyəyə çatdırıla biləcəyi xüsusi vurğulanıb.

Paylaş:

Baxılıb: 592 dəfə