Bakıda Dünya Xəbər Agentlikləri Konqresi Şurasının 3-cü iclası keçirilib

Bakı:

20 °C

70 %

7 m/s

Əlaqə

AZ RU EN

Ana səhifə / Siyasət / Bakıda Dünya Xəbər Agentlikləri Konqresi Şurasının 3-cü iclası keçirilib

Bakıda Dünya Xəbər Agentlikləri Konqresi Şurasının 3-cü iclası keçirilib

03.03.2015 [09:52]

Martın 2-də Bakıda Dünya Xəbər Agentlikləri Konqresi Şurasının 3-cü iclası keçirilib.
İclasda 2016-cı ildə Bakıda Azərbaycan Dövlət İnformasiya Agentliyinin (AZƏRTAC-ın) ev sahibliyi ilə keçiriləcək Dünya Xəbər Agentliklərinin V Konqresinə hazırlıq işləri müzakirə olunub.
AZƏRTAC-ın baş direktoru Aslan Aslanov Dünya Xəbər Agentliklərinin V Konqresinə hazırlıq işlərinin plana uyğun həyata keçirildiyini, qurumun baş katibliyi və Şuranın digər üzvləri ilə sıx şəkildə müzakirələrin aparıldığını qeyd edib. Baş direktor əminliklə bildirib ki, AZƏRTAC bu Konqresin yüksək səviyyədə keçirilməsi üçün bütün zəruri tədbirləri görəcək.
Dünya Xəbər Agentlikləri Konqresinin və Səudiyyə Xəbər Agentliyinin (SPA) prezidenti Abdullah bin Fəhd Əl-Hüseyn gələn il AZƏRTAC-ın ev sahibliyi ilə keçiriləcək V Konqresin təşkilati işlərinin gedişinin lazımi səviyyədə olduğunu bildirib. O, bir çox məsələlərdə SPA-nın Konqresin keçirilməsi ilə bağlı təcrübəsini bölüşməyə hazır olduğunu qeyd edib.
İclasda, həmçinin Avropa Xəbər Agentlikləri Alyansının (EANA) prezidenti, Böyük Britaniyanın Press Association agentliyinin baş icraçı direktoru Klayv Marşal, Asiya və Sakit Okean Ölkələri İnformasiya Agentlikləri Təşkilatının (OANA) prezidenti, Rusiyanın TASS agentliyinin baş direktoru Sergey Mixaylov, baş direktorun birinci müavini Mixail Qusman, Reuters xəbər agentliyinin Avropa üzrə vitse-prezidenti Yoaxim Şmalts, Associated Press agentliyinin vitse-prezidenti Con Danişevski, Dünya Xəbər Agentlikləri Konqresinin baş katibi Uffe Riis Sorensen, Avropa Xəbər Agentlikləri Alyansının (EANA) baş katibi Erik Naylen, Ərəb Xəbər Agentlikləri Federasiyasının (FANA) baş katibi Fərid Əyyar, Argentinanın TELAM agentliyinin institusional əlaqələrin inkişafı üzrə meneceri Jan Manuel Fonruj və Türkiyənin Anadolu agentliyinin beynəlxalq əlaqələr şöbəsinin müdiri Ercan Göçer iştirak ediblər.
İclasda növbəti Konqresin keçiriləcəyi vaxtın, məruzəçilərin və iştirakçıların tərkibinin, panel iclaslarının mövzularının müəyyənləşdirilməsi və digər məsələlərlə bağlı müzakirələr aparılıb.
Xatırladaq ki, Dünya Xəbər Agentliklərinin V Konqresinin 2016-cı ildə Bakıda keçirilməsi və 2016-2019-cu illərdə quruma AZƏRTAC-ın sədrlik etməsi haqqında qərar 2013-cü il noyabrın 20-də Səudiyyə Ərəbistanı Krallığının paytaxtı Ər-Riyad şəhərində dünyanın 70-dən çox mötəbər xəbər agentliyinin və beynəlxalq informasiya təşkilatlarının, həmçinin SKY News Arabia, Los-Anceles Times, Guardian, BBC kimi aparıcı media qurumlarının və məşhur MSN, Google, Yahoo internet korporasiyalarının rəhbərlərinin iştirak etdikləri IV Konqresdə qəbul olunub.
Dünyanın müxtəlif ölkələrindən xəbər agentliklərinin daxil olduğu bu beynəlxalq qurumun əsas məqsədi qərəzsiz xəbər çatdırılmasını, mətbuat azadlığı prinsipini, xəbər agentliklərinin inkişafını dəstəkləmək, media biznesində qabaqcıl təcrübəni bölüşmək, rəqəmsallaşma, sosial media və alternativ biznes modellərini təkmilləşdirmək işinə yardım etməkdir.
Dünya Xəbər Agentliklərinin əvvəlki dörd konqresi Rusiya, İspaniya, Argentina və Səudiyyə Ərəbistanında keçirilib.

Paylaş:

Baxılıb: 658 dəfə