Avropadakı islamofob dairələr yenə öz amplualarında...

Bakı:

18 °C

81 %

8 m/s

Əlaqə

AZ RU EN

Ana səhifə / Siyasət / Avropadakı islamofob dairələr yenə öz amplualarında...

Avropadakı islamofob dairələr yenə öz amplualarında...

18.03.2015 [10:03]

Həmin dairələr “demokratiya”, “insan hüquqları” kimi dəyərləri siyasi manipulyasiya predmetinə çevirərək “qara piar” kampaniyası aparır, ölkəmizə qarşı təzyiq mexanizmi formalaşdırmağa çalışırlar
Məlum olduğu kimi, bu gün Azərbaycan dinamik inkişaf yolundadır. Bu inkişaf iqtisadiyyatla yanaşı, siyasi, hüquqi, demokratiya və digər sahələri də əhatə edir. Artıq regionumuzun lider dövləti kimi Azərbaycan bu bölgənin siyasi, iqtisadi atmosferinin formalaşmasında həlledici təsirə malikdir. Məhz bu imkanlarından yararlanaraq ölkəmiz daxili sabitlik və çoxşaxəli xarici əlaqələr əsasında bölgədə sülh və sabitliyin təmin olunmasında öz mövqeyini konkret fəaliyyəti ilə ortaya qoyur. Azərbaycan başqa dövlətlərlə münasibətdə suveren hüquqlara hörmət və qarşılıqlı etimad prinsiplərini rəhbər tutur. Bu həm də ölkəmizin müstəqil inkişafından və öz gücünə arxalanmasından irəli gəlir. Azərbaycanın kənar təsirlərə tabe olmadan müstəqil siyasət yeritməsi, öz yolu ilə irəliləməsi ölkənin siyasi nüfuzunu artırır. Mövcud vəziyyətə əsaslanaraq deyə bilərik ki, Azərbaycanın bölgədəki siyasəti regionun siyasi, iqtisadi gələcəyinə əhəmiyyətli dərəcədə təsir etmək gücündədir. Bu isə o deməkdir ki, Azərbaycanın beynəlxalq mövqeyinin möhkəmlənməsi və xarici əlaqələrinin genişlənməsi təkcə ölkəmiz üçün deyil, bütövlükdə regionun stabil inkişafı baxımından çox böyük önəm daşıyır. Avroatlantik məkana sürətlə inteqrasiya edən respublikamızın regionun siyasi, iqtisadi həyatındakı əvəzedilməz rolu bölgənin inkişaf perspektivlərinin yüksəlməsinə yardım edir. Əlbəttə, bu siyasət normal əməkdaşlığa və tərəfdaşlığa əsaslansa da, bölgədə marağı olan bəzi xarici qüvvələr Azərbaycana təzyiq etməyə çalışır, ölkəmizin müstəqil siyasət yürütməsinin qarşısını almağa cəhd edirlər. Son vaxtlar Avropanın islamofob dairələrinin ölkəmizə qarşı “qara piar” kampaniyası aparması da buna dəlalət edir.
Həmin dairələr “demokratiya”, “insan hüquqları” kimi dəyərləri siyasi manipulyasiya predmetinə çevirərək ölkəmizə qarşı təzyiq mexanizmi formalaşdırmağa çalışırlar. Əslində, bu cür təzyiq mexanizmləri və “qara piar” kampaniyasının arxasında məhdud geosiyasi maraqlara malik olan subyektlər durur. Bu dairələr vaxtaşırı olaraq bəyanatlarda, yaxud çağırışlarında müstəqil daxili və xarici siyasət kursuna malik olan ölkələri hədəfə alır, müxtəlif ittihamlar səsləndirərək subyektiv, ədalətsiz və qərəzli mövqe sərgiləyirlər. Şübhəsiz, bu kontekstdə Azərbaycan da istisna təşkil etmir.
Bu istiqamətdə son olaraq ölkəmizdə keçiriləcək birinci Avropa Oyunları ilə bağlı spekulyasiya xarakterli çağırışlar diqqət çəkir. Bu çağırışların yayımlandığı media qurumlarına, eləcə də, bəyanatların məzmununa nəzər saldıqda görünür ki, kampaniyanın arxasında Avropadakı islamofob dairələr durur. Həmin dairələr ayrı-ayrı ölkələrdə demokratik inkişaf səviyyəsini, insan hüquqlarının vəziyyətini araşdırdığı iddia edilən, lakin sözün əsl mənasında, missioner təsisat və ya təzyiq qrupu kimi çıxış edən təşkilatların xidmətlərindən istifadə edir. Avropanın islamofob dairələrinin kampaniyasında siyasi alət kimi çıxış edən təşkilatlar, əslində, ənənəvi fəaliyyətlərini davam etdirirlər. Həmçinin, Avropadakı islamofob dairələrin birinci Avropa Oyunlarını hədəf seçmiş “qara piar” kampaniyasında transmilli media strukturlarının xidmətlərindən də xüsusi olaraq istifadə edilir. Həmin media qurumları isə dezinformasiya xarakterli məlumatları yaymaqla ölkəmizin müsbət imicinə və dünyada artan nüfuzuna xələl gətirməyə çalışırlar.
Amma kimin nə deməsindən asılı olmayaraq, Azərbaycan demokratik dəyərlərin bərqərar olduğu müasir hüquqi dövlətdir. Demokratik, hüquqi dövlət, vətəndaş cəmiyyəti quruculuğu, dünya birliyinə fəal inteqrasiya müstəqil Azərbaycanın əsas hədəflərindən biri kimi elan olunub. Ölkə rəhbərliyi tərəfindən məqsədli və planlı şəkildə həyata keçirilən demokratikləşmə prosesi sosial, siyasi, iqtisadi olmaqla cəmiyyət həyatının bütün sferalarını əhatə edir. Demokratiyanın ən mühüm göstəricilərindən biri kimi, vətəndaş cəmiyyəti quruculuğu prosesi də ölkədə uğurla irəliləyir. Eləcə də, ölkəmizdə çoxpartiyalı sistem mövcuddur, yüzlərlə KİV sərbəst şəkildə fəaliyyət göstərir. Belə olan halda, islamofob dairələrin ölkəmizə qarşı apardığı kampaniya həmişə olduğu kimi, bu dəfə də iflasa uğrayacaq.
Nardar BAYRAMLI

Paylaş:

Baxılıb: 644 dəfə