ATƏT DTİHB-nin hesabatı ədalətsiz və qərəzlidir

Bakı:

28 °C

47 %

11 m/s

Əlaqə

AZ RU EN

Ana səhifə / Siyasət / ATƏT DTİHB-nin hesabatı ədalətsiz və qərəzlidir

ATƏT DTİHB-nin hesabatı ədalətsiz və qərəzlidir

03.09.2015 [10:07]

Azərbaycanın ATƏT yanında daimi nümayəndəliyi: Qiymətləndirmə Missiyasının hesabatı DTİHB
seçki müşahidə metodologiyasının etibarlılığını sarsıdır və onun tövsiyələri Azərbaycanda genişmiqyaslı ATƏT DTİHB müşahidə missiyasının yerləşdirilməsi üçün kifayət qədər əsas ola bilməz
Məlum olduğu kimi, ölkəmizdə parlament seçkilərinə rəsmi olaraq start verilib. Seçkilərin ən yüksək demokratik standartlara uyğun keçirilməsi üçün Azərbaycan dövləti müvafiq tədbirlər həyata keçirməkdədir. Ümumiyyətlə, Azərbaycan hakimiyyəti həmişə birmənalı olaraq, azad, şəffaf, ədalətli seçkilərin keçirilməsi yönündə öz iradəsini nümayiş etdirib. Hələ 2005-ci ilin noyabrında keçirilən parlament seçkiləri zamanı Azərbaycan Prezidenti İlham Əliyevin imzaladığı Sərəncam seçkilərə hazırlıq və seçki dövründə baş verə biləcək qanun pozuntularının qarşısını almaq, seçkiləri Azərbaycan Respublikası Seçki Məcəlləsinin müddəalarına tam uyğun keçirmək, bu sahədə icra hakimiyyəti orqanlarının üzərlərinə düşən vəzifələrin lazımınca yerinə yetirilməsini təmin etmək məqsədi daşıyırdı. Seçki praktikasının təkmilləşdirilməsinə dair Sərəncamda mərkəzi və yerli icra hakimiyyəti orqanlarının rəhbərləri, digər dövlət məmurlarının seçki prosesinə qanunazidd olaraq müdaxilə edəcəyi təqdirdə ölkə qanunvericiliyinə uyğun məsuliyyətə cəlb ediləcəyi göstərilib. Bundan başqa, sənəddə mərkəzi və yerli icra hakimiyyəti orqanlarına Azərbaycan Respublikasının Seçki Məcəlləsinə uyğun səlahiyyətləri çərçivəsində seçkilərdən sonra siyasi mənsubiyyətə görə vətəndaşların təqib olunmasına yol verməmək və bu cür faktlar aşkar olunduğu təqdirdə qanunvericiliyə uyğun məsuliyyət təyin edilməsi kimi göstərişlər yer alıb.
Həmçinin, məhz dövlət başçısının 2005-ci ildə imzaladığı Sərəncamda namizədlərə efir vaxtının verilməsi və digər məsələlər də öz əksini tapmışdı ki, bu da ölkəmizdə azad və ədalətli seçkilərin keçirilməsində mühüm rol oynayır. Ötən seçkilərin təcrübəsi və reallıqlar da o fikri qətiyyətlə ortaya qoyur ki, Azərbaycan azad, demokratik və şəffaf seçkilərin keçirilməsi üçün bütün tədbirləri görür və bu da seçkilərin yüksək səviyyədə keçirilməsində öz əksini tapır. Qarşıdan gələn parlament seçkiləri də bu mənada istisna təşkil etməyəcək.
Eyni zamanda, Azərbaycan seçkilərin beynəlxalq müşahidəçi missiyaları tərəfindən izlənilməsində və ədalətli şəkildə qiymətləndirilməsində də maraqlıdır. Ona görə də parlament seçkilərini müşahidə etmək üçün Azərbaycan artıq Avropa Şurası Parlament Assambleyasına, ATƏT Parlament Assambleyasına, ATƏT-in Demokratik Təsisatlar və İnsan Haqları Bürosuna (DTİHB), Avropa Parlamentinə təkliflər göndərib. Artıq müxtəlif beynəlxalq təşkilatlar Azərbaycanda keçiriləcək parlament seçkiləri ilə bağlı özlərinin müşahidəçi qruplarını seçkiləri izləmək üçün ölkəmizə göndərəcəklərini açıqlayıblar. O cümlədən, ATƏT-in Demokratik Təsisatlar və İnsan Haqları Bürosu da Azərbaycanda noyabrın 1-də keçiriləcək seçki prosesini izləmək üçün 30 uzunmüddətli müşahidəçi, 350 qısamüddətli müşahidəçi göndərəcəyini açıqlayıb. Qısamüddətli müşahidəçilər seçki günü, seçki prosesini, səsverməni, səslərin sayılmasını izləyəcəklər. Lakin təşkilatın yaydığı seçki öncəsi bəyanat DTİHB-nin bu missiyasının məramının heç də xoş olmadığını göstərir. Hesabatda seçkilərin nəticələrinin indidən şübhə altına alınması ilə bağlı cəhdlərin olması, Azərbaycanın seçki öncəsi hazırlıqla bağlı atdığı mütərəqqi addımların, iddiaçılara bərabər şəraitin yaradılması kimi faktların sənəddə əksini tapmaması bu təşkilatın ölkəmizə qarşı ənənəvi qərəzinin davam etdiyini ortaya qoyur.
Azərbaycan Respublikasının ATƏT yanında daimi nümayəndəliyinin ATƏT DTİHB-nin Azərbaycanda keçiriləcək parlament seçkiləri ilə bağlı hesabatına cavab olaraq yaydığı bəyanatda da bu fikirlər yer alır. Belə ki, sənəddə göstərilir ki, DTİHB-nin qiymətləndirmə komissiyası dar çərçivədə araşdırma aparmış, yalnız bir qisim qrupların fikirlərinə əsaslanaraq, dəyərləndirmişdir: “DTİHB ekspertləri Azərbaycanda birtərəfli seçkiqabağı siyasi mənzərə təqdim etməyə cəhd edən bəzi üçüncü tərəf mənbələrinə istinad ediblər. Missiyanın fikrincə, Qiymətləndirmə Missiyasının hesabatı DTİHB seçki müşahidə metodologiyasının etibarlılığını sarsıdır və onun tövsiyələri Azərbaycanda genişmiqyaslı ATƏT DTİHB müşahidə missiyasının yerləşdirilməsi üçün kifayət qədər əsas ola bilməz”.
Beləliklə, qeyd etdiyimiz kimi, indiyə qədər ölkədə reallaşdırılmış seçkilərin hər biri beynəlxalq qurumlar tərəfindən təqdir olunub və prosesin demokratik keçirildiyinə heç bir şübhə yeri qalmayıb. Ona görə də Azərbaycana qarşı qərəzli münasibətinin davamı kimi ATƏT-in Demokratik Təsisatlar və İnsan Haqları Bürosunun yaydığı hesabat haqlı ictimai narazılıqla qarşılanıb.
Emin KƏRİMOV

Paylaş:

Baxılıb: 636 dəfə